Цуг орн-нутгин нґкцлт батртха!

Давсн бембі ґдрлі, сентябрин 27-д, хотл балєсна біірн імтн Элстин ґдр темдглв. Балєсна талвњгудар, уульнцсар імтн шууглдад, нір- наадан кељ артистнрин концерт хілів, марєа кев. Элстин цутхлњд болсн соньн керг-ўўлдвриг Хальмг госуниверситетин оютнр бўрдів. Китд философ Конфуцийин нерті тўрўн институт делкід секгдсніс нааран 10 љилин ґґнд нерідсн кесг марєаста, туста медрл ґгдг нір-наадта эн болв.

Китд орн -нутгин туск зургудын єііхўл нааран ирсн кесг улсиг соньмсулв. Тііз (сцен) деер цуг імтнд ўрвр кељ Хальмг бииєин театр «Ґґрднр» ансамблин артистнр китд би биилв.

Дікід КГУ-н оютнр тііз деер єарад олн улсла мендлід, эндр ах сурєулин багшнр болн студентнр Конфуцийин институтын 10 љилин ґґниг темдглљіхін келв. Хальмг университетин медлд болхла эн институт 5 љилин эргцд ўўлдљіні.

Тер цагин эргцд шин керг бўрдігдлі, тер саамд кўчр-кўнд юмн чигн харєла, Китд орн-нутгла бірдг нґкцлт чигн батрла. Эн институт ўўділєні кергиг Хальмг госуниверситетин урдк ректор, ода КГУ- президент, профессор Герман Борликов єардљасмн.
Ода Конфуцийин институтмуд цуг орн - нутгудт ўўлдљіні гиљ келљ болљана. Тиим институт тўрўн болљ Ґмн ўзгин Кореян Сеул хотл балєснд 2004 љилин ноябрин 21- д секгдлі. Ґдгі цагт делкід 400 институт болн 500 класс ўўлдљіні, энд китд кел болн сойл дасдг соњсачнрин то 800 мињєнд кўрсн бііні. Китд авъясла чигн таньлдна, тиим кевір Китд болн Ірісі, Хальмг Тањєч хоорнд иньгллт батрљ делгрљ йовна.

Дікід цуг улсиг китд халхас Конфуцийин институтын директор Чжэн Фань ўг келљ йґрів. Терўні соњсачнрин тоод 160 кўн Элстд бііні.

Єазадын кесг орнла Хальмг госуниверситет ямаран ик нґкцлт кўціљіхин тускар КГУ-н ректор Бадм Салаев келв. Эндр ґдр Ґвр Моњєлын университетлі (КНР), экономикин болн бизнесин Хайнаньск университетлі (КНР), Моњєлын келн-улсин университетлі, Ховдын государственн университетлі (Моњєл орн-нутг), Деед ўзгин –Казахстанск университетлі, Атырауск государственн университетлі (Казахстан), Корейин университетлі (Ґмн ўзгин Корей, «Лого» гидг феремерин ниицінлі (Германь), Масараха университетлі (Таиланд), Тґвд номтнрин библиотеклі (Дхарамсала, Индия) ґргір нґкцлтиг делгрўлсні ашт мана хальмг оютнр тиигірін дамшлт авхар, єазадын кел дасхар єарч йовна. Давсн љилд 60 єар оютн тиим дамшлт авла.

Китд оютнрин то чигн ґсід йовна, тедн хоорнд мана ґґрд оютнр Шинљіњгіс болн Ґвр Моњєлас ирљ олн зўсн эрдм дасчана. Регионоведень дасдг оютнр Китд орн - нутгт оч келні медрлін гўўдўлні, аштнь сін специалистнр болна гиљ ректор темдглв.
Эн ик нір – наадна йовудт элстихн китд улсин хот-хол амсв, китд келні зірм ўгинь дасв, эдні ціієін эдлдг кезіњк авъясла таньлдљ, кезіњк бичмрин зокалыг, Тайцзичуань гимнастикин дамшлєинь дасљ авв.

Тиим туста керг-ўўлдвр Элст балєсна ґдрин йовудт болв. Марєаст нўўрлгч орм эзлсн улс бичкн мґрієір ачлгдв. Тиигід эдн байрта-бахтаєар хірљ ирв. Ідл керг - ўўлдвриг хальмг кел даслєнд, мана кезіњк авъяст нерідх кергті.

Эн саамд Шинљіњгин болн Ґвр Моњєлын оютнр ґґрд улсин ду дуулљ, би биилљ тґрскн келін яєљ меддгін ўзўлтхі, мана баєчуд чигн, медітнр чигн тедніс ўлгўр автха.