Селәдин хаалһс ясгдв

07-09-2020, 13:55 | Таңһчин зәңгс » Селәнә эдл-аху

Хальмг Таңһчин тосхлтын, көлгн-күчнә болн хаалһин эдл-ахун министерств «Хальмг Таңһчин көлгн-күчнә комплексин болн хаалһин эдл-ахун делгрлт» гидг региональн көтлврин медлд таңһчин шаңһас бәәрн хаалһсиг тосхлһна болн бат ясвр келһнә кергт субсидь йилһҗ өгх райодын муниципальн бүрдәцсиг йилһҗ авлһна керг-үүлдвр давулсн билә. Эн хаврар давулгдсн керг-үүлдврин ашт Октябрьск болн Баһ Дөрвдә райодын муниципальн бүрдәцс эн кергт немр мөңг таңһчин шаңһас авх зөвтә болв.
Тиигәд, Октябрьск РМО 10609799 арслң авв, терүнәснь 10 сай арслңгнь таңһчин шаңһас, наадк 600 һар миңһн арслң бәәрн шаңһас йилһгдсмн. Района муниципальн бүрдәц «Сарпан хаалһин заллт» гидг акционерн ниицәнлә бооца батлад, Ик Царң болн Иҗл селәд хоорндк хаалһд ясвр келһнә туст бооца батлсмн. Баһ Дөрвдә район таңһчин шаңһас бас 10 сай арслңга субсидь авсмн, терүнд эдн бәәрн шаңһас 719150 арслң немв. Эдн бас «Сарпан хаалһин заллт» гидг акционерн ниицәнлә бооца батлад, Баһ Дөрвд селәнд переулок Спортивный болн 110-ч ОККД-н нертә уульнцд ясвр кев. Тер мет Плодовитое селән күртл бәәдг хаалһд хату девскр кегдв. Таңһчин көтлврт орлцсн райодын муниципальн бүрдәцс селәдин хаалһс яслһна төриг күцәмҗтәһәр хаһлҗ, тедниг некврлә ирлцүлв.

Мана зәңгч

Видео