Ветеранд өөдән ачлвр бәрүлҗ өгв

Сегодня, 10:38 | Общество, Таңһчин зәңгс, Хальмг Тањєчин Толєачин ґдр-бўр, Зіњг, Эдн Төрскән харсла

Хальмг Таңһчин Толһач Хаска Бату Төрскән харсгч Алдр дәәнә ветеран Петр Леонтьевд золһҗ одад, Советин Союзин Баатр Басан Городовиковин орденәр ачлв.
Эн өдрмүдт Петр Леонтьевич дәәнә ветеранмудын госпитальд эрүл-мендән батрулҗана, тегәд таңһчин Өдрт нерәдгдсн байрин хургт орлцҗ чадсн уга. Бату Сергеевич ачта ветеранла болн энүнә аваль Валентина Алексеевнала күүндәд, Хальмг автономь бүрдснә 105 җилин өөнлә йөрәв. Петр Леонтьевич Басан Бадьминовичиг сәәнәр медҗ, энүнлә нег һазрт дәәлдҗ йовсан тодлв. Басан Городовиковин дуудврар эн мана таңһчур ирәд, энд тосхлтын халхд олн җилдән көдлҗ йовсан келв.
- Мана таңһчин автономин 105 җилин өөн темдглҗәдг цагла Петр Леонтьевичлә әдл улсин зөрмг, күч-көлсн болн Төрскндән эңкр болдг седкл маднд үлгүр-үзмҗ болх зөвтә», - гиҗ Бату Сергеевич келәд, ачта ветеранд Советин Союзин Баатр Басан Городовиковин орден өрчднь зүүв.
Петр Леонтьевич таңһчин Толһачд «Витебскд 1050 җил» гидг дегтр белглв. Ветеран 2024 җилин зунар Беларусьт одад, Витебскин 1050 җилин болн балһсиг немшнрәс сулдхсна 80 җилин өөнин керг-үүлдврмүдт орлцсмн. Әрәсән болн Беларусин хоорнд иньгллтин бат залһлдан бәәхиг Хаска Бату темдгләд, дегтр белглснд ханлтан өргв. Келхд, Петр Леонтьевич һаха сарин 25-д 100 җилин өөнән темдглхмн. Бату Сергеевич ачта ветеранд бат эрүл-мендин бәәдл дурдв.
Харһлтд таңһчин эрүл-менд харлһна министр Саран Булат, П.Жемчуевин нертә эмнлһнә ах эмч Чумпинә Саглр, дәәнә госпиталин көдләчнр орлцад, ветераниг өөдән ачлвр авснлань йөрәв.
БАТАН Наталья

Видео