Эмчнрин түрүн нөкднр болна

Хөн сарин 12-т нарт-делкәд медицинск эгчнр сән өдрин байран темдглнә. Эдн эмчнрин түрүн нөкднр болҗ, гемтә улст эмнлһнә, эрүл-мендин бәәдл шинҗллһнә керг-үүлдврмүд күцәнә. Эднә көдлмш ик дааврта болн күнд болна, тегәд эн эрдм шүүҗ авсн күн цаһан седклтә, әмтнлә тевчңгү, тесвртә болх зөвтә. Зәрмдән эднә килмҗ, бүлән үг эмәс даву эдгәҗ, гемтә улст туслна. П.Жемчуевин нертә таңһчин эмнлһнд хөрн зурһан җилдән көдлҗәдг Манҗин Саглр эрдмдән итклтә, көдлмштән дурта күн болдг төләд энүг үүрмүднь тевчҗ күндлнә, ямр нег төрәр сүв-селвгинь авна.
Бийнь Саглр Николаевна Октябрьск района Цаһан Нур селәнд өсәд-боссмн. Сурһулин хөөн ямр эрдм шүүҗ авхинь эн эртәснь шиидсмн. Һаһань, Зулан Татьяна, олн җилдән түргн дөң күрглһнә цергллтд эмчәр көдлҗәнә, эн эрүл-менд харлһна делгрлтд ик ач-тусан күргсн төләдән Әрәсән эрүл-менд харлһна йилһән сән көдләчин болн Хальмг Таңһчин ачта эмчин өөдән нер зүүнә. Һаһань Саглрт бахмҗ үүдәҗ, үлгүр болдмн, тегәд эн медицинск колледжд сурхар шиидсмн. Сурһулян төгсәснә хөөн Саглр таңһчин эмнлһнә кардиоревматологическ әңгд күч-көлснә хаалһан эклв. Тенд эн хөрн һар җилдән көдлв, арвн җилдән ах медицинск эгч болв.
Тер цагт әңгиг Киринә Нарма һардҗасн билә, Саклән Светлана ах медицинск эгчәр көдлҗәсмн. Эн хойр баахн күүкнд сүв-селвгән өгч, эрдмин халхар түрүн ишкдл кехднь дөң-тусан күргсмн. Эднә килмҗтә хәләврт баахн көдләч дамшлт хоршаһад, цугинь дасч авв. Хөөннь энд II кардиологическ әңг секгдв, энд Шарманҗин Римман чадмг һардврт Манҗин Саглр төлҗәд, байн дамшлт хоршав.
- Мини ах үүрмүд көдлмштән дааврта, чаңһ неквртә, кергән йилһән сәәнәр меддг улс мөн, тегәд эднә сүв-севлг нанд ик урмд өгдг бәәсмн. Нанд нүдн-амн болад, дөңгән күргснд би хөвдән ханнав. Кардиологическ әңгд күнд гемтә улс эмнлһ авна, тегәд күн болһнд онц килмҗ кергтә, эмч заасн эмнлһиг дигтә-даратаһар күцәҗ, цугинь кех кергтә болдмн. Нег үлү арвн җилдән ах эгчәр көдләд, дунд медицинск көдләчнрин үүлдвриг диглҗ залх зөвтә биләв, – гиҗ Саглр Николаевна келнә.
Пандемий болсн цагт гемтсн улст дөңгән күргҗ госпитальд эн көдлв. Урднь үзгдәд уга гемәс хөрҗ, эмнлһ кеҗ әмтнә әм аврлһна керг күцәсн улс ямаран чигн көдлмшиг дааҗ һархиг иткүлв. Эдн өрк-бүлән кесгтән үзлго, эмнлһнд бәәһәд көдлсмн. Эн җилмүдин эргцд Манҗин Саглр көдлмшән үнн-чик седклтәһәр күцәһәд, кесг күүнд дөң болсмн. Энүнә ач-тус темдгләд, Әрәсән эрүл-менд харлһна министерствин Күндллһнә һашгар ачлсмн.
2021 җилд Манҗин Саглр Т.Хахлынован нертә медицинск колледжд немр сурһуль сурад, мергҗлтән өөдлүләд, шинҗллт кедг эрдмтә болв. Сүл һурвн җилдән эн гүн шинҗллтин әңгд көдлҗәнә. Эн әңгин һардач Дорҗин Ирина Саглр Николаевнад ах медицинск эгчин үүл даалһв. Манҗин Саглр медицинск көдләчнрин үүлдвриг залҗ цугнь дигтә-даратаһар күцәгдхиг диглнә. Энүнә келсәр, хамдан көдлҗәдг улс хоорндан ниитә бәәнә, кен-негнь гемин эс гиҗ өрк-бүлин уршгар цаг зуур эс көдлхлә, наадкснь терүг сольҗ чадна. Тегәд эдн нег-негндән дөң күргҗ, шинҗллт кехәр ирсн улст килмҗән тусхаҗ көдлнә.
- Мадн дунд ах үйин улс болн баһчуд бәәнә, тегәд шинкән сурһулян төгсәһәд күч-көлснә хаалһан эклҗәдг баахн мергҗлтнрт бидн дөңгән күргнәвидн. Эдн эрдмин халхар дарунь батрад, цугинь дасч авхин төлә медсән зааҗ өгнәвидн. Артан Антонина, Малиева Ольга, Дорҗин Нина, Манҗин Елизавета эн әңгд дөчн һар җилдән көдлҗәнә. Эдн байн дамшлтарн маднла хувалцна. Хамдан көдлҗәдг улс ниитә болхин төлә байрин өдрмүдт нәр-наад бүрдәҗ, нег-негндән белг белдҗ, ветеранмудан гиичд дууднавидн. Сән авъяст тохрсар, медицинск эгчин нарт-делкән Өдр угтҗ, мана эмнлһнд байрин хург болна. Олн җилдән көдлҗәдг улсин ач-тус хәрүлҗ, ачлвр бәрүлҗ өггднә, – гиҗ Саглр Николаевна келнә.
Һаһаннь үлгүрәр эрүл-мендин көдләчин эрдм шүүҗ авсн Манҗин Саглр бийиннь Дима көвүн бас эмч болх гиҗ санҗана. Арвн негтә көвүн гемнәд тас уга болсн цагтан өсхләрн эмч болнав, гиҗ экдән келнә. Саглр Николаевнан тоолврар, өрк-бүлд эмч бәәхлә, йир сән болдг эсий...

ДООҖАН Наталья

ЗУРГТ: П.Жемчуевин нертә таңһчин эмнлһнә әңгин ах медицинск эгч Манҗин Саглр