БАГШНР ДУНДАС БИЛГТӘНЬ СӘН

17-06-2021, 15:41 | Таңһчин зәңгс » Сурєуль-эрдм

Мендвт, күндтә “Хальмг үннәхн”! Багшнр дундас билгтәнь сән, сурhмҗлачнр дундас седклтәнь сән, гиҗ хальмг шүлгч Шаран Петр келсн болдг. “Багшин эрдмәс даву байн уга”, гиҗ келхлә, зәрмснь алң болх. Зуг багш күн болhна җирhлд алтн герл өгч, сурhулин делкә секҗ, илвтә, итклтә, чидлтә җивр урhана. Алтн уургарн асрад босхсн эңкр ээҗ мет, килмҗтә багш сурhульчнран медрлин делкәhәр зуульчлад, соньн сәәхн хаалhар hараснь авад дахулна.


Иим дамшлтта, билгтә, седклән, зүркән, насан хальмг келн-улсин сурhуль-эрдмд өгсн күн – Наталья Бевеевна Яндонова. Эн Санҗрһа Басңгин нертә Шарнут селәнә дунд сурһулин эклц классин багш эн.
Үннә төлә үг келдг, үрнә төлә седклән зовадг, диг-дарата күн ил медгднә. Йоста хальмг бер, эк, ээҗ, седкләрн байн багш эн.
Бичкн күүкдт медрл өгәд, өсәд-босад йовсн сурhульчнрин җирhлинь үзәд, теднә байртнь багтад, hучн зурhан җилд багшлҗ йовх Наталья Бевеевна кишгтә күүнд бийән тоолна.
Соньн кичәлмүдтән Яндона Наталья дидактическ дөңцлмүд өдгә цагла ирлцңгү интернетин эв-арһ олзлҗ, күүкдт кергтә медрл өгсн төләдән. Наталья Бевеевна “Әрәсән йилhән сән багш” гидг нер зүүнә.
Өдгә цагт тоомсрта багшин нилчәр медрл авсн сурhульчнрин то олн. Цецн ухата багш, сүв-селвгәрн хувалцхларн, кениг чигн йилhлго, цугтаднь оньган өгдг учрас сурhульчнрнь цугтан Наталья Бевеевнад бас йир дурта.
Бичкдүдиг хальмг келәр соньмсулхар Наталья Бевеевна олн-зүсн кичәлмүд бүрдәнә. Үлгүрнь, кичәл-дөрлдән, кичәл-марһан, кичәл-зуульчллhн – энүнд олар наадна эв-арh олзлна. Эн учрар күүкд дуран өгч сурцхана. Насни туршарт Наталья Бевеевна «Хальмг үнн» газетин итклтә умшач болна. Мана хальмг келәр һардг ор һанцхн газетин материалмуд сурһулин кемд, кичәлмүд белдлһнд эрк биш дөң болдг.
Дааврта кевәр, чадмгар көдлмшән күцәдг төләднь сурhульчнрин эк-эцкнрнь Наталья Бевеевнаг йир күндлнә. Бәәсн бәәдләрн төвшүн, бод гисн заңта, hольшг, олнла ээлтә Н.Б. Яндоноваг хамдан көдлҗәдг багшнрнь күндләд, школын хальмг келнә багшнрин ниицәнә hардачд батлв. Эн неквртә даалhвриг олн җилдән сәәнәр күцәҗ йовна.
Эн җил эклц школыг 8 күн төгсәв. Эдн шүүврән сәәнәр өгәд, дуулад, бииләд, орс хальмг келәр шүлгүд умшад, йөрәл келәд, дассан эк-эцкнртән, багшнртан үзүләд, байр үүдәв. Эннь Наталья Бевеевнан йисдгч һарц (выпуск) мөн. Хаалhнь цаhан болтха!
Наталья Бевеевна, эрүл-менд йовҗ, номин цаhан буйнь делгрҗ йовхиг Олн Деедс Бурхд хәәрлҗ өршәтхә!

ДАВАН Анастасия
ЗУРГТ: багш Яндона Наталья 9-ч һарцин сурһульчнрла хамдан

Видео