Таңһчан туурулх билгтнр

29-05-2021, 15:46 | Таңһчин зәңгс » Сойл

Хөн сарин 26-д П. Чонкушовин нертә билг-эрдмин колледжин урн һарин дүрслгч эрдмин әңгин оютнрин болн багшнрин үүдәврмүдин һәәхүл секгдв. Колледжин 60 җилин өөнин кемҗәнд кегдҗәх керг-үүлдвр Н.Пальмовин нертә Келн-улсин музейин залмудт болв.

Таңһчин сойлын болн туризмин министр Түрвән Саглр өсч йовх баһчудын билгинь темдглҗ, иргчдән эдн таңһчин нериг туурулх билгтнр болх гисн йөрәл келҗ, һәәхүлиг секв. Колледжин цуг әңгүдин оютнр һәәхүл секлһнд орлцҗ, көгҗм татҗ, бииһәрн сергмҗ үүдәҗ, шүлгин сәәхнәр үүрмүдин эрдмиг магтҗ, эн байрт сергмҗ үүдәв.
Хальмгин нертә зурач, скульптор Владимир Васькин байрт ирҗ орлцад, баһчудын үүдәврмүдиг соньмсҗ хәләв. Йөрәлин үгдән туурсн билгт тиигхд училищ бәәсн әңг түрүн ишкдлән кеҗ йовсинь тодлв. Грековин нертә Ростовск училищин әңг секлһнд нертә зурач Сергей Олешня, Иван Ботиев, Екатерина Ботиева хамдан зурачнр белдлһнд орлцсан тодлв. Ах үйин зурачнр Никита Санджиев болн Гарри Рокчинский хоорндан күүндсн цагтан йоста хальмг зурачнриг белдлһнә тускар келдг бәәсинь тодлад, урднь билгтә баһчуд Әрәсән кесг балһсдар йовҗ тенд зурлһна эрдм дасдг бәәсинь, келн-улсин эрдмиг, заң-авъясиг меддго төләд хальмг улсин эрдмиг делгрүлхд теднд амр биш бәәснә тускар келв. Ода болхла таңһчд эврә зурачнриг белднә, өвәрц үүдәврмүдәрн төрскн һазрин нериг һарһҗ йовна, гиҗ Владимир Савельевич седклән медүлв.
Улсин Хуралын (Парламентин) ахлачин дарук Николай Нуров йөрәлин үг келҗ, таңһчд билгтә олн баһчуд өсчәхинь, тедниг белдлһнд искусствин колледжин тәвциг өөдән үнлв.
Сойлын делгрлтд П. Чонкушовин нертә билг-эрдмин колледжин ачинь темдгләд, йөрәлин халун хальмг үгмүдиг Элст балһсна һардврин толһачин дарук Галина Васькина келәд, колледжин һардачд белг бәрүлҗ өгв.
Н. Пальмовин нертә Келн-улсин музейин директор Ирина Мучаева, таңһчин зурачнрин Ниицәнә ахлач Виктор Дорджиев үг келҗ, колледжин үүлдврт улм ик күцәмҗ дурдв. Колледжин һардач Любовь Горяева сурһулин бүрдәцин делгрлтин девсңгүдиг ахрар тодлулад, өдгә цагт энд хальмг улсин заяни билг-эрдмиг хадһлҗ, багшнрин болн сурһульчнрин дөңгәр цааранднь делгрүлҗ, келн-улсин дууна, бииһин, урн һарин билг-эрдмиг цуг делкәд медүлҗ йовхин тускар ик омгтаһар келв. Урн һарин эрдмин болн дүрслүлгч әңгиг ода һардҗах зурач Юрий Давыдов баһ наста зурачнр олн зүсн халхар белдвр авчахин, кесг һәәхүлмүдт орлцад, тааслт олҗахин тускар келв. Багшнр Владимир Куберлиновин, Николай Галушкина болн нань чигн эрдмчнрин һардврт оютнр цуг халхин белдвр авчахинь һәәхүл йир сәәнәр медүлв. Хальмг улсин кезәнк эрдминь иигәд мартуллго, баһчудт дасхчахнь йир ачта керг болҗана. Төмр-модыг, ясиг сиилҗ кесн кегдлмүдин өөр әмтн оларн хурҗ, оньган өгч хәләснь үзгдв. Залу улс өмсдг бәәсн цаһан мөңгәр сармлсн бүсмүд, аавнр цагтан татҗ йовсн олн зүсн сиилвр орулҗ кеерүлсн һанзмуд, олн-зүсн хәәрцгүд, модн ааһ-сав күүнә оньг авлҗ, өвкнр басл ухата болн эрдмтә улс бәәсинь тодлулна. Хальмг шатрин өөгүр зогслго һарч болхш. Улсин бәәцд олзлҗ болх олн тоотыг оютнр урн һарар кеҗ чаддгиг дассинь иигәд ирсн әмтн эврә нүдәрн үзв.
Сәәнәр зургдсн зургуд һәәхүлд олн билә. Зургудын ширин ниицлтд, йиртмҗин бәәдл болн әмтнә заң-бәәдл үзүллһнд баһчуд эврә хәләцән медүлсинь, сән белдвр авсинь үзҗ болхмн. Эрдмчнрин эн әңг эклҗ үүлдснәс авн давсн 27 җилин туршарт зурачнриг белдлһнә йоста төв үүдсинь һәәхүл үзүлв. Билг-эрдмин делгрлт билгтә болн сән белдвртә һарт орҗахинь үзхд урмдта болна.
ҖИРҺЛИН Кермн

Видео