Олна дөңгәр «Мани сүм» босхв

Сегодня, 15:05 | Общество, Таңһчин зәңгс, Зіњг, Бурхн-шаҗна төрәр

Давсн амрлһна өдрмүдт Элст балһсна 10-ч микрорайонд Авалокитешвара бурхна «Мани сүм» хурл секгдв. Һурвн җил хооран эклсн тосхлтд мана таңһчин бәәтхә, талдан балһсдын әмтн демән күргҗ, буйнта кергт шунмһаһар орлцснь темдгтә. Хурлын өөр шидр Гуру Ринпочен көшә болн Дорҗ Дролло нертә Бодь Суврһн босхгдсн бәәнә. Хурл босхх ормиг Юдра Ринпоче лам 2010 җилд әрүслсн билә, терүнә тосхлтын йовудт сүв-селвгән өгәд, әрүн чинртә көшәг болн Бодь Сурвһиг номар дүүргҗ белдв, тегәд Ик Багш хурл секлһнә байрт орлцхар ирснь ончта йовдл болв.
Орһахна «Богд Далай Ламин Раши Лунпо» хурлын лам Гонбо Ловон Багши (Элстин Батыр) эн хурл тосхх седвәр татсн болдг. Эн җилмүдин эргцд энүнә һардврт хурлын тосхлт күцәгдв, көшәг Непал орн-нутгас авч ирсмн. Келхд, хурлын төсвиг багш бийнь зурҗ белдсмн. Эн кергт Ик Буурла Орһахн селәнә әмтн шунмһаһар орлцад, эн әәмгә долан арвна элчнр демән күргсмн. Келхд, эдн хурлын тосхлтд 3 сай 800 миңһн арслңга демән орулв, һурвн җилин эргцд күцәгдсн тосхлтын көдлмш олн-әмтиг хамцулҗ, эн байрта өдриг өөрдүлв.
- Эндр байрта болн ончта өдр болҗана. Мана хурл секлһнә байрт Напалас Ик Багш Юдра Ринпоче ирв. Һурвн дундур җил хооран бидн багшла Гуру Ринпочен көшә мана һазрт углҗ тәвхин тускар күүндсн биләвидн. Келхд, иим көшә мана орн-нутгт нань уга. Эн көшә мана хальмг һазриг йиртмҗин аюлас, олн зүсн гемәс, әмтн дунд учрдг керүл-цүүгәнәс гетлҗ харсх зөвтә. Тиим көшә босххин төлә хурл кергтә гиҗ келхләм, Юдра Ринпоче намаг дөңнв. 2023 җилин намрас авн бидн хурлын тосхлтын көдлмш эклвидн. Хамгин түрүнд Орһахна нег һазра улс дөңнҗ, эн кергт орлцв. Таңһчин талдан райодын әмтн бас демән күргв. Эндр цугтаднь ик ханлтан өргҗәнәв. Хам-хоша балһсдт бәәдг Виктор болн Лариса Милославскийхн 3 сай, Алексей Резванов 1сай арслңга демән күргсиг онц заах кергтә. Олна дөңгәр эн керг бүтҗ, бурхн-шаҗна ном делгрүлҗ йовнавидн, - гиҗ Гонбо Ловон Багш келв.
Хальмг Таңһчин ачта улсин Хүүвин ахлач Пашнана Эрднь хурл секлһнд нерәдгдсн байрт орлцхар ирсн Юдра Ринпочед ханлтан өргәд, олн җилин эргцд шаҗна ном-сурһаль зааҗ йовхинь өөдәнәр үнлв. Мана таңһчд бурхн-шаҗн делгрәд, олн-әмтиг хамцулҗ йовхиг онц темдгләд, күндтә гиичд бат эрүл-менд дурдв. Орһахна әәмгә улст эврә хурл, Кермн толһа бәәнә, җил болһн арвн болһн хамдан цуглрад, кесг йосрхл күцәнә гиҗ Эрдне Лиджиевич келәд, эдн дунд бурхн-шаҗна ном зааҗ өгдг Гонбо Ловон Багшин ач-тусиг темдглв. Әмтн өвкнриннь авъясар бәәҗ, теднә санл тевчҗ, ниитә кевәр бәәдг учрар Орһахн селән делгрәд бәәнә. Әмтнә буйнта кергүд төрскн һазрин делгрлтд туслҗахнь лавта. Энд дунд сурһульд бат ясвр кегдв, бичкдүдин сад шинрүлгдв, хату девскртә хаалһс тосхгдҗана, удл уга шин эмнлһн болн спортын төв секгдхин тускар Эрдне Лиджиевич зәңглв.
Хурлын тосхлтд демән күргсн болн тосхлтын көдлмш кесн, һаза-дотань сән кец-таал тогталһнд орлцсн улст Гонбо Ловон Багш Күндллһнә һашгуд болн белгүд бәрүлҗ өгв. Дарунь Орһахна арвна элчнр болн байрт орлцсн улс Юдра Ринпочед хадг татад, күндллһән медүллһнә йорсхл күцәв. Байрин керг-үүлдврин йовудт Авалокитешвара бурхнд болн күндтә гиичд көгҗмин дееҗ өргснь седкл байсав. Күндтә багш ном умшад, «Мани сүм» хурл ке-сәәхн цецгә мет дүңгәҗ олна ниицлтиг медүлҗәнә гив.

ДООҖАН Наталья

Видео