Хаврин тәрәнә көдлмш эклҗәнә

01-04-2021, 17:08 | Таңһчин зәңгс » Селәнә эдл-аху

Хальмг Таңһчд хаврин тәрә тәрлһнә болн услврин участкудт ус оруллһна көдлмш күцәлһнд белдвр кегдҗәнә. Энүнә тускар Хальмг Таңһчин Толһач Хаска Бату зәңгләд, эн җил буудян зүүтә эдл-ууш урһалһнд 232,27 миңһн гектар аһу һазр олзлгдх гив.

- Ода деерән селәнә эдл-ахус намрин тәрәнд минеральн ясвр орулҗана, теңгрин бәәдл ясрад дулан өдрмүд эклхлә хаврин тәрәнә көдлмш эклх. Намрар 222,6 миңһн гектар аһу һазрт буудя болн тосна эдл-ууш тәргдв. Намрин тәрә тәрсн цагт 59,0 миңһн гектар аһу һазрт минеральн ясвр орулгдсн билә, эннь 2020-ч җиләс 23,5 гектар аһу ик болна. Хаврин тәрә тәрлһнә төлә эдл-ахус тәрәнә экәр бүклдән теткгдсн бәәнә, – гиҗ Бату Сергеевич келв.
Таңһчин Толһачин зәңглсәр, селәнә эдл-ахусар услврин участкудт бас белдврин көдлмш күцәгдҗәнә. Туула сарас авн 6,7 миңһн гектар аһута услврин участкудт усн орулгдв, ут тоодан эн җил 27,4 миңһн гектар аһута услврин участкд усн орулгдхмн гиҗ зуралгдҗана. Эннь таңһчин селәнә эдл-ахуст 40 миңһн тонн шүрүн хот белдхд туслхмн гиҗ Хаска Бату онц темдглв.
Мана зәңгч

Видео