Хальмг режиссерин күцәмҗ

20-05-2021, 16:44 | Таңһчин зәңгс » Сойл

«Белая юрта» гидг фестивальд хальмг режиссерин наадн хамгин сән гиҗ тоолгдв. Шидр Абаканд давсн регионмуд хоорндк театральн фестивальд Манҗин Борис белдсн «Хубай – аңһучин көвүн» гидг наадн тиигҗ өөдән үнлгдв. Драмин болн этническ көгҗмин Чигитем нертә Хакасск театр шин наадан фестивальд үзүлсмн.

Хальмг режиссерин күцәмҗ

Басңга Баатрин нертә Келн-улсин театрин художественн һардач Манҗин Борист эн театрт наад белдҗ тәвх үрвр кегдсн билә. Хакасин эпосин өөнин җиллә ирлцүлҗ, эн театрт наад белдсмн. Хакасин артистнрлә болн театрин көдләчнрлә хамцу үүлдәд, хальмг режиссер наадыг цаглань белдәд, даалһвран күцәв. Фестивальд үнлгдснь режиссерин билг-эрдминь сән халхаснь наадн үзүлҗәнә.
Әрәсән билг-эрдмин ачта үүлдәч Манҗин Борис ода талдан нег наадыг Тувинск наадһасин театрт тәвҗәнә. «Я - Будда» гидг наадн хөн сарин 25-д олн хәләһәчнрт үзүлгдхмн.
ҖИРҺЛИН Кермн

Видео