Ханума – 100 дәкҗ үзүлгдҗәнә

29-10-2024, 12:56 | Таңһчин зәңгс » Сойл

Драмин болн шог наадна орс театр көдлмшән экләд, 34-ч театральн җилән «Ханума» наадар секв. Олн хәләһәчнрин тааслт олсн, кесг үйин артистнр терүнд орлцҗ, билг-эрдмән үзүлсн «Ханума» наадн зу дәкч театрин тәәз деер үзүлгдҗәнә.

Наадна өмн театр хәләһәчнрән тосч авад, артистнр дүрин хувцтаһан шог зурцс үзүләд, ирсн әмтиг тоов. Сергмҗ үүдәсн эн йовдл театрин репертуарт олн җил орман олҗ батрсн наадыг хәләхд сән таал тогтав.
Эн наадн яһҗ белдгдснә тускар, театрин репертуарт орад, олн җилин туршарт хәләһәчнриг байрлулҗ йовхин тускар, артистнрт чигн наадн таасгддгин тускар театрин үүлдәчнр ирсн әмтнд келҗ өгв.
Йошкар-Ола балһснас илгәгдсн видео хәләһәд, наадн түрүн болҗ үзүлгдсн үүмәтә кемиг тодлв. Тер видеод Хануман дүриг түрүн болҗ наадсн артистк, Хальмг Таңһчин ачта артистк Людмила Мансурова тодлгдснь ик соньмслт үүдәв. Эн сезонд шин кесг наад белдх зура театрт бәәнә. Дәкәд болхла, гастрольмудт эдн йовхмн. Келхәс, «Мост дружбы» гидг фестивальд орлцад, театрин коллектив Марий Эл республикд билгән үзүлхмн.
Бичкн хәләһәчнртән нерәдәд, Орс театр ноябрь сард «Золушка» гидг наадыг белдв. Ф. Достоевскин «Преступление и наказание» романар тәвгдҗәх «ПиН. Эпизоды» гидг наадн чигн олн хәләһәчнрт таасгдхнь маһд уга.
Драмин болн шог наадна таңһчин Орс театр сезонан эклв, театрт ирҗ шин наадд хәләтн.

ҖИРҺЛИН Кермн

Видео