Багшнриг болн сурһульчнриг медрлин Өдрлә йөрәв

Өцклдүр, һаха сарин 2-т, Элстин болн райодын сурһульмудт байрин хургуд болв. Эн өдр Элстин 4-ч тойгта сурһульд күндтә гиич болҗ, Хальмг Таңһчин Толһач Хаска Бату ирв. «Күндтә эк-эцкнр болн сурһульчнр, таниг цугтаһитн Медрлин өдрлә болн сурһулин шин җил эклснлә йөрәҗәнәв. Тадн зуни сармудт сәәнәр амрад, ода сәәнәр сурхит, гиҗ санҗанав. Тадн кесг шин тоот медҗ авхит болн кесг соньн керг-үүлдврән күцәхит. Оньдин тиим шунлтта улс болҗ өстн.
Тадниг амрчасн кемлә бидн, тана эк-эцкнр болн тана багшнр, сурһулин шин җилд белдҗәләвидн. Тадн шин җилд улм сән таалд сурхин төлә бидн кесг тоотыг күцәләвидн.
Мана таңһч йир сәәхн, зөөрнь ик регион болҗана, гиҗ ода бат ицлтәһәр келҗ болҗана, түүнә ханьд орҗах кесг тоотыг илдкҗ, хөвтә-кишгтә җирһл тосхх зөвтәвидн, кесг келн-улс энд ни-негн бәәнә, мана олн улсин нилчәр күцәмҗд күрх зөвтәвидн.
Эн туст маднд шаңһа йосн, Әрәсән Президент Владимир Путин, орн-нутгин залвр дөң болҗана. Бидн сурһульмудт бат ясвр кеһәд, сурһульчнрин төлә шин гермүд тосхчанавидн. Дарук җиләс авн бичкдүдин садмудт болн колледжмүдт бат ясвр эклхмн. Бидн мана багшнрин күч-көлснә таалыг ясрулҗанавидн, эднә күндтә неринь цааранднь өөдлүлҗәнәвидн. Баһ наста багшнр селәдт көдлҗәхнь намаг байрлулҗана», - гиҗ Бату Сергеевич темдглв.
Тер мет таңһчин прокурор Виталий Семенченко сурһульчнриг йөрәҗ, 4-ч тойгта сурһульд таңһчд түрүн болҗ прокурорин класс секгдҗәхин тускар келв. Энд прокуратурин көдләчнр болн Хальмг ик сурһулин багшнр арвтнрт медрл заах, зөв-йосна халхин көдлмшлә таньлдулх.
Цааранднь сурһулин һардач Очрһәрән Елена йөрәлин үг келәд, сурһульчнртан күцәмҗ дурдв. Ода энд 1060 сурһульч сурна, кесг төгсәһәчнрнь орн-нутгин нертә ик сурһульмудт орв. Дәкәд байрин хургт олн үртә өрк-бүлмүдиг йөрәв, тер тоод 9 үрән өскчәдг Нимеевихнә бүлиг йөрәҗ магтв. Дарунь уйн наста биичнр билг-эрдмән үзүлв, негдгч классин бичкдүд шүлгүдән келҗ өгәд, ах классмудын сурһульчнрла хамдан сурһулин герт орв.
Эн өдр таңһчин Толһач Хаска Бату Элстин 2-ч сурһульд бас одад, бат ясвр энд яһҗ күцәгдсинь хәләһәд, багшнриг болн сурһульчнриг Медрлин өдрлә йөрәв.
ТҮРВӘН Һуна