Медәтнрт килмҗән тусхана

22-10-2024, 10:14 | Таңһчин зәңгс » Эрўл-менд харлһн

Өнчн-өвү, гемтә-шалтгта, җирһлин күнд таалд туссн улст, бичкдүдт болн медәтнрт цаһан седкләсн демән күргдг, килмҗән тусхаҗ эднә төрмүдт орлцдг әмтнд тернь эрк биш ик буйн болх гиҗ тоолгдна. Мана таңһчд өнчн медәтнрин болн эрмдгтә улсин гер-интернатд бәәдг улст дөңгән күргдг әмтн баһ биш. Эдн ямр нег керг-үүлдвр давулхд дем күргнә, әмтәхн хот-хол, хувц чигн авч ирнә. Баһ Дөрвдә өнчн медәтнрин болн эрмдгтә улсин гер-интернатд дөңгән күргдг улс бас бәәнә. Теднә негнь Цевгә Антонина болна.

Гер-интернатын һардач Манҗин Людмилан келсәр, Антонина Мутляевна долан хонг болһн бембә өдрлә медәтнрт һуйрар кесн әмтәхн кегдлмүд илгәнә. Күүкд күн бийнь Элст балһснд бәәнә, зуг Октябрьск района Ик Царң селәнд арһлач болҗ үүлднә. Тенд бәәдг кафед бәәрн әмтн өөнин, хүрмин нәр кенә, үр-иньгүдин болн элгн-садна харһлтс давулна. Нег дәкҗ эн көвүтәһән күүндәд, өнчн болн эрмдгтә медәтнрин төлә буйнч седклин керг бүрдәх санан бәәхин тускар хувалцв. Баһ Дөрвдә гер-интернатд энүнә төрскн Цаһан Нур селәнәс медәт бәәхинь соңсад, эн социальн бүрдәцд дөң күргхәр шиидснь тер. Гер-интернатын замчнр сенр болн шимтә хот-хол болһна, һуйрин кегдлмүд чигн бас кенә. Болв амрлһна өдрмүдт Антонина Мутляевнан илгәсн һуйрин кегдлмүд авч ирхинь күләһәд, цәәһән ууҗ күүкд күүнд бат эрүл-менд дурдна.
- Би Цаһан Нур селәнд өсәд-бослав, ода өрк-бүлтәһән Элстд бәәнәв. Эцкм, Муутл Лакович Борлыков, олн җилин туршарт төрскн Цаһан Нур селәндән малч болҗ көдлҗ йовла. Һундл төрхд, эцкм арвн һар җил хооран сәәһән хәәв. Экм, Зоя Эрендженовна Эняева йиртә, баһ цагтан уячар көдлҗ йовла. Ахнр-дүүнрәрн дөрвн күн болнавидн, экән арднь орҗ сәәнәр хәләнәвидн, олн ачнр-зеенрнь эңкр ээҗдән йир дурта. Зәрм медәтнр олн зүсн учрар социальн бүрдәцд бәәнә, эдн өөрхн улсин хәләвр уга үлдсмн. Баһ Дөрвдә гер-интернатд нег һазра көгшн ээҗ бәәхнь соңсад, килмҗән тусхадг болвидн. Ик Царң селәнд үүлддг арһлач Арвһан Борис өдмг болн һуйрин кегдлмүд кеҗ һарһна, тегәд терүнлә үгцәд, гер-интернатд долан хонг болһн эднә эдл-ууш йовулнавидн. Эн зунар дәкәд медәтнрт 60 башмг белглсн биләв. Ода дулан альчурмуд белдәд, бас удл уга күргх санатав. Урднь нанд хувц-хунрин лавк билә, тенд эс хулдгдсн олн зүсн хуцвн бәәнә, тегәд терүг шинҗләд хәләһәд, бас медәтнрт кергтә киилг, бүшмүд белглх санан бәәнә, - гиҗ Антонина Мутляевна келнә.
Өнчн медәтнрт буйнч седкләсн дөңгән күргҗәдг арһлачин тускар гер-интернатын һардач Манҗин Людмила бүләнәр келҗ, ик ханлтан өргв. Антонина Мутляевна энүнә тускар бичхәр бәәхинь медчкәд, эмәһәд бәәв. Эднә өнр-өсклң өрк-бүлд эк-эцкнь күүкдән кен ахан күндлдг, бичкнән өкәрлҗ таалулдг авъясар сурһдг бәәсмн. Зоя Эрендженовна шимтә хот, әмтәхн боорцг болһдг бәәсмн, күүкднь үүрмүдән дахулад орҗ ирхлә, цугтаһинь тооһад, бәәсәрн хувалцдг билә. Эк-эцкәсн сән үлгүр авч, дөрвн үрнь өглһнә эзн болҗ, талдан улст сана зовҗ, мел дөң болхар шундг улс болҗ өсв. Антонина Мутляевнан авальнь болн хойр көвүнь энүнә буйнч седклтә кергиг дөңнҗ, медәтнрт килмҗ тусхаҗ белг өгүлхләнь бас демән күргнә.
- Мана гер-интернатд дөңгән күргдг цуг улст бидн зүркни ханлтан өргҗәнәвидн. Баһ Дөрвд селәнд бәәдг Пашкан Владимир ямаран дөң кергтә болҗахин тускар сурна. Эн кесг фильмд орлцсмн, тегәд маднд цергә 5 киилг авч ирсн билә, бидн терүг Алдр Диилврин байрт нерәдгдсн керг-үүлдврмүдт өмснәвидн. Дәкәд Владимир Евгеньевич залу күүнә 5 костюм белглв. Нег һазра улс сән өдрмүдин байр угтҗ мах, шикр-балта авч ирнә. Эдн цаһан седкләсн шаңһа бүрдәцд бәәдг медәтнрт дөңгән күргҗ, тиим кевәр килмҗән тусхана. Мана медәтнр белг авхларн байрлна, эднә йөрәлин үг буйнч седклтә улст эрк биш күрнә, - гиҗ Людмила Александровна келнә.

ДООҖАН Наталья
ЗУРГТ: гер-интернатд бәәдг медәтнр

Видео