Төрскән харсачнрин санлынь тевчҗ

27-04-2024, 15:02 | Таңһчин зәңгс » Сойл

Мөрн сарин 24-д Әрәсәд Алдр Диилврин өдр угтҗ «Георгиевская ленточка» нертә Цугәрәсән керг эклв. Җил болһн Диилврин өдрин өмн өргнд, орн-нутгин иргнмүд, ик-бичкн уга энүг хувцндан торһад зүүнә.
Төрскән харсгч Алдр дәәнд мана иргчин төлә әмнәсн хаһцсн өвкнрин санлынь тевчҗәдг темдг эн болҗана. Балһсдын уульнцар олн-әмтнд эн тасмиг волонтермуд бәрүлҗ өгнә.
Тодлхас, мана орн-нутгт эн акц түрүн болҗ 2005 җилд Алдр Диилврин 60 җилин өөнд нерәдҗ давулгдла. Хамгин түрүнд Москвад эн керг-үүлдвр бүрдәгдлә, терүнә йовудт 800 миңһн һар тасм әмтнд бәрүлҗ өггдсмн.
Эн өдрмүдт Элст балһсна уульнцсар таңһчин баһчудын бүрдәцсин элчнр болн волонтермуд хар болн оштл өңгтә тасмиг олн-әмтнд бәрүлҗ өгхмн. Энтн Төрскән харсгч Алдр дәәнә ветеранмудын санлынь бәәтхә, цергә шишлң керг-үүлдврин йовудт әмнәсн хаһцсн нег һазра мана улсин санлынь тевчҗәдг темдг болҗана гиҗ темдглх кергтә. «Георгиевская ленточка» акц хөн сарин 9 күртл давхмн. Тер мет «Мөңк полк» санлын өргн керг-үүлдвр эн җил әәмшг уга бәәдл тогтахин төлә нидн мет алс-зәәһин эв-арһар давулгдхмн.
ОЛЬДАН Цаһан

Видео