Тату зурдг хальмг зурач

24-11-2020, 15:16 | Таңһчин зәңгс » Сойл

Сүл җилмүдт мана таңһчд болв чигн, талдан һазрт болв чигн арсн деер зурсн «тату» гидг зургуд баһчуд дунд маш икәр делгрҗәнә. «Тату» гисн үг палинезийн келнәс «татау» – арсн деер зурсн зург гиҗ орчулгдна. Тегәд хамгин түрүнд эн үгиг XVIII-ч зун үйин зуульч Джеймс Кук англь келнд орулв. Тер цагас авн эн үг болн арснд зург зурдг йовдл Европ улсин дунд тархагдад олн келнд орад, баһчуд дунд делгрсмн. Мана Элстд тату кедг кесг зурачнр бәәнә, теднә негнь – Микулян Данир. Тегәд Данирла харһад арснд зургуд зурх үүлдврин тускар күүндвидн.

– Данир менд. Интернетин (Инстаграмин) халхд чи Димир Штольц гиҗ нерәр йовнач? Юңгад тиим нертә болвч?
– Энтн мини шог нерн. Эннь кезәңк баһ цагин үйлә залһлдата. Нанла хамдан көдлҗ йовсн, үүрлҗ йовсн Әрәсән олн һазра таньдг улс нерим даң буруһар келдг бәәҗ. Данир, Дамир, Динар болн нань чигн нерәр дуудла. Нег дәкҗ нәәҗм Димар гидг нериг соңсад, Димир гидг нерәр намаг дууддг болв. Тегәд тер цагас авн иим шог нерән Интернетд олзлҗанав. Штольц гисн Гончаров Ивана «Обломов» романа һол дүр болҗана. Бас шоглад тәвсн нерн.
– Тату кедг эрдм альд даслач, юнгад тату кедг болвч?
– Түрүн болҗ мини нег нәәҗ тату кех сана орулв. Нег дәкҗ күүндәд суухла, “Ой, чи сән зург зурналмч, тегәд тату кеҗ чадхич”, – гиҗ нәәҗм келв. Тегәд бидн Китдәс тату кеддг маши, бек, молн кергтә зүсн-зүүл бичүлҗ авад, экләд тату кедг болув.
– Чини түрүңк мергҗл болхла “психолог” эсий? Одахн тана мергҗлин байрин Өдр билә. Тегәд тер Өдрлә йөрәҗәнәв. Тату кедг улсин туст психологудын санан-тоолвр ямаран болх?
– Номин талар авад хәләхлә, тату зурсн улс эврән бийән, эврән санаһан тиигҗ медүлҗәнә. Шин зурсн татуһар күүнә оньг авлҗана. Тегәд арснд тату зурхла, күүнә седкл ухан тогтнна. Зәрм тату кесн улсин җирһлнь хүврнә. Би бас күүнә оньг авлх дуртав. Яһад гихлә нанла әдл җиңнсн дуута күн оньг авлдг болна (инәнә).
– Чини санаһар хамгин соньн тату ямаран билә?
– Миниһәр болхла, би нег күүкн күүнд чикн деернь цецг янзта тату келәв. Тер мини тоолсар хамгин соньн тату болҗана. Польша һазрас таньдг күүкнд Иисусин зург, уул деер шовута тату дурлав.
– Мини хәләцәр хальмг сойлын, түүкин талар тату зурх күн олн бәәнә эсий? Чини тоолсар эн юн болҗана? Тедн дунд кел, сойл меддг улс ховр болх.
– Мини медсәр күн болһн эврән секдл-саната болдг. Зәрм улс хамгин амр хаалһар йовҗана. Яһад гихлә тедн хальмг сойлын тускар болну, түүкин талар болну, тату зург зурхас нань юм кехәр бәәхш. Нам келән сурхш, түүкән сәәнәр медхш. Зәрм улс бийән харсхин, му юмнас гетлхин төлә тату кеҗәнә.
– Мана улан залатнр шар шаҗна талар бас тату зургиг кедг болҗ. Эн сән биший?
– Би энүнә тускар ламнрла кесг дәкҗ харһад күүндләв. Теднә келсәр, эн сән биш, яһад гихлә бузр бийд бурхна көрг, маань зурхла килнцтә болна. Болв эн юмнд талдан хәләц бас бәәнә. Шар шаҗнла залһлдата тату болхла, тер күүг чик хаалһд зөрүләд һарһхнь маһд уга. Эн күүнд Бурхн Багшин көргтә эс гиҗ мааньта татуһас тус күрдг болх. Зуг мини соңссар Шри-Ланкад цогцин арснд тиим тату зург бәәхлә күүг орн-нутгт орулшго. Эс гиҗ чамас цагдачнр (полиция) эн шаҗна татуһин тускар сурх. Тайландт теднә һазрин бөөһин тату кеҗ болна.
– Тату кесн улс хәрү эргҗ ирәд тер татуһан билрүлҗ өгтн гиҗ сурну угай?
– Нег дәкҗ нег күүкн моһан зургин тату кеҗ авла. Болв цаг болад, тер татуг билүрлх кергтә гиҗ тер күүкнд нег күн келсмн. Тегәд нанур хәрү ирәд, тер тату зургиг уга келә.
– Татуг билрүлх күнд угай? Тернь үнтәй?
– Олн өңгтә тату болхла, терүг уга кехд әвр кецү. Ноһан, улан өңг арснд үлдх. Шар, хар өңгтә тату уга кеҗ болна, сән эрдмч болхла чадх. Му чинртәһәр кесн татуг уга кехд амр биш. Хальмгт тату билрүлх күн уга гиҗ саннав. Мини санаһар, тату уга кехин төлә хөрн тавн миңһн арслң кергтә.
– Чамд зурсн тату бәәнү?
– Нанд төвд хуйг (тибетская кольчуга), санскрит келәр маань, цаста арслң, меклә, нег польск келәр үг “Агарна морд” гидг зурата болн нань чигн тату зургуд бәәнә.

Күндснь ШОРВАН Бадм

Видео