«Хойр җивр»

27-04-2024, 15:10 | Таңһчин зәңгс » Сойл

Шидр Ростов-на-Дону балһснд нүднә харань муурсн улсин Әрәсән олна ниицәнә (ВОС) седвәрәр «Хойр җивр» гидг марһан болв. Хальмг Таңһчас терүнд Элст балһснд бәәдг Казанцевихнә өрк-бүл орлцв. Байрта Михайловна болн Алексей Николаевич ханьцад, хөрн һар җилдән хамдан бәәнә.
ВОС-ин Хальмг Таңһчд үүлддг әңгин ахлачин нөкд Оруса Лидия Казанцевихнә өрк-бүлиг дахад, марһанд орлцхднь дөң-тусан күргв. Лидия Эренценовнан келсәр, марһан хойр өдртән болв, терүнд арвн өрк-бүл орлцв. Санкт-Петербург, Ярославль, Краснодар, Тюмень болн нань чигн балһсдын элчнр хоорндан марһлдҗ, хамдан олн зүсн даалһвр күцәв. Марһанд орлцачнр Ростов-на-Дону балһс һәәхч, бәәрн билгтнрин концерт хәләҗ, сул цаган сергмҗтәһәр давулснь эднд бас ончта болн байрта йовдл болв. Нүднә харань муурсн улсин Ростовск мүҗин олна ниицәнә бәәрнд болсн марһан байрин таалд давв, цуһар хоорндан таньлдҗ үр-иньгүд болҗ сән залһлда бәрв.
Марһанд орлцсн арвн өрк-бүл даалһвр күцәсн деерән цуглрсн улст таасгдҗ, тедниг билг-эрдмәрн болн эв-доварн авлх зөвтә бәәсмн. Юңгад гихлә хәләһәчнр таасгдсн өрк-бүлин төлә дууһан өгәд, марһана дииләчнриг йилһҗ авв. Мана таңһчас орлцсн Казанцевихнә өрк-бүл марһана ашар 3-ч орм эзлснь ик байр-бахмҗ үүдәв. Эдниг мөңгнә мөрәһәр ачлв. Байрта Михайловна болн Алексей Николаевич хөрн дөрвн җил хооран хамдан нүднә харань муурсн улсин бүрдәцд көдлҗәһәд таньлдсмн. Эдн Ангелина күүктә. Казанцевихнә өрк-бүл ниитә, нег-негән дөңнҗ, байр-зовлңган әдл хувалцҗ, җирһлин хаалһар хамдан йовна.
Эн марһанд орлцхин төлә буйнч седклтә улс дөңгән күргсиг Лидия Эренценовна темдглҗ, ханлтан өргв. Хальмг Таңһчин Улсин Хуралын Ахлачин дарук, КПРФ-ин региональн әңгин һардач Нуура Николай, «Детокс» эмнлһнә бүрдәц (Давана Владимир) болн «Гранд» лавк (Илюмжинә Татьяна), арһлач Арсен Гаджиев демән күргв.
БАТАН Сәәхлә
ЗУРГТ: Казанцевихнә өрк-бүл болн Оруса Лидия (тал дунднь)

Видео