Төрскн һазран делгрүлх седклтәһәр

22-12-2020, 22:19 | Таңһчин зәңгс » Сурєуль-эрдм

Раиса Саранговнан келсәр, эдн «Селәнә комплексн делгрлт» гидг көтлврт орлцад, селәнә бәәрн улсин төлә амрлһна талвң тосхв. Эн кергт федеральн, таңһчин болн бәәрн бюджетмүдәс 1 сай шаху арслң һарһгдв. Тер мет бәәрн улс эн кергт демән күргҗ, 50 миңһн арслң цуглулв. Эн көтлврин некврәр селәнәхн бийснь эн объектсин тосхлтд орлцх зөвтә бәәсмн. Тегәд селәнә улс цуһар тосхлтын көдлмшт орлцҗ, арһ-чидлән негдүлҗ, бичкдүдин нааддг талвң болн спортивн комплекс углҗ тәвв. Тегәд дорас өсч йовх бичкдүдт болн баһчудт цаган соньн кевәр болн сергмҗтәһәр давулхин төлә өдгә цага сән амрлһна төв секгдснь эднд ик байр үүдәв. Энд бичкдүд наадхин төлә сән таал тогтагдв, спортар соньмсҗ цогц-махмудан батрулдг улсин төлә тренажермуд углҗ тәвгдв. Селәнә улс цуһар эн кергт шунмһаһар орлцҗ, дөң-тусан күргв. Манҗин Арслан, Ивана Петр, Мөңкән Лавга болн Һәрән Эрнцн олн-әмтнд үлгүр болҗ, аһу ик көдлмш күцәв гиҗ СМО-н толһач темдглв. Тосхлтын көдлмш така сард экләд, эн намрар төгсв.
Шатта селәнд ода 520 күн бәәнә. Темдглхәс, баһчуд өсәд-боссн һазртан бәәһәд, малан асрҗ, өрк-бүлән өндәлһҗ энд үлднә. Сүл цагт олн үртә баһ наста өрк-бүлмүд олн болснь темдгтә. Дөрвн үр асрҗах долан өрк-бүл бәәнә. Шидр Настан Баатрин болн Валентинан өрк-бүлд тавдгч үрнь һарв. Раиса Саранговнан келсәр, селәнд бичкдүдин сад, сурһуль үүлднә, ФАП бәәнә. «Теремок» гидг бичкдүдин садт 40 күүкн-көвүн орна, ода зуг дежурн баг үүлднә, терүнд 15 бичкн бәәнә. Эн җилин эклцәр «Сойл» гидг келн-улсин төсвәр тосхгдсн сойлын гер секгдсн билә.
- Дәкәд эн җил бидн селәнә уульнцст шам углҗ тәвлһнә көдлмш кеввидн, эн кергт 500 миңһн арслң олзлгдв. Ода селәнә уульнцсар асхнднь 28 панр, төв уульнцд нарна күч олзлдг 8 панр герл өгнә. Эн җилин эклцәр шин сойлын Гер секгдсн билә. Харм төрхд, пандемий учрад, олн-әмтн орлцдг керг-үүлдвр давулдг арһ уга болв. Тер бийнь бидн онлайн кевәр ямр нег сән өдрт нерәдҗ марһа давулнавидн. Пандемий эклсн цагас авн бидн мана нег һазра медәтнрт, олн үртә өрк-бүлмүдт, баһ тетквртә улст дөң-тусан күргхәр шуннавидн. Ода селәнд най һарсн 11 күн бәәнә, теднәснь тавнь 85 наснас ах улс болна. Одахн хальмг улсин Зулын байрт эднд хот-хол күргҗ өгвидн. Экин өдрт олн үртә баахн экнриг йөрәҗ бас чадсарн демән күргвидн, – гиҗ Раиса Саранговна келв.
Селәнд ФАП бәәнә, тенд фельдшер болн медсестра көдлнә. Эдн селәнә бәәрн улсин эрүл-менд харҗ, түрүн дөңгән күргнә. СМО-н толһачин келсәр, иргчдән эдн модульн ФАП углҗ тәвлһнә төр хаһлхар зуралҗана. Болв хамгин чинртә төрнь хату девскртә хаалһ тосхлһн болна. Селәнәс федеральн хаалһ күртл 40 дуунад йовх кергтә, тегәд хур-чиг болсн цагт терүгәр йовхд йир күнд болна. Таңһчин Толһач Хаска Бату Шатта селәнд көдлмшч кергәр ирсн цагтан эн чинртә төриг хаһлх үгән өгсн билә. Тегәд селәнәхн ямр нег федеральн эс гиҗ таңһчин төсвд орлцҗ хату девскртә хаалһ тосхгдх гиҗ нәәлҗәнә. Дәкәд селәнд Төрскән харсгч Алдр дәәнд орлцсн эн һазра улст тәвгдсн бумбин өөр сән таал тогталһна, әмтиг усар тетклһнә болн хату хог-бог цуглуллһна талвң тосхлһна төр хаһлх кергтә гиҗ Раиса Саранговна зуралгдҗах керг-үүлдврмүдин тускар хувалцв. Ода селәнд хойр худг бәәнә, нег бочк усн 1 миңһн арслң күрнә.
Төрскн һазртан эзн кевәр бәәхәр шундг улсин төрмүд эрк биш хаһлгдх гиҗ сангдна. Эдн арһ-чидлән негдүләд, кесг төр хаһлҗ чадв, зуралсн тоотан бас күцәхнь лавта. Селәнә эдл-аху социальн чинртә төрмүдт орлцҗ, дөң-тусан күргнә. Бәәрн улс чигн төрскн Шатта селән делгрҗ өсәд-өргҗәд йовхин төлә олна кергт орлцна. Дорас өсч йовх баһ үй эк-эцкнрәсн болн аав-ээҗнрәсн үлгүр авч, бас төрскнч седклтә, седвәртә улс болҗ өсхнь маһд уга.
ДАВАН Наталья