Цергчнриг көдлмшәр теткхәр

Вчера, 10:17 | Общество, Таңһчин зәңгс, Зіњг, Селәнә эдл-аху

«Негдсн Әрәсә» парть әмтиг көдлмшәр тетклһнә, баһ наста улст эрдм шүүҗ авхд туслһна, мергҗлт өөдлүлһнә төр хаһлхин төлә «Моя карьера с Единой Россией» гидг төсв бәәдл-җирһлд тохраҗана.

Эн төсвин медлд эн җилин йисн сарин эргцд 47 миңһн керг-үүлдвр күцәгдв, терүнд сай һар күн орлцв, 200 миңһн күн көдлмшәр теткгдв. Әрәсән Орн-нутгин Хүүвд «Негдсн Әрәсә» партин әңгин һардачин дарук Андрей Исаевин темдглсәр, эн төсвин халхар цергә шишлң керг-үүлдврт орлцачнрт болн эднә өрк-бүлд көдлмш олҗ авхд дөң күрглһнә керг-үүлдврмүд онц орм эзлнә. «Эн җилин эклцәс авн орн-нутгин регионмудт цергчнрин болн эднә өрк-бүлмүдин төлә күсдундур керг-үүлдвр бүрдәгдв. Регион болһнд цергә шишлң керг-үүлдврт орлцачнриг көдлмшәр теткхдән белн бәәх бүрдәцсин то-диг батлгдв», гиҗ Андрей Исаев келв.
Әрәсән күч-көлснә болн социальн харслтын министрин дарук Дмитрий Платыгинә зәңглсәр, мана орн-нутгт 2028 җилин чилгч күртл 2300 көдлмшәр тетклһнә төвин үүлдвр ясрулгдхмн. «Кадры» гидг шин келн-улсин төсв партин көтлврин медлд күцәгдҗәх керг-үүлдврмүдлә диглгдәд, көдлмш хәәҗәх улст туслх. Әрәсән күч-көлснә болн социальн харслтын министерств шишлң мергҗлтнриг белдәд, партин әңгүдт ирдг улст көдлмш олҗ авхд эс гиҗ шин эрдм дасхд дөңгән күргхмн гиҗ зуралгдҗана. Эн җилин эклцәс авн мана орн-нутгт көдлмшәр тетклһнә цергллтс СВО-д орлцсн тавн миңһн һар күүнд 16 миңһн туслмҗ күргв.
«Моя карьера с Единой Россией» гидг төсвин медлд әмтн шин эрдм дасхар, мергҗлтән өөдлүлхәр шундгнь темдгтә. Мана таңһчд цергә керг-үүлдврт орлцачнрт көдлмш олҗ авлһнд дөң күрглһн эркн чинртә болна. Таңһчин әмтиг көдлмшәр тетклһнә цергллтс цергә шишлң керг-үүлдврин ветеранмудт болн орлцачнрт цуг халхин дөң күргҗ, эднд талдан көдлмш олҗ авхд, немр сурһуль сурхд туслна. Тиигәд, эн җилин эклцәс авн мана таңһчд 6 цергч көдлмшт орв, 10 күн шин эрдм дасв.
Хальмг Таңһчин залврин Ахлачин дарукин-таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан келсәр, әмтиг көдлмшәр тетклһнә цергллтсин мергҗлтнр цергчнрт көдлмшт һархд, шин эрдм дасхд дөңгән күргҗ, эдниг соньмсулҗах төрмүдәр цәәлһвр өгч, сүв-селвгәрн хувалцна. Мана цергллтсин хайгар ирсн СВО-н ветернамудт бидн килмҗән тусхаҗ, эднә соньмслтынь болн ямаран эрдмәр көдлмҗ чадхинь учртан авч дөң болх зөвтәвидн гиҗ Марина Петровна темдглв. Тиигәд, сар хооран Баһ Дөрвдә района әмтиг көдлмшәр тетклһнә цергллтин дөң-тусар хойр цергч көдлмш олҗ авв. Эдн ода малчнр болҗ көдлҗәнә. Константин Водопьянов болн Җирһлин Эрднь цергә шишлң керг-үүлдврт орлцад, даалһвран үнн кевәр күцәҗ хәрҗ ирв. Эднд көдлмш олҗ авхд дөң күргсн деерән психологическ болн социальн туслмҗ күрггдв. Константин Водопьянов ода малд көдлҗәнә, дәкәд котельнян операторин немр эрдм дасв. Бийнь эн тоочин эрдмтә, Октябрьск района муниципальн бүрдәцд күч-көлснә хаалһан эклсмн. Цергә шишлң керг-үүлдврт эврә сән дурар орлцад, харулын әңгин командир болад, бу-селмиг болн объектсиг бүрн-бүтн хадһллһна теткврин даалһвриг ик даавртаһар күцәсмн. Залу-зөрмгән үзүлсн төләдән шаңһа ачлврмудар ачлгдсмн. Шав авсна хөөн эн цергәс бууҗ ирәд, әмтиг көдлмшәр тетклһнә цергллтин дөңгәр көдлмшт һарв.

ДООҖАН Наталья
ЗУРГТ: цергә шишлң керг-үүлдврт орлцач Константин Водопьянов ода малд көдлҗәнә

Видео