Бурхн Багштан көгҗмин белг

Хальмг Таңһчин сойлын болн оюни җирһлд ончта нег йовдл сән авъяс болҗ батрҗана. Тернь бурхн-шаҗна һурвн эрдньд нерәдсн көгҗмин белг. Таңһчд эн керг-үүлдвр зурһадгч кемдән кегдхмн. Һаха сарин 21-д Элстд Хальмгин көгҗмчнр, артистнр, дуучнр болн эврә сән дурар орлцх олн улс негдәд, көгҗмин дееҗән бурхн-шаҗнд нерәдхмн.

Сойлын болн шаҗна җирһлд ик чинртә йовдл болдг эн үүлдврин тускар Хальмгин Шаҗн Лам Тензин Чойдак болн эн керг-үүлдврин ах режиссер болн бүрдәһәчин негнь болгч Катан Саврла күүндвр кев.
Чинртә эн йовдлд белдлһнә тускар харһлтд келгдв. Ах дирижер Катан Саврин келсәр, эн керг-үүлдврт орлцх улсин то икдәд йовна. Урднь чигн әмтн ик дуртаһар эн үүлдврт ирҗ орлцҗала. Медәтә улс, баһчуд, бичкдүд чигн орлцх седклән медүлҗәнә. Көгҗмин зевсг татдг улсин то тиигәд икдҗәнә.
Олн орлцата ик оркестрин ханьд профессиональн коллективс, көгҗмин сурһулин сурһульчнр, эрк биш көгҗмиг татхмн.
«Көгҗмд дурта, шаҗндан шүтдг, насарн әдл биш, болв төрскнч седклтә олн улсиг негдүлҗәх иим төсв бәәхнь сән йовдл – гиҗ Хальмгин Шаҗн Лам Тензин Чойдак тоолврарн хувалцна. - Иим йовдл шагшавдын чик хәләцтә болдгиг дасхсн деерән эн төсв келн-улсин көгҗмин зевсгүд олн дунд тархалһнд, баһчудыг көгҗм татдгиг дасхлһнд туста болҗана. Келн-улсин сойлын делгрлтд болн бурхн-шаҗан өргҗүлҗ авлһнд туста төсвин хаалһнь болтха. Бурхн Багштан болн терүнә ном-сурһульд, шаҗна һурвн эрдньд тиигҗ көгҗмин дееҗәс нерәдлһн цуг улсин болн әмтә тоотын җирһлд йир туста болхнь маһд уга».
Иргчдән иим үүлдвр келһнә тускар эн күүнвдрт келгдв. Ирх 2025 җилд Хальмгт шар шаҗна чуулһн болх кемд Хальмгин көгҗмчнрин эн төсвиг гиичнрт үзүлх төр тәвгдв. Таңһчин 1000 көгҗмчнр тер ик чинртә керг-үүлдврт орлцх гиҗ зуралгдҗана.

УШКАНА Сувсн