Таңһчин малчнр күцәмҗ бәрв

Хөн сарин 23-ас авн 25 күртл Дагестан Республикин Каспийск балһснд тохма хөөдин болн ямадын Әрәсән XXIV һәәхүл давв. Терүнд орн-нутгин 24 регионас, тер тоод Запорожск болн Херсонск мүҗсин, мал өсклһнә 60 һар эдл-ахус орлцв. Тер мет йосна элчнр, региональн АПК-н заллтсин һардачнр, номтнр болн малчнр керг-үүлдврт ирҗ дамшлтарн хувалцв. Һәәхүлд һучн һар тохма мал үзүлгдв.

Мана таңһчин йисн нүүрлгч эдл- аху тер һәәхүлд орлцсн болдг. Тедн дунд «Сарпа» АО, «Первомайский» СПК ПЗ, «28 Әәрмин» нертә тохма завод, «Черноземельский» АО ПЗ, «Агрофирма Пик Плюс» ООО, «Кировский» НАО ПЗ, «Баска» ООО, Ю.Гагаринә нертә СПК болн «Улан хөөч» АО ПЗ орлцв. Хальмгин эдл- ахус грозненск, сарпулин, сарпан, хальмг хүрсх, хар һазра меринос тохма хөөдиг һәәхүлд авч ирв.
Хальмг Таңһчин делегациг селәнә эдл-ахун министр Гаван Тимур һардв. Хар Һазра района «Первомайский» СПК-н ПЗ-н һардач, мал өсклһнд ик тәвцән орулсн, Хальмгин Баатр, ниднәк һәәхүлин дииләч Болдра Валерийд тугинь өргҗ керг-үүлдвриг секх зөв өггдв.
Каспийск балһсна «Анжи-Арена» нертә стадионд һәәхүл бүрдәгдсн билә. Әрәсән селәнә эдл-ахун министрин дарук Максим Увайдов, промышленностин болн хулд-гүүлгәнә министр Олег Бочаров, Дагестан Республикин залврин Ахлач Абдулмуслим Абдулмуслимов, хөд өсклһнә Келн-улсин ниицәнә һардач Харон Амерханов болн талдан гиичнр һәәхүл секлһнә байрт орлцв.
Таңһчин селәнә эдл-ахун министр Гаван Тимур һәәхүлин йовудт хөөнә ноос эд-бод келһнә төрәр болсн селвлцәнд орлцв. Тимур Сергеевич ирлцңгү илдкл кев.
– Эн җилд Хальмгин селәнә эдл-ахун министерств Әрәсән промышленностин болн хулд-гүүлгәнә министерствд шишлң бәрмт цаас илгәсн билә. Терүнд хөөнә ноос эд-бод кедг арһлачнрин то диглгдҗ, тер мет хальмг меринос тохма хөөдин ноос Сарпулин крайд йовулҗ чинринь шинҗллһнә тускар келгдв, – гиҗ Гаван Тимур цәәлһв.
Терүнәс нань селвлцәнә йовудт ноос эд-бод келһнд шаңһас йилһдг эв-арһсиг немҗ, талданар өгч болхиг таңһчин министр сурв.
Һәәхүлд орлцсн Дагестана толһач Сергей Меликов хальмг малчнрин көдлмшиг өөдәнәр үнлҗ, хам-хоша бәәдг мана регионмуд орн-нутгин АПК-н халхд тәвцән орулҗахинь онц темдглв.
Каспийск балһснд ирсн эдл-аху болһн эврә һәәхүлән соньнар, өвәрц кевәр бүрдәхәр шунв. Тохма хөөдән болн ямадан үзүлсн деерән региона сойлан, авг-бәрцән, келн-улсин хотан бас үзүлв. Селәнә эдл-ахун керг-үүлдврин йовудт болсн концертд регион болһна сойлын коллективс билг-эрдмәрн байрлулв.
Әрәсән һәәхүлин һурвдгч өдртнь ашнь диглгдв. Авъяст тохрсар, Хальмгин эдл-ахус олн медальмүдәр ачлгдҗ, нүүрләчнрин тоод орв. Арвн алтн, зурһан цаһан мөңгн болн хойр күрл медальмүдәр хальмг малчнр темдглгдв. Ут тоодан арвн нәәмн медаль эдн авч ирв. Тер мет Хар Һазра «Черноземельский» АО ПЗ һәәхүлин ашар һурвдгч орм эзлҗ, лауреатын нер зүүв.
– 2023 җилин һәәхүлд мет мана таңһчин эдл-ахус дәкнәс ончрҗ, күцәмҗ бәрәд ирснь нег һазра улсин төлә байр-бахмҗ болв. Мана фермермүдин күч-көлсинь чинртә һәәхүлд бас үнлснь темдгтә. Әрүн цаһан седкләсн тадниг йөрәҗ, цааранднь чигн мал өсклһнд болн таңһчин АПК-н делгрлтд тәвцән орулҗ йовтн, гиҗ селәнә эдл-ахун министр Гаван Тимур мана малчнрт ханмҗта үгмүдән келв.
КАРСАНА Евгения