Иргчдән таңһчиг делгрүлх оютнр

Давсн үлмҗ өдрлә Элстд Хальмг ик сурһулин – йилһән сәәнәр сурдг оютнрин орлцлһтаһар ик хург болв. «Хальмг ик сурһулин нүүрләчнр - таңһчин иргч» - гиҗ энүг нерәдв.
- Сүл җилмүдт Хальмг ик сурһулин оютнр болн багшнр ик күцәмҗд күрв – эдн орн-нутгин йилһән сән гисн 100 вузин тоод орв. 190 эрдмиг хальмг вузд дасч болхмн. Энүнә оютнр өөрхн иргчд мана таңһчин делгрлтиг теткх улс болҗана. Таңһчин залвр «Приоритет-2030» гидг төсвәр Хальмг ик сурһульла, түүнә багшнрла, номтнрла болн оютнрла кесг җилин эргцд олз-орутаһар нөкцлтҗәнә, –гиҗ таңһчин залврин Ахлачин негдгч дарукин үүл дааҗадг Цернә Эрднь йилһән сәәнәр сурдг оютнриг йөрәҗ темдглв. – Одахн Элстд Фиджитал төв секгдлә. Ирлцңгү марһанд Хальмг ик сурһулин хамцул шунмһаһар орлцҗ, олна керг-үүлдвр бүрдәлһнд шаңһа бүрдәцлә нөкцҗ үүлдв. Эврә таңһчин йиртмҗин зөөриг илдүлҗ терүг олзта-орутаһар олзллһн түшгч вузин һол күсл болҗана, – гиҗ Эрднь Николаевич заав.
Тер мет вузин йилһән сәәнәр сурдг болн олна үүлдврт шунлттаһар орлцдг оютнриг таңһчин Улсин Хуралын (Парламентин) депутат Хаалһин Очр йөрәҗ, теднд улм өөдән күцәмҗ дурдв. Тер мет Парламентин Ахлачин йөрәлин бичгиг олнд соңсхч умшв. Хальмг ик сурһулин багшнр болн номтнр, оютнр сурһулин, номин халхар өөдән күцәмҗ бәрхәр шунна, аштнь эдн Әрәсән болн нарт-делкән кемҗәнд йилһрҗ, кесг салврар ончта диилвр бәрнә, гиҗ Артем Михайлов бичгтән темдглв.
- Тадн социальн кесг төсв делгрүлҗ, олнд туста көдлмш күцәҗәнәт, тер үүлдвр цааранднь чигн өсәд-өргҗәд йовтха. Хоорндан ни-негн бәәдл батрулҗ, тадн бүкл таңһчиг хамцулҗанат, - гиҗ баһчудын кергәр бәәдг агентствин һардач Камиль Маркеев онц темдглв. Тер мет спортын министрин дарук Дорҗинә Тимофей, «Движение первых» таңһчин җисәнә һардач Анхана Саглр, бичкдүдин үүдәлтин Бәәшңгин һардач Чиңһс Ефремов бас оютнриг йөрәҗ, Хальмг Таңһчин төлә үүлдтн, күцәмҗ бәрхәр зүтктн, гиҗ баһчудыг дурдв. Тадниг ик сурһулин КВН-ә марһанд күләҗәнәвидн, гиҗ Чиңһс Ефремов тодлулв.
- Хамгин билгтә,төрскнч седклтә, ухата, йилһән сәәнәр сурдг, олна көдлмшт орлцдг оютнр Хальмг ик сурһульд сурна, тадниг эндр өдр йөрәхәр седҗәнәв. Мана вузин номтнрин хүүвин шиидврәр йилһән сәәнәр сурдг болн олна үүлдврт орлцдг оютнриг, ут турштан 1 миңһн һар күүг, мөрәһәр ачлхин төлә 25 сай арслң һарһҗ өггдв. Эднә мөрәс хоорндан йилһрнә, мана седвәрч цуг баһчудыг темдглләвидн, — гиҗ вузин һардач Салан Бадм келв.
Оютнр медрлән гүүдүлҗ кесг эрдм дасна, номин хаалһд орх чигн цуг таал бәәнә гиҗ һардач темдглв. Сән оютнриг өсксн, теднд төрскнч сурһмҗ өгсн эк-эцкнрт чигн ик ханлт өрггдв.
- Хальмг ик сурһульд СМИ-н көдлмшлә залһлдата эрдм дасув, филологин кесг кичәлд орад, эн салврин багш болув. Өмн үзгин округин ик хургт орлцад, Байкалд одад ирүв, бас шин үүрмүдлә таньлдлав. Ода вузд дассн немр эрдмәр бичкдүдт медрл өгчәнәв. Тиим кевәр оютнрт мергҗлтән өөдлүлх кесг эв-арһ бәәнә, — гиҗ оютн Дмитрий Ливерко тоолврарн хувалцв.
Цааранднь хальмг вузин оютнр болн ирсн артистнр билг-эрдмән үзүлҗ, энд цуглрсн эк-эцкнрән болн үүрмүдән байрлулв. Тиим кевәр медрлән авсн деерән оютнр ду-бииһин билг-эрдмәрн седкл авлдгиг бас дасчана.

ТҮРВӘН Һуна