Дегтрт нерәдсн марафон

07-09-2021, 14:48 | Таңһчин зәңгс » Сойл

Цугәрәсән эн марафон намрин кемлә болна. Эн җил «Гүүҗ йовх дегтр - 2021» гиҗ нерәдсн марафон Хальмгт ноха сарин нег шинлә 12 часла эклв. Медрлин өдрлә ирлцсн эн керг-үүлдвр А. Амр-Санана нертә Келн-улсин дегтринр саӊгин талвңгас авн экләд, олн улсиг орлцулв. Дегтрт дурта олн күн, ик зуудан оютнр, Элстин әмтн дегтрин саӊгин көдләчнр кеҗәх керг-үүлдвриг дөңнҗ орлцв.

Хальмг улсин шүлгч Григорий Кукарекан докъяһар медрлин, дегтрин марафон эклв. Дегтрин саӊгин талвңгас эклсн марафонд Т. Хахлынован нертә Хальмг медицинск колледжин, хулд-гүүлгәнә-экономическ колледжин оютнр, Элстин нань чигн әмтн, волонтермуд, тедн дунд Хальмг ик сурhулин магистрант Александр Будаев болн оютнр Алтана Кононова, Максим Бондарев, ут тоодан 150 күн орлцв. Дегтрин саӊгин көдләчнр цуг теднлә хамдан заагдсн хаалһар эн керг-үүлдврт орлцв.
Медрлән медүлҗ болх марафон кегдҗәхин тускар дегтрин саӊ урдаснь зәңгллә. Таңһчин спортын болн баһчудын политикин министрин дарук Ангрик Мучкаев, Хальмг ик сурhулин хальмг утх-зокъялын болн журналистикин тиӊкмин һардач, профессор Раиса Дякиева, оютнр, Европин чемпионк Ольга Владимирова, МЧС-ин офицер, Әрәсән бичәчнрин Ниицәнә Хальмг региональн әңгин гешүн Игорь Ремишевский медрлән гүүдүллһнд нерәдсн марафог дөңнв. Марhана сурврмудт чик хәрү өгсн умшачнрт нерәдҗ «Путь к мечте» гидг дегтрән бичәч И. Ремишевский авч ирсмн.
Токиод дарани Олимпиад давсна хөөн кегдҗәхәс иштә марафон олимпийск төрт нерәдгдв. Эн керг-үүлдврт орлцачнрин төлә олимпийск марhан белдгдлә. Дегтрин саӊгин көдләчнр сурврмудыг белдсмн. Хальмг спортын болн спортсменмүдин туск сурврмудыг «Хальмг үнн» газетин зәңгллһнә болн спортын әңгин редактор, 1996-ч җилә Әрәсән сән гисн спортивн седкүлч, нәәмн Олимпиадт орлцсн Бадма Колдаев белдсмн. Сурврмудт чик хәрү өгсн улст седкүлч дегтриг белглсмн. Энүнә авч ирсн дегтриг хулд-гүүлгәнә-экономическ колледжин оютнр шүүҗ авв.
«Дегтр - медрлин булг» гидг нертә флешмобар соньн эн керг-үүлдвр төгсв. П. Чонкушовин нертә билг-эрдмин колледжин оютнр терүгинь белдҗ, цуглрсн цуг улсиг орлцулҗ, марафог өргмҗтәһәр төгсәв.
Медрл авлһнд дегтрин чинр төрүц баһршгог, ямаранчн зәңг болн цәәлһвр дегтрт олҗ болхиг эн марафон медүлв. Эн керг-үүлдврин сурһмҗин чинринь чигн ик болҗана. Дегтр медрл өгсн деерән, олн улсиг хамцулдгинь дегтрин саӊгин көдләчнр эн керг-үүлдврәрн медүлв.
Халх белдснь ХӨӨЧИН Галина