Селәнә сурһульчнр бат медрл авх зөвтә

25-05-2024, 14:22 | Тоолвр, Зіњг

Ода орн-нутгт болн таңһчд физикин, эсвин, техникин сән медрлтә сурһульчнр белдлһнд онц оньг өггдҗәнә. Цуг сурһульмудт тиим салврин классмуд ода үүлдҗәнә, тер көтлвриг цааранднь өргҗүлҗ делгрүлх кергтә. Яһад гихлә мана Хальмг ик сурһулин физикин болн эсвин дацңд таңһчин сурһульмудас зуг цөөкн күн орна.
Тер төриг хаһлхин төлә Хальмг ик сурһульд cеләнә болн балһсна арвтнриг негдүлҗ физикин болн эсвин сурһуль үүлдҗәнә. Хөн сард эднд хату цаас бәрүлҗ өгв. Сурһулин җилин эргцд эдн физикәр болн эсвәр онц медрл авчала. Күнд даалһвр яһҗ күцәхин тускар эдн вузин багшнрас цәәлһвр авв. 8-ч болн 9–ч классин йилһән сән сурһульчнрт дипломс бәрүлҗ өггдв. Эдн сурһулян сәәәнәр дасҗ эсвәр, физикәр йостаһар соньмсҗахан медүлв, тегәд 8-ч классин сурһульч Денис Коробейников болн 9-ч классин арвт Дмитрий Горяевд өөдән ачлвр бәрүлҗ өггдв.
Доладгч классин сурһульчнр ода деерән экләд, физикин болн эсвин сурһулин негдгч курсиг төгсәв, тер йовдлла ирлцүлҗ доцентнр Т.Б. Гольдварг болн С.С. Мучкаева эднд бас онц белгүдән белглв. Эднә эк-эцкнр багшнрт ханлтан өргв.
«Дарук сурһулин җилд бидн шин төсв күцәлһнд орҗанавидн. Тер төсвиг Хальмг ик сурһулин марһанд онц темдглҗ дөңнлә. Бидн ода хамгин түрүнд физикин болн эсвин номиг сурһульчнр дунд тархах зөвтәвидн. Тиим кевәр бидн таңһчин сурһульмудт дару-дарунь одад бәәхвидн», – гиҗ дацңгин һардач Елена Сумьянова келнә.
Тер мет эн хойр кичәләр сурһульчнр Хальмг ик сурһулин медлд бәәх Бичкдүдин ик сурһульд йирин көтлврәс үлү медрл авна. Энд класс болһнд 10 күн сурна. Тегәд гүн медрл авх цуг таал энд бәәнә. Болв сурһульчнр хамгин түрүнд Москван болн Санкт-Петербургин вузмудт орхар седнә. Эднәс зуг кесгнь Хальмг ик сурһульд ирҗ сурна.
Тиим кевәр ода ФМФИТ дацңгин багшнр хамгин түрүнд оютнрин күцәҗәдг номин шинҗллтин, иргчдән эдн ямаран эрдм авхин, альд көдлҗ чадхин тускар улм өргнәр йирин сурһульчнрт келҗ өгхәр седҗәнә. Программистин эрдмиг дацңд кесг оютнр дасна, тиим мергҗлтнр ода икәр керглгднә. Элст деер бән бәәҗ талдан балһснд эс гиҗ нам талдан орн-нутгт холас көдлмшән кеҗ болҗана. Болв түүнә төлә ЕГЭ-н шүүврән сәәнәр өгәд эсвин болн физикин медрлән ясрулх кергтә, түүнә тускар невчк эртәс ухалад, зуг эн дацңд сурһулин хөөн сурнав гиҗ күсл тәвхлә туста болх гиҗ сангдна.
Ода интернет өргнәр олзлҗ болҗана, Әрәсән дамшлтта багшнр интернетәр кичәлән өгәд, сурһульчнрин медрлинь байҗулна. Эс медсн юмиг дәкн-дәкн хәләһәд аштнь дигтәһәр медҗ авч болҗана, зуг сурһульчд тиим седкл бәәх зөвтә, тиигхлә ямаран чигн күнд төриг нүүрлгч багшнрас цәәлһвр авад медҗ болхмн.
Ода Әрәсәд номин болн сурһуль-эрдмин делгрлтд һол оньган өгчәнә, мана таңһчд кесг арвад сурһульмудт бат ясвр кегдв, шин кергсл орулгдв, тер таалыг олзлҗ медрлин илвтә делкәд орх күсл тәвх кергтә, нег үлү техникин медрлин үн өсчәх кемд тернь ик чинр зүүҗәнә.

ТҮРВӘН Һуна

Видео