Нөкцлт өргҗәд бәәнә

21-05-2024, 14:33 | Таңһчин зәңгс » Сурєуль-эрдм

Малд әм орулҗ эмнлһнә төрмүдт нерәдсн нарт-делкән хургт Хальмг ик сурһулин доцент Санл Маштыков орлцҗ, дамшлтарн хувалцҗ бооца батлв.
Одахн Санкт-Петербург балһснд малд әм орулҗ эмнлһнә төрмүдт нерәдсн нарт-делкән хойрдгч Animal Stem-2024 хург болв. Мал эмнлһнә шаңһа ик сурһулин ул деер эн салврин номтнрин Евразин негдлт хургиг бүрдәв. Энүнд регенеративн эмнлһнә салврин Әрәсән, Белоруссин, Индонезин, Ирана, Узбекистана болн нань чигн орн-нутгудын нүүрлгч номтнр, мал өсклһнә эдл-ахусин, заводмудын мал эмнлһнә эмчнр болн зоотехникчнр, Әрәсән субъектсин эн салврин заллтсин, онц эзнә клиникүдин элчнр, вузмудын болн СПО-н бүрдәцсин багшнр болн оютнр орлцв.
Ноха, мис болн герт бәрдг нань чигн малын, зоопаркд болн циркд бәрдг аһрусна болн мөрдин эмнлһиг өдгә цагин эв-арһар яһҗ күцәснә, әминь яһҗ аврсна тускар номтнр болн мергҗлтнр тоолврарн хувалцв. Малын гемәс гетллһнә болн терүг эмнлһнә ашнь үзүлгдв.
Мал эмндг мергҗлтнрин, регионмудын заллтсин болн сурһулин бүрдәцсин һардачнрин, шаңһа һардврин элчнрин төлә «төгрг ширән» сүүр бүрдәгдв. Әрәсән кесг регионмудт биотехнологий олзлдг өдгә цагин төвмүд тогталһна тускар энд күүндвр болв. Тиим кевәр мана орн-нутгт ховр аңгудын то хадһлҗ, теднә реабилитацин төлә сән таал тогтаҗ болхмн.
«Эн хургт чинртә кесг төр хәләгдв. Тер тоод регенерацин шин эв-арһ малын то икдүллһнә кергт ик нилчән күргәд бәәх, тернь нанд зөвәр таасгдв. Эн салврар бидн мана номин шинҗллтән гүүдүләд бәәхвидн. Эн туст орн-нутгин нүүрлгч номтнрла бидн туста нөкцлт делгрүлсн бәәнәвидн. Элстд болдг малын эмчнрин болн эн халхар үүлдг номтнрин керг-үүлдврмүд маднд хамгин шин эв-арһ өргнәр олзлх арһ өгчәнә», – гиҗ Хальмг ик сурһулин нерн деерәс нарт-делкән ик чинртә керг-үүлдврт орлцсн мал эмнлһнә тиңкмин һардачин үүл дааҗадг Санл Маштыков келв. Әрәсән малын эмчнрин недглтин Президент Сергей Середа болн ФГБОУ ДПО РАКО-н агробиотехнологин тиңкмин һардач Светлана Концевая эн кергт ик дөңгән күргҗәнә. Эднә шунлтта нилчәр ООО «НС-Рабиес» компаньла Хальмг ик сурһулин мергҗлтнр номин халхар нөкцлтхин туск бооца батлв. Түрүн хамцу төсвсин тоод темәдин эврә МСК-н банк тогталһна туск бооцан арабск орн-нутгудын үүрмүдлә батлгдв. Тиим кевәр Әрәсән регионмудла болн һазадын нутгудла Хальмг ик сурһулин номтнрин нөкцлт өргҗәд, мана таңһчин селәнә эдл-ахун делгрлтиг түргдүләд бәәхнь лавта.

ҖААХАН Бадм
Нөкцлт өргҗәд бәәнә

Видео