Әмтнә олз-ору икдүлхәр.

Сегодня, 15:03 | Общество, Таңһчин зәңгс, Зіњг

Әмтнә олз-ору икдүллһнә, эврә керг бүрдәлһнд, көдлмш олҗ авхд эс гиҗ мергҗлтән өөдлүллһнд дөң күрглһнә төрмүдт орн-нутгин һардвр онц оньг тусхаҗ, шаңһа көтлврмүд батлна. Тиим көтлврмүдин негнь социальн бооцан болна.
2019 җиләс авн мана орн-нутгин иргнмүд социальн харслтын цергллтлә бооца батлад, шаңһа дем авч чадҗана. 2020 җиләс авн Әрәсән Президент Владимир Путинә даалһврар эн көтлвр орн-нутгин цуг регионмудт күцәгддг болв. Социальн бооца батлсн иргн шаңһа мөңгәр эврә керг эс гиҗ дөңцл эдл-аху бүрдәҗ, олз-оруһан икдүлнә. Келхд, орн-нутгин толһачин даалһврар социальн бооцана халхар өгдг демин кемҗән өсв. Тегәд ода эврә керг бүрдәхин төлә 350 миңһн арслң, гер деерән эдл-аху бәрхәр зуралҗадг улст болхла 200 миңһн арслң өггднә.
- Сүл җилмүдт баһ тетквртә улсин то баһрҗана, болв тер бийнь әмтнә олз-ору икдүллһнд туслх көтлврмүд эрк биш кергтә. Хамгин түрүнд олн үртә, һанцарн үрән асрҗадг болн эрмдгтә улст нөкд болх кергтә. Социальн бооцан җирһлин күнд бәәдлиг давҗ һарад, бийән болн өрк-бүлән теҗәхд туслна. Цергә шишлң керг-үүлдврт орлцачнр бас эн көтлврт орлцхин төлә онц зөрүллт кергтә. Социальн бооцан эврәннь җирһлән ясрулх арһ өгнә, - гиҗ орн-нутгин толһач келсмн.
Мана таңһчд эн көтлвр сән йовудтаһар күцәгдҗәнә, җил ирвәс социальн бооца батлсн улсин то икдәд йовхнь темдгтә. 2020-2025 җилмүдт мана таңһчд ут тоодан 3149 бооцан батлгдв, 11 миңһн һар күн шаңһа дем авв. Эн җилмүдин эргцд баһ тетквртә, олн үртә болн җирһлин күнд таалд туссн улст нөкд болхин төлә шаңһас 582 сай арслң йилһгдсн билә. Эн җил болхла мана таңһчд 719 бооцан батллһнд 170 сай арслң йилһгдв. Эн көтлврт орлцдг нег һазра улс нурһлҗ эврә керг бүрдәҗ эс гиҗ мал асрад олзта-орутаһар көдлнә. Нег үлү селән һазрт бәәдг улст шаңһа дем кергән делгрүлхд туслҗ, өрк-бүлән теҗәх арһ өгнә. Кесгнь олн зүсн туслмҗ күрглһнә халхар көдлнә, эврә эдл-ахудан малын то икдүлхәр шунна. Эннь олн үртә эк-эцкнрт ик урмд өгнә.
Цергә шишлң керг-үүлдврт орлцачнр социальн бооца батлад, эврә керг бүтәҗ олзта-орутаһар үүлдхин туст Әрәсән Президент бас даалһвр өгсн билә. Тегәд эднә төлә бооца батллһна некврт сольвр орулгдад, өрк-бүлин оруһин кемҗән тоод авгддго болв. Цергә даалһвран күцәһәд, хәрҗ ирсн дәәчнр тааста кергән делгрүлҗ арһлачнрар үүлдхин төлә бас сән таал тогтагдҗана.

ДООҖАН Наталья

Видео