Гер-бүүрин таалан ясрулхин төлә

25-05-2021, 16:04 | Таңһчин зәңгс » Күн болн җирһл

Давсн долан хонгт Элст балһснд «Родина» гидг сойлын төвд баахн өрк-бүлмүдт гер-бүүрин таал ясруллһнд мөңгнә сертификат бәрүлҗ өглһнә байрин керг-үүлдвр болв. Ут тоодан 47 баахн өрк-бүл сертификат авв, теднәснь 13-нь олн үртә болна.


Хальмг Таңһчин правительствин Ахлачин дарук Ирина Шварцман болн Элст балһсна һардврин толһачин дарук Васькинан Галина баһчудыг байрта йовдлла йөрәҗ, хөв-кишг дурдв. «Эврә гер-бүүр хулдҗ авлһн баахн өрк-бүл болһнд чинртә болн темдгтә йовдл болна. Шин гер-бүүртә болсн улс өрк-бүлиннь зура батлна, эднә иргчнь сән болх гиҗ ицнә. Хальмг Таңһчин Толһачин даалһврар муниципалитет гер-бүүр тосхлһна, тиим гермүдт сертификатын мөңг олзлҗ бийдән патьр хулдҗ авлһна көтлвр белдҗәнә. Өрк-бүл болһн өсәд-өргҗәд йовтха, бичкдүд болн эднә эк-эцкнр эрүл-менд болн хөвтә-кишгтә болтха, эднә җирһлд иим байрта йовдлмуд дару-дарунь учртха», – гиҗ хотл балһсна һардврин толһач Дмитрий Трапезниковин йөрәлин бичгт келгдв.
Баахн өрк-бүлмүдин нерн деерәс Бекеевихн ханлтын үг келәд, Элст балһсна һардврт эн көтлврт орлцҗах улст кергтә цаас цуглулхд дөң-тусан күрглһнә көдлмш өөдән кемҗәнд бүрдәгдсиг темдглв. Тиигәд, эднә келсәр, хотл балһсна һардврин баһчудын болн спортын комитетин көдләчнр эднд цуг халхин дөң күргҗ, сүв-севлгән өгв.
Эн көтлвр 2008-ч җиләс авн бәәдл-җирһлд тохрагдҗана. Тер цагас авн Элстд 444 баахн өрк-бүл терүнд орлцҗ гер-бүүрин таалан ясрулҗ чадв. Эн кергт 189 065 220 арслң йилһгдв, терүнәснь балһсна бюджетәс 32 689 692 арслң һарһгдв. Эн көтлвр 2024-ч җил күртл күцәгдхмн, тегәд дәкәд кесг баахн өрк-бүл гер-бүүрин таалан ясрулҗ чадҗана.

БАТАН Наталья