Бичкдүдт төрскн кел дасхна

15-06-2024, 12:58 | Таңһчин зәңгс » Сурєуль-эрдм

Мана таңһчин хотл балһсна өмн үзгин районд 30-ч тойгта бичкдүдин сад олн дунд темдгтә. Яһад гихлә энд дару-дарунь соньн керг-үүлдвр бүрдәнә, бичкдүдт ик килмҗән өгнә, сурһмҗин хамгин шин эв-арһ олзлхар шунна.
Энд медрлтә сурһмҗлачнр көдлнә. Үлгүрнь , одахн Элст балһсна багшнрин негдлтин сүүрт «Сурһульд орад уга бичкдүдин хальмг кел ясрулхин төлә теднә өрк-бүллә нөкцлтин олзта-туста эв-арһ» гидг төрәр тодрха күүндвр болв. Эн сүүрт 30-ч тойгта садын немр сурһуль-эрдмин багш Байрта Тегесова илдкл кеҗ дамшлтарн хувалцв.
Яһад гихлә эн садт төрскн кел даслһнд онц оньган өгнә. «Ни-негн» гидг кружок манад үүлднә, энд келн-улсин багмудын бичкдүдлә бидн хальмг ду-би даснавидн, эк-эцкнрлә хамдан Цаһана болн Зулын байрла хамцу керг-үүлдвр бүрдәнәвидн, түүнд эрк биш бичкдүд орлцна.
Тиигҗ эк-эцкнриг, бичкдүдиг хальмг кел даслһнд орлцулнавидн. Эдн хамдан төрскн авъясин, сойлын тускар кесг тоот медҗ авна, тернь өрк-бүлмүдиг хамцулҗ, сурһмҗин нилчинь өөдлүлнә», – гиҗ Байрта Сергеевна келнә.
Цаһан Сарин байрла эдн Бурятин бичкдүдлә телеүзлин эв-арһар залһлда бәрнә, бичкдүд хальмг хувцан өмсәд, эврә садын тускар келҗ өгәд, билг-эрдмән үзүлнә. Садын психолог Татьяна Корнеева бас бурят улсин хувц өмсәд, Бурятин бичкдүдлә улм сән нөкцлт батруллһнд дөң болв, тер юңгад гихлә Татьяна Альбертовна эврән Бурятяс ирәд, Хальмг Таңһчд кесг җилдән бәәнә.
3-ч тойгта ах багд хальмг келнә багшнр Ольга Бузгуева болн Эльза Пюрбеева көдлнә. Эдн бас төрскн кел даслһна халхар ик дамшлт хоршасн мергҗлтнр болҗана, бичкдүдиг төрскн келәр соньмсулҗ чадна.
Талдан багмудт сурһмҗлачнр Татьяна Полоусова болн Анастасия Шатунова ахта үүдәгч кевәр көдлҗ, бичкдүдт бат медрл өгнә. «Садын көдләчнрин ик зунь кесг җилдән энд көдлҗәнә, хамцу үүлдврин ашнь чигн күцәмҗтә болна», - гиҗ эврәннь үүрмүдин тускар садын һардач Гиляна Убушаева келнә.
Ут турштан садт 12 баг бәәнә, 350 бичкн нааран орна, нам Элстин талдан райодас чигн әмтн күүкдән иигәрән авч ирнә. Яһад гихлә садт кергтән итклтә, бичкдүдт дурта мергҗлтнр көдлнә. Тер тоод медицинск эгч Юлия Харлаева бичкдүдин эрүл-мендинь бүрткнә, эк-эцкнрт селвгән өгнә.
Одахн 30-ч тойгта садт «Бадм цецг» нертә логопедическ багиг төгсәсн бичкдүдин асхн болв. Сурһмҗлачнр В.В. Сангаджиева, А.С. Шапунова, логопед В.А. Дагенова, тьютор Н.В. Боваева эдниг сурһульд белдлһнә кемд ик оньган өгв.
Йирдән Элстин 30-ч тойгта садт гемтә-шалтгта бичкдүдт ик килмҗән тусхаҗ, тедниг эрүл-менд бичкдүдлә хамдан өскч сән сурһмҗ өгнә. Садын тьютормуд болн нань чигн мергҗлтнр эн кергиг оньгасн алдхш. Тиигҗ ни-негн кевәр энд бичкдүд болн теднә сурһмҗлачнр бәәнә.
-Эн сад Элстин кемҗәһәрн хамгин ик садын негнь болҗана, өмн үзгин района бичкдүдин ик зунь нааран ирнә. Одахн сад 10 җилин өөнән темдглв. Эдн ик чинртә көдлмш күцәҗәнә, мана таңһчин иргчиг өскчәнә, цуцрлтан уга тер күцәҗәдг көдлмшнь сән йовудта болтха, - гиҗ Элст балһсна толһачин үүл дааҗадг Максим Сорокин садын көдләчнрлә болсн хаһрлтд келәд, эдниг йөрәв.
Тиигҗ көдлмшән сән чинртәһәр күцәҗ, бичкдүдиг өскч, олна үүлдврт шунмһаһар орлцҗ, эн садын көдләчнр олнд үлгүр болҗ йовна.
ТҮРВӘН Һуна
Зургт: Байрта Тегесова бичкдүдлә хальмг келнә кичәл давулҗана

Видео