Сурһулян төгсәҗәдг баһчудыг йөрәв

Давсн амрлһна өдрмүдт таңһчин сурһуль-эрдмин бүрдәцст «Сүл хоңхин» байр болв. Хальмг Таңһчин Толһач Хаска Бату Элстин техническ лицейд ирәд, сурһулян төгсәҗәдг баһчудыг ончта өдрлә йөрәв. Хальмг Таңһчин сурһуль-эрдмин болн номин министрин үүл дааҗадг Натра Антон, Хальмг Таңһчин Улсин Хуралын (Парламентин) депутат Цекира Зулта, сурһульчнрин эк-эцкнр байрин керг-үүлдврт бас орлцв.
Эн җил лицейиг 68 сурһульч төгсәв, эдн дунд таңһчин болн Әрәсән марһаст, спортивн болн сойлын керг-үүлдврмүдт шунмһаһар орлцад, сурһуль-эрдмин бүрдәциннь нер дуудулсн баһчуд баһ биш бәәнә. Сурһулян йилһән сәәнәр сурсн Увшан Байн, Эрнҗәнә Бадм, Анастасия Михайлова, Сарңга Арслң болн Евгән Буйнта Әрәсән болн Хальмг Таңһчин туг өргв. Лицейин һардач Олян Нүүдлә күүкд-көвүдиг йөрәһәд, эн җил эднә төлә дааврта болв гив. «Шүүвр өглһнд арднь орҗ белдвр кеһәд, тааста эрдм шүүҗ авад, цааранднь сурх ик сурһуль йилһҗ аввт. Мана багшнр таднд гүн медрл өгәд, шүүврән сәәнәр өгхд немр кичәлмүд давулад сәәнәр белдв. Эк-эцкнртн тадниг дөңнҗ, чик сурһмҗ өгәд, төрскн һазр-усндан эңкр, өлзәтә сән үрд өскв. Тана санан күцҗ, хаалһтн цаһан болтха, ик күцәмҗ бәрхин төлә уралан йовтн!», - гиҗ Нүүдлә Александровна сурһульчнртан цаһан седкләсн дурдв.
Элстин техническ лицей таңһчин сурһуль-эрдмин сән гисн бүрдәцсин негнь болҗахиг Хальмг Таңһчин Толһач Хаска Бату темдгләд, сурһульчнр мана бахмҗ болҗана, бидн таднд ицҗәнәвидн гиҗ келв. «Мана орн-нутгин ик сурһульмуд, тер тоод Б.Городовиковин нер зүүдг Хальмг ик сурһуль таниг күләҗәнә. Җирһлиннь һол күслән эртәр медҗ автн, шүүҗ авсн эрдмәр күцәмҗтәһәр үүлдҗ, билг-эрдмән делгрүлҗ, уралан зөртн!
Мана таңһчд сурһуль-эрдмин халх цааранднь чигн күцәмҗтәһәр делгрх. Бичкдүд сән чинртә болн бат медрл авхин төлә сән таал тогтагдҗана. Эн төр хаһллһнд мадниг Әрәсән Президент Владимир Путин болн орн-нутгин залвр дөңнҗәнә. Бидн шин сурһульмуд тосхҗанавидн, сурһуль-эрдмин бүрдәцст бат ясвр кеҗәнәвидн, өдгә цага кергсләр теткҗәнәвидн, мана багшнрин көдлмшин таал ясруллһнд ик оньг өгчәнәвидн. Җил ирвәс эн төрмүдиг хаһлҗ өмәрән зүткхвидн. Мана таңһч делгрәд цецгәрхин, шин эв-арһс тогтаҗ, ик күцәмҗ бәрҗ мана ик орн-нутгин күцәмҗтә болн чинртә регион болхин төлә цугинь кехвидн. Тадн итклән геелго, ик күцәмҗ бәрхәр шунтн!» – гиҗ таңһчин Толһач йөрәлин үгдән темдглв.
Хаска Бату лицейин технологин багш Бадмин Верад, сурһульчнр Саңһҗин Данзнд, Мошулдан Кармасонамд болн Шобджура Басңд Хальмг Таңһчин Толһачин Ханлтын бичгүд бәрүлҗ өгв. Байрин керг-үүлдврин йовудт олн зүсн олимпиадт дииләчнрин тоод орҗ, лицейин нериг өөдән бәрҗ йовсн сурһульчнриг Күндллһнә һашгудар ачлв. Эдниг таңһчин Улсин Хуралын депутат Цекира Зултан болн ЭГС-ин депутат Дорҗин Бадмин нерн деерәс сертификатмудар ачлв.
Байрин чилгчәр 8-ч классин сурһульчнр техническ лицейин частр дуулв, 11-ч классин сурһульчнр Шобджура Басң болн Альвинә Алтн сүл хоңх җиңнүләд, сәәхн сурһулин җилмүд төгсчәхиг медүлв. Сурһулян төгсәҗәдг күүкд-көвүд таңһчин Толһачла хамдан зурган цокулв.

ДООҖАН Наталья