Һартан өөтә багш

15-10-2024, 10:12 | Таңһчин зәңгс » Сойл

Эн зунар Лаганя районд болсн бадм цецгин наадмд бәәрн урчнр олн зүсн кегдлмүдиннь һәәхүл олна оньгт тусхасн билә. «Лаганя урчнр» гидг һәәхүлд Валентина Шкуратован ке-сәәхн кегдлмүд олн гиичнрин оньг авлв. Бидн чигн Валентина Михайловнала таньлдад, тааста кергәрнь соньмсвидн.

- Би Э.Джамбиновин нертә 4-ч тойгта Лаганя дунд сурһульд технологин багшар хөрн һар җилдән көдлҗәнәв. Урднь бичкдүдт ИЗО-н кичәл давулдг биләв, цаг зуур социальн багш чигн биләв. Сул цагтан үүл бәрҗ, олн зүсн өңгтә тасм, ноос, утц олзлҗ кегдлмүд кехдән, хатхмр хатхдан дуртав. Тегәд медсән бичкдүдт зааҗ, эднә билг-эрдм делгрүлх күслтәһәр технологин багш болҗ көдлхәр шиидв. Күүкд үүл бәрхдән таасна, өгсн даалһврар сәәхн кегдлмүд кеҗ, цаган тустаһар давулхар шунна. Ода үүл бәрдг улсин төлә олн зүсн тоот хулдгдна, тегәд бидн сурһульчнртаһан терүг бичүлҗ авнавидн. Үлгүрнь ода белн зургуд хулдгдна, терүг хөөннь олн зүсн утц болн тасм олзлҗ кеерүлх кергтә. Тиим зург хулдҗ авад, бидн үүл бәрнәвидн. Хөөннь кегдлмүдиг кеерүләд, ямр нег марһаст орлцнавидн, ирсн гиичнрт белглнәвидн, – гиҗ Валентина Михайловна келнә.
6-ч класст сурчадг күүкд түрүләд амр кегдлмүд кедгиг дасна. Тиигәд эдн олн зүсн тасм олзлад, бамб цецгүд хатхҗ сәәхн зургуд кенә. Тасмар кесг бичкн-бичкн үүрмг кегдл кеҗ белдәд, хөөннь тедниг баглад нүд авлгч цецгүд кенә. «Лаганя урчнр» гидг һәәхүлд хальмг күүкнә дүр, олн зүсн цецгүд, ке-сәәхн хальмг тег, мөрд болн нань чигн зург үзүлгдв. Эврәннь сурһульчнриннь кегдлмүдиг багш олна оньгт тусхаҗ, эднә күцәмҗин тускар келҗ өгв. Келхд, давсн җилин үкр сарас авн эн зун күртл Москвад «Әрәсә» гидг һәәхүлд эднә кегдлмүд һурв дәкҗ үзүлгдсн билә. Хальмг Таңһчин һәәхүл хәләхәр ирсн олн-әмтн бичкдүдин болн Валентина Шкуратован билг-эрдмиг өөдәнәр үнлв.
Валентина Михайловнан келсәр, бичкдүд үүл бәрҗ һарин эрдмән делгрүлҗәхнь эднд туста болна. Кесгнь билг-эрдмән делгрүлҗ, багшасн деер ке-сәәхн кегдлмүд кедг болна. Эдн үүрмүдтән болн өөрхн улстан эврәннь һарарн кесн кегдлмүд белглнә. Секдлән тәвәд һарарн кесн белг хойр дам үнтә болдгнь маһд уга.

БАТАН Сәәхлә
ЗУРГТ: Э.Джамбиновин нертә 4-ч тойгта Лаганя дунд сурһулин технологин багш Валентина Шкуратова сурһульчнриннь үүдәврмүд үзүлҗәнә

Видео