Усар тетклһнә объектсиг ясхар

07-10-2021, 10:00 | Общество » Новости

Одахн Деед Яшкуль - Элст усна сурвлҗнд зеткртә йовдл болсна тускар Хальмг Таңһчин Толһач Хаска Бату ухан-тоолврарн хувалцҗ, усар тетклһнә төр хаһлхин туст күцәгдҗәх көдлмшин тускар келв. Эн объект 1994-ч җиләс авн олзлгдҗана, 80 процентд эвдрсн бәәнә.

– Бидн ода эн төриг хаһлхин туст чинртә шиидвр батлвидн, усар тетклһнә Элстин объектсин тер тоод 66 дууна һазрт усна сурвлҗна турвасин ясвр күцәлһнә төлә төсвин-һаруһин бәрмт цаас белдвидн. Эн кергт 3 җува арслң кергтә болхмн. Өдгә цагт цуг бәрмт цаасн шаңһа шинҗллтд бәәнә. 2022-ч җилин дунд күртл балһсна әмтиг уудг усар теткхин төлә ус белдлһнә станц тосхлһна төсвин-һаруһин бәрмт цаас белдхәр зуралҗанавидн, – гиҗ Бату Сергеевич келв.
«Элиставодоканал» муниципальн үүлдврин көдләчнр зеткртә йовдлыг уга келһнә көдлмшиг күчр бәәдлд күцәҗ, үнн-чик седклтәһәр көдлсиг таңһчин Толһач темдгләд, эднд ханлтан өргв.
Барт белдснь ДООҖАН Наталья

Видео