Нөкцлтән батрулад

Хальмг Таңһчин Толһач Хаска Бату Сбербанкин Өмн-барун үзгин әңгин һардач Анатолий Песенниковла харһад, нөкцлтин халхар күүндв. Хамгин түрүнд өдгә цагин эв-арһсин, зуульчллһна, ЖКХ-н делгрлтин болн сурһуль-эрдмин төсвс күцәлһнд онц оньг тусхагдв.
– Күүндврин йовудт GigaChat туслмҗиг шинҗләд, кесг сурврмудан өгәд, ухан-тоолвринь медвидн. Йосн биш уха олзлад, шаңһа бүрдәцсин көдлмшиг улм делгрүлҗ болна. Тер мет зуульчллһ делгрүллһнә халхар болхла мана таңһчд һәәхмҗтә шин ормс бүрдәһәд, элстә һазрт гиичлүр тосхч болҗана. ЖКХ-н болн сурһуль-эрдмин төсвс күцәлһнә туст бас хамцу үүлдврин йовудт өдгә цагин эв-арһсиг олзлад күцәмҗтәһәр көдлҗ болхмн. Эн шинҗллт кеснә ашт дәкәд чигн шин седвәр үүдв. Мана таңһчд һол оньган өгчәдг Сбербанкин һардврт, нег үлү Анатолий Валерьевичд ханлтан өргҗәнәв, – гиҗ Бату Сергеевич темдглв.
ОЛЬДАН Цаһан