Китд орн-нутгла нөкцлт өргҗәд йовна

Вчера, 09:16 | Таңһчин зәңгс » Сурєуль-эрдм

Одахн Элстд Хальмг ик сурһулин номин дегтрин саңд Китд Улсин Республик бүрдснә 75 җилин өөнд нерәдсн арвн хонгин ашиг дигллһнә керг-үүлдвр болв. «75 җилдән хамдан: Китдин сойлын болн тууҗин зөөрлә таньлдҗ зуулльчлһн» гиҗ эн нерәдгдлә. Арвн хонгт шунмһаһар орлцсн оютнриг болн сурһульчнриг энд ачлв. Конфуцийин нертә күрәлңгин болн һазадын орна келнә, сойлын хоорндк зәңгллһнә болн регионоведеня тиңкмин бүрдәсн марһасин ашнь бас энүнә йовудт диглгдв.
Тер мет арвн хонгин эргцд талдан чигн керг-үүлдвр күцәгдлә, тер тоод цигун болн тайцзи гимнастикин мастер-класс, китд шүлгләнә орчулврин марһан болв. Китд кел дасчах оютнр дунд «Иньгллтин тагтс» гидг марһан бүрдәгдв. Конфуцийин нертә күрәлңгин соңсачнр дунд болхла олимпиад болв, дәкәд болхла эдн «Китд мини балһснд» гидг нертә марһанд медрлән сөрв. Тер мет «Искусство восточного пера» гидг Цугәрәсән марһанд эдн сән белдврән үзүлв.
Тиим кевәр ашлгч керг-үүлдвриг Конфуцийин нертә күрләңгин һардач Адьяна Заяна болн тиңкмин һардач Алжен Марина байрин бәәдлд секч цуг орлцачнриг ончта өөнлә болн марһаст бәрсн күцәмҗлә йөрәв. Тер тоод китд кел болн сойлын зөөр даслһна кергт заасн марһаст онц күцәмҗ бәрсн сурһульчнр дипломсар болн белгүдәр ачлгдв.
Эн байрин хургт тер мет Китдин Шинҗәнәс, Шаньдун болн Ганьсу мүҗәс болн Өвр Моңһлас ирсн оютнр орлцв, эдн мана иньгллт өсәд-өргҗәд бәәхиг дәкн нег иткүлв. Китд оютнр сойлын көтлвр белдлһнд шунлттаһар орлцв, тиим хамцу көдлмшин йовудт оютнр дамшлтарн болн медрләрн хувалцҗ нөкцлтән батрулв.
- Китд кел дасчах мана оютнр болн Конфуцийин нертә күрәлңгин соңсачнр, тер тоод Элстин сурһульчнр Китд орн-нутгин тууҗар соньмсч, Әрәсән болн Китдин хоорндк иньгллтиг батруллһнд эврә нилчән күргҗәнә. Орн-нутгин өөнд нерәдсн арвн хонгт эдн цугтан шунмһаһар орлцҗ, эврә медрлән гүүдүлхәр седв.
Тер мет Китдин Өвр Моңһлын ик сурһулин һардврин дөңгәр Хальмг ик сурһульд Конфуцийин күрәлң кесг җилин туршарт үүлдҗәнә, мана таңһчин әмтнә төлә кесг керг-үүлдвр китд халхин һардвр бүрдәнә, – гиҗ күрәлңгин һардач Адьяна Заяна келв. – Академическ сольлцана зокалар Өвр Моңһлын ик сурһулин багшнр Элстүр ирҗ, мана оютнрт китд кел дасхна, хальмг багшнр болхла, Китд тал одад тенд орс кел заана.
Энүнә келсәр, Хальмг ик сурһульд оютнр өргнәр китд кел дасчана, Өвр Моңһл тал болн Китдин нань чигн вузмудт дамшуллһнд одна, тенд китд кел улм гүүнәр дасна. Тиим үүлдвр оютнрт икәр таасгдна. Тегәд нам талдан эрдм дасчах оютнр Конфуцийин күрәлңд ирҗ китд кел дасна. Күрәлңгин китд һардвр улм икәр кел даслһнд орлцулхар седнә, Элстин сурһульмудт чигн китд кел дасна, тенд Хальмг ик сурһулиг төгсәсн мергҗлтнр көдлнә.
Тер мет кесг компаня ханьд орчулачнр болн дааврта нань чигн көдләчнр болҗ, Хальмг ик сурһулин төгсәһәчнр көдлнә, тиим кевәр эдн хальмг вузин залһлдаг кесг бүрдәцлә өргҗүләд бәәнә, Китдин болн Әрәсән иньгллт батруллһнд нилчән күргҗәнә.
ТҮРВӘН Һуна
Зургт: тиңкмин һардач
Алжен Марина Кибенә Джалсанад ачлвр бәрүлв

Видео