Эднә билгтә үг уралан көтлҗ йовла

Җирдгч җилмүдин чилгчәр «Хальмг үнн» газетд намаг ирҗ көдлхд медрлтә, билгтә, көдлмшән юмна түрүнд тәвдг ах үүрмүд көдлҗәлә. Теднә кень чигн байн дамшлтта, келнә өвәрц билгтә, үгдән мергн билә. Теднә өөр бәәһәд, бичсинь умшад, күчрдсн цагт заавринь авад көдлҗ йовсн кемиг тодлулхар эн цөөкн мөр бичгдҗәнә.
Улан герин хойрдгч давхрт давшад орҗ ирхлә, намаг редакторин дарук Саңһҗин Басң тал йовулв. Орчултха гиһәд нанд даалһвр өглә. Маңһдуртнь бичсн тоотан авч ирхлә, адһм угаһар умшад, козлдуран тәәләд, нанур оньган өгч хәләһәд, көдлмшт авчахан медүлв.
Тиигәд «Хальмг үннд» мини көдлмш экллә. Инҗин Лиҗ, Дорҗин Басң, Үлмҗин Лиҗ, Манцинә Евдокия, Семена Антонина, Ильҗрңгә Эрднь, Босхмҗин Дорҗ болн нань чигн ветеранмуд тиигхд маднд үлгүр болҗ йовла, барин халхин көдлмшт орулла. Газетин келн җил ирвәс ясрхд, энүнә халхст соньн олн материалмуд һархд ах үйин седкүлчнрин ик тәвц бәәнә. Таңһчд болҗасн цуг хүврлтсин тускар, таңһчан туурулҗадг күч-көлсчнрин тускар, шин тоотыг ухалҗ һарһсн номтнрин тускар, нань чигн тоотын тускар эдн даңгин бичҗ йовла. Эднә бичсн тоот «Хальмг үнн» газетин кеерүл болсн деерән олн умшачнрин оньгиг эзлдг билә. Таңһчин райодар эднә нердиг мана газет умшдг әмтн сән меддг бәәсмн. Селәнә эдл-ахун төрәр бичдг Үлмҗин Лиҗин статьясиг хотн болһнд меддг билә. Дәәнә ветеран бәәсинь, офицер Үлмҗин Лиҗ хортнас сулдхсна балһснд комендант болҗ үүлдсинь хөөннь медҗ бичсн биләв. Тиим һольшг күн билә. Дәәнә ветеранмуд Җамбин Ярослав, Җимбин Андрей, Бакан Бембет, Босхмҗин Дорҗ, Бембин Һуча – эдн зуг Диилврин өдрлә дәәч ачлвран зүүдг бәәснь тодлгдна. Эднә бичсн очерксиг болн келврмүдиг умшачнр таасч умшдг, тер газетмүдиг хадһлдг бәәсмн.
Кедү олн кү эдн сурһсн болх. Эднә ардас дахлдн Сиврт өсч-боссн, тууврин хөөн ик сурһуль дассн баһчуд редакцин зергләнд орла.
Хойр күүкд күн – Манцинә Евдокия болн Семена Антонина седкүлчнр болҗ көдлҗәлә. Негнь сойлын төрәр бичдг, наадкнь партин җирһлин әңгд көдлдг мөн. Ильҗрңгә Эрднь газетин халхст материалмудыг яһҗ диглҗ тәвдгинь дасхла. Промышленностин әңгиг Бадм-Һәрән Эрднь-Һәрә һардҗ йовла.
Таңһчд болҗасн йовдлмудыг үзүлсн деерән орн-нутгт болдг соньн тоотыг, һазадын орнас ирҗәдг зәңгсиг газетдән орулдг биләвидн. Мана тер цага «Хальмг үнн» газетиг умшсн улс моһлцг һазр деер юн болҗасинь меддмн. Цуг тер зәңгсиг белддг орчуллһна әңг газетд билә. Терүнд Бадмин Дулахн болн Павла Цаһан көдлҗәлә. Һазадын нутгудт юн болҗахин туск зәңгсиг белддг Дулахн Аршиевичиг бидн хоорндан «Бангладеш» гиҗ шоглҗ дууддг биләвидн. Телетайпар ирҗәсн зәңгсиг авад, умшад тер дарунь машинкд цокад барлад һарһчкдг Цаһан Гавировна тиим эрдмтә бәәсмн. Иигәд ах үүрмүдәсн дасад, зәңгсис телетайпас авч ирхләнь, хоорндан хуваһад машинисткин өөр сууһад тер дарунь орчулад бәәдгиг даславидн. Ямаран чигн статьяс ирвчн хамдан сууһад, орчулад, умшад, чиклвринь ясад, талдан газетмүдәс ард үлдлго һардг биләвидн. Цуг тер дасмҗиг, хамдан көдлдгиг, кен-негндән дөң болдгиг ах үүрмүд маднд дасхла. Эднә кенәннь чигн тускар онц дегтр бичҗ болхмн. Таңһчиннь җирһлиг эдн бичсндән мөңкрүлсмн. Эндр Хальмг барин көдләчнрин
Өдрлә бидн теднә нердиг сергәҗ, газетин делгрлтд, хальмг келиг өргҗүллһнд орулсн ик ач-тусинь темдглҗ күндлҗәнәвидн.

ХӨӨЧИН Галина