Бичкн билгтнрт нерәдҗәнә

30-05-2024, 14:49 | Таңһчин зәңгс » Сойл

Манҗин Аркадин нертә Хальмг филармонь «Үүдәгч селгән. Җилин дөрвн цаг» гидг төсвиг күцәҗәнә. Үвлд, хаврт нерәдсн төсвсән күцәснә хөөн зуни төсвин тускар келҗ өгхәр филармоня үүдәгч баг «Калмыкия» РИА-д ирҗ, брифингд орлцв.
Филармоня художественн һардач Ольга Дедникова күүндвриг экләд, давсн цагин дотр күцәсн тоотан Келн-улсин театрин артистнрлә нөкцҗ күцәснә, эн төсвән бичкдүдин нарт-делкән өдрт нерәдҗәхин тускар келв. Бичкдүдт нерәдсн төсвин түүрвәч, дууч Инесса Месхишвилин келсәр, таңһчд билгтә бичкдүд олн. Тедниг билг-эрдмин делкәлә таньлдулхин төлә эн эрдмдән батрсн, күцәмҗ бәрсн артистнриг болн сойлын нань чигн үүлдәчнриг орлцулад, бичкдүдин байр кехәр бәәхән медүлв. Эн керг-үүлдврин режиссер Санҗ Пурсяков артистнрлә болн дуучнрла хамдан цуг тоотыг соньнар, бичкдүдт таасгддгар, билг-эрдмин үүлдәчнрлә соньн көтлвр белдҗәхин тускар келв.
Хальмг симфоническ оркестрин художественн һардач болн ах дирижер Мерген Настиновин келсәр, бичкдүдлә харһна гисн байрта йовдл болна. Теднә герлтсн нүдиг үзхлә, җивр урһсн болҗ, көгҗмин делкәд улм олн бичкн соңсачнриг орулх седкл үүднә. Тегәд бидн эн төсвиг ик дуртаһар белдҗәнәвидн гив.
Бичкдүдин нарт-делкән Өдрлә, Хальмг филармоньд бичкн хәләһәчнрин төлә соньн концерт болхмн.

ҖИРҺЛИН Кермн

Видео