Нертә седкүлч, шүлгч, номт

26-06-2021, 16:18 | Таңһчин зәңгс » Күн болн җирһл

Шидр мана таңһчур Өмн үзгин федеральн ик сурһулин профессор, кафедрин һардач, номт, седкүлч болн шүлгч Евгений Ахмадулин ирв. Эн Б.Б.Городовиковин нертә Хальмг ик сурһульд магистратурт седкүлчин эрдм дассн баһчуд дипломн көдлмшән харслһна шаңһа комиссь һардв. Шүүврин хөөн Евгений Валерьевич «Калмыкия» таңһчин зәңгллһнә агентствд болсн брифингд орлцҗ, седкүлчнрин сурврмудт хәрү өгв.
Харһлтын эклцәр күндтә гиич бийиннь тускар келҗ өгв. Эн Новочеркасск балһснд һарсмн. Бичкндк цагтан эк-эцк уга үлдәд, өнчн бичкдүдин герт өсв. 1963-ч җилд Новочеркасск химико-технологическ техникум төгсәһәд, күч-көлснә хаалһан Волжскд химкомбинатд слесарь болҗ эклсмн. Церглҗ йовсн цагтан эн түрүн шүлгүдән барлв. Энүнә дурта шүлгчнр Александр Пушкин болн Александр Блок болна. Хөөннь Евгений Ахмадулин Ростовск ик сурһуль заочн кевәр сурв. 1971-ч җиләс авн Новочеркасск балһсна «Знамя коммуны» газетд көдлв. Найдгч җилмүдт Евгений Валерьевич Ростовск университетд журналистикин әңгд багшлдг болв, ода эн ик сурһульд журналистикин онлын кафедриг һардҗана. Московск государственн ик сурһульд кандидатск диссертац харсв, 2001-ч җилд болхла докторин цол зүүв.
Хальмг ик сурһулин журналистикин магистратур төгсәсн оютнрин дипломн көдлмшиг Евгений Валерьевич өөдәнәр үнләд, теднә босхсн төрмүд чинртә гиҗ темдглв. Бийнь эн оютнрин бәәдл-җирһләр соньмсҗ, теднлә бат залһлда бәрҗ, күцәмҗәрнь бахмҗ кенәв гив. Үлгүрнь, урднь Әәдрхнә муҗин «Бадм цецг» ода болхла Ростовск муҗин «Дон» ГТРК-н әңг һардҗах Вячеслав Ковалев энүнә оютн болна.
Брифингин йовудт Евгений Ахмадулин үүдәлтин, эндрк журналистикин тускар ухан-тоолврарн хувалцв, соньн материал эс гиҗ соңсхвр белдхин төлә ямр кевәр харһлтд белдвр кехин туст баахн седкүлчнрт сүв-селвгән өгв. Харһлтд гиич эврә шүлгән чигн умшҗ өгв.
Мана зәңгч

Нертә седкүлч, шүлгч, номт

Видео