Иргчдән сән мергҗлтнр болхар

Сегодня, 14:03 | Общество, Таңһчин зәңгс, Зіњг, Эрўл-менд харлһн, Марєан

Эн долан хонгт «Эрдмчнр» Әрәсән марһана таңһчин девсң эклв. Т.Хахлынован нертә медицинск колледжин оютнр «Медицинск болн социальн хәләвр» болн «Эмнлһнә үүлдвр (фельдшер)» гидг марһана даалһвр күцәв. Марһанд орлцачнриг таңһчин эрүл-менд харлһна министрин дарук Сарңга Гиләш йөрәһәд, күцәмҗ дурдв. Эн марһанд орлцхар Луганск Улсин Республикин Антрацитын медицинск колледжин элчнр ирснь темдгтә, тегәд күндтә гиичнриг цуһар байртаһар тосв.
Антрацитын медицинск колледжин багш Алла Харламован келсәр, эн мана таңһчур дөрвдәд ирҗәнә. Хальмг колледж эднлә нөкцҗ үүлдҗ, сүл җилмүдин эргцд бат залһлда батрулҗ, сурһулин бүрдәцд дөң-тусан күргҗәхиг гиич темдглв. «Бидн нааран ирсндән ик байрта бәәнәвидн, мадниг сәәнәр тосад, соньн керг-үүлдврмүд бүрдәснд сурһулин бүрдәцин һардврт болн оютнрт ик ханлтан өргҗәнәвидн. Хальмг улсин Цаһан Сар темдглхин тускар маднд келҗ өгсн деерән бидн хамдан боорцг болһад, сергмҗтәһәр амрвидн. Ирх болһндан тана хотл балһсн улм сәәхрсиг үзәд, энд бәәдг цаһан седклтә улсар бахтнавидн. Хальмг колледжин багшнр маднд сурһулин туст сүв-селвгәрн хувалцҗ, олн төрәр цәәлһвр өгнә. Ода мана колледжд 350 оютн сурчана. Бидн Әрәсән сурһуль-эрдмин көтлврәр көдлхин төлә белдврин көдлмш кеҗәнәвидн, эн туст Хальмг колледжин һардвр маднд цуг халхин дөң күргҗәхнь ик урмд өгнә. Тана колледжд өдгә цага сән кергсл бәәнә, оютнрт гүн медрл авхин төлә цуг таал бәәнә. «Эрдмчнр» гидг марһа давулхин төлә шишлң мастерскойс бас бәәнә, тегәд оютнр даалһврмудыг сәәнәр күцәҗ чадна. Мана колледжин оютн Ангелина Леонова марһанд бас орлцхмн, эн 4-ч курст сурчана. Эн марһанд орлцҗ, терүг давуллһна туст бидн байн дамшлт хоршаҗ авчанавидн», - гиҗ Алла Юрьевна келв.
«Эрдмчнр» марһан һурвн өдртән болв. Оютнр эмнлһнд болн БПЛА нисҗ ирснә ашт шав авсн улст түрүн дөң күрглһнә, гемтә күүнә эрүл-менд шинҗллһнә, тәрлһ келһнә, цаһан төр болсн күүкд күүнд нөкд боллһна болн нань чигн даалһвр күцәв. Келхд, эн марһа давулхин төлә эмнлһнә хорас бәәнә, шишлң кергсл олзлгдна, тегәд оютнр дассн медрлән үзүлхин төлә цуг таал бәәнә. Эдн даалһврмудыг ямр кевәр күцәсиг үнлхин төлә шинҗләчнрин багмуд бүрдәгдв, терүнә ханьд сурһулин бүрдәцин багшнр болн таңһчин эмнлһнә мергҗлтнр орсн бәәнә.
«Медицинск болн социальн хәләвр» әңгин ах шинҗләч Наталья Таранован келсәр, оютнр марһанд сән белдвр кев. Эн әңгд Хальмг медицинск колледжас 6 оютн болн Антрацитас ирсн нег оютн орлцҗана. «Эмнлһнә үүлдвр» әңгд бас зурһан оютн орлцҗ, фельдшерин эрдмин халхар даалһврмуд күцәв. Колледжин оютнр эн марһанд җил болһн орлцад, гүн медрл үзүлнә. 2022 җилд болхла колледжин оютн Вадим Растрыгин региональн девсңд диилвр бәрәд, Сыктывкар балһснд болсн ашлгч марһанд орлцсмн. Әрәсән марһанд оютн сән күцәмҗ бәрәд, шишлң ачлврар ачлгдсн билә.
Марһана йовудт хотл балһсна сурһульчнриг эрүл-менд харлһна көдләчин эрдмлә таньлдулхин төлә соньн керг-үүлдврмүд бүрдәгдв. «Волонтеры-медики» җисәнә гешүд сурһульчнрт колледжд ямаран эрдм дасч болхин тускар келҗ өгәд, «Эрдмчнр» гидг марһа давуллһна мастерскойс үзүлв. Эрүл-менд харлһна көдләчин эрдм дасхд туслдг «Пироговин ширә» гидг өдгә цага кергсл сурһульчнриг соньмсулв.
ДООҖАН Наталья
ЗУРГТ: марһан болҗах кем

Видео