Сурһульчдан гүн медрл өгх күслтәһәр

2024 җилин таңһчин йилһән сән багшин өөдән нер зүүсн Элстин техническ лицейин багш Пюрбән Адьян тоолврарн хувалцв.

Эн җилин марһана йовуд ямаран болсна, цааранднь Әрәсән девсңд яһҗ орлцхар бәәхин тускар мана зәңгчлә болсн күүндврт Адьян Валериевич тодрхаһар келҗ өгв.
«Элстин марһан йир соньн болв. Тер кемд Әәдрхн, Орел, Белгород балһсдын, мана таңһчин билгтә багшнр Әрәсән марһана ашлгч девсңд орлцад, эврә дамшлтан мастер-классмудын йовудт үзүлв, түүнәс дала эв-арһ, бийдән кергтә тоот хоршаҗ авлав», – гиҗ Адьян Валериевич келв.
Әрәсән талдан кесг регионас ирсн күндтә гиичнр сурһульчнриг дасхлһна шин кесг эв-арһин тускар келҗ өгв. Күүкд шүүврән сәәнәр өгсн деерән багшнрас сән сурһмҗ авад, йоста иргнмүд болҗ өсх зөвтә, ик чинртә шиидвр батлдган дасч авхла ик туста болх гиҗ дамшлтарн хувалцсн күндтә гиичнр келснь тодлгдв.
Тер мет Адьян Валериевичд Элст балһсна болн таңһчин марһанд диилвр бәртхә гиһәд техническ лицейин багшнр дааврта керг-үүлдвр эклснә түрүн өдрәснь авн сүв-селвгәрн дөң болҗала, эднәс кесгнь урднь бас багшин марһанд орлцсмн. «Тиим кевәр бидн нег хамцул болад, хоорндан селвлцәд, дарани девсңд яһҗ үүлдхин тускар тоолврарн хувалцҗалавидн. Урднь би программистәр көдлҗәләв. Дәкәд сурһульд ирснә хөөн нанд багшин эрдм икәр таасгдад бәәв. Тегәд күүкдиг сурхһас бичә әәтн, энтн йир сән эрдм гиҗ баһчудт селвгән өгхәр седләв», – гиҗ багш тоолвран келнә.
Кесг җилин туршарт эн таңһчин эсвин багшнрин «Куб» олимпиадт диилвр бәрҗ йовна, урднь «Перспектива» сурһульд көдлҗ йовсна кемд чигн, ода чигн оньдин йилһрәд бәәнә. Цуг райодын эсвин багшнр тер дөрлдәнд орлцна, УДЕ-н эв-арһин методикиг делгрүллһнд тер марһан туслна. Тиим дашката даалһвр күцәлһнд Адьян Валериевич ик дамшлт хоршасн багш болдг. Олимпиадын дииләчнр болн призермүд сурһульчнрин төлә болдг марһасин жюрин тоод орна, шинҗләчнр болна.
«Адьян Валериевич мана техническ лицейд кесг җилдән көдлҗ йовна. 2024 җилин таңһчин марһанд диилвр бәрсн йовдл цуцрлтан уга мергҗлтән, медрлән өөдлүлҗ йовсна ашнь болҗана. Түүнә сурһульчнрнь Әрәсән болн таңһчин олимпиадмудт, эсвин нань чигн марһаст диилвр бәрнә. Сурһуль-эрдмин «Сириус» шаңһа төвд энүг дуудна, тер орн-нутгин талвңд кесг селгәнд көдлҗ дамшлтарн хувалцв, эврән чигн шин дамшлт хоршав, кесг региона сурһульчнриг дасхв. Ончта диилврләнь йөрәҗәнәвидн. Ода Әрәсән кемҗәнд бас күцәмҗ бәртхә гиҗ дурдҗанавидн»,– гиҗ лицейин һардач Танян Саглр келҗ йөрәв.
«Зәңгллһнә туст сурһульч болһн медрл хоршах зөвтә, тернь сурһульдан йовлһнла, спортар соньсмлһнла әдл юмн болҗана. Ирлцңгү кичәл делгрлт авад йовна. Зәңгиг эд-бод келһнә шин тоот өдр болһн һарч ирәд бәәнә, тегәд эн кичәлиг күццднь медҗ болхш. Эн кергт «Сириус», «Иннополис» төвмүд дөң болна, энд цәәлһвр авч, кичәлиг гүүнәр дасч болхмн. Иргчдән машидин, роботын чинрнь улм өсәд бәәх. Роботмуд нам багшин ормд көдлҗ чадх. Тиим болв чигн сурһульчнр багшла күүндҗ, сурвран өгч, медрлән хоршана, тер хәрлцәг юн чигн сольҗ чадшго гиҗ санҗанав. Мини сурһульчнр гүн медрлтә улс болтха гисн күслтәһәр көдлҗәнәв», – гиҗ Адьян Валериевич седклән келнә. Тиим дамшлтта багшт Әрәсән марһанд чигн йилһрх арһ учрхнь лавта, гисн иткл үүднә.

ТҮРВӘН Һуна