Агрономчнр дамшлтарн хувалцв

01-06-2024, 15:30 | Общество, Таңһчин зәңгс, Зіњг, Селәнә эдл-аху

Шидр Яшалтан района Эсто-Алтай селәнд К.Марксин нертә СПК-н ул деер тәрәнә һазрин Өдрт нерәдсн хург болв. Городовиковск, Ик Буурла, Приютна райодын, тер мет Аһшин, Әәдрхнә, Ростовск, Шартун мүҗсин болн Сарпулин крайин селәнә эдл-ахун арһлачнр болн мергҗлтнр ирҗ орлцв.

Керг-үүлдврт орлцсн Хальмг Таңһчин селәнә эдл-ахун министр Гаван Тимурин келсәр, К.Марксин нертә СПК-д хург давснь темдгтә, тер юңгад гихлә нидн мел эн эдл-ахун көдләчнр буудян хамгин элвг урһц хураҗ авсмн гив.
– 2023 җилд таңһчин эдл-ахус 800 һар тонн буудян урһц хураҗ авла. Селәнә эдл-ахун министерств арһлачнриг дөңнҗ, шаңһас йилһгддг мөңгнә дем авлһнд туслна, – гиҗ Тимур Сергеевич темдглв.
Терүнәс нань таңһчд мөңг оруллһна халхар ик төсв күцәгдҗәнә, тернь терәнә эк эд-бод келһнә заводын тосхлт мөн. Ирлцңгү завод эн җилд секгдәд, нег һазра, тер мет хам-хоша бәәдг регионмудыг буудян терәнә экәр теткҗ чадхмн.
– Җил болһн әдл болхш, эн җил селән һазрт көдлҗәдг улсин төлә амр биш цаг болв, тер юңгад гихлә намрар хур баһар орсн билә, кесг эдл-ахус зураһан күцәҗ чадсн уга. Терүнәс нань хөн сард зәрм ормар киитрәд чигн бәәв. Тер бийнь теңгрин бәәдлиг учртан авч, цугинь күцәввидн, – гиҗ Нармин Морхаҗин нертә Хальмг номин-шинҗллтин күрәлңгин әңгин һардач, таңһчин ачта агрономч Борис Гольдварг цәәлһҗ келв. Хургт орлцачнрт күцәмҗ дурдҗ, тәрсн тәрәһән хадһлх кергтәг эн олнд тодлулв.
Терүнәс нань харһлтын йовудт царцаха уга келһнә туст ирлцңгү керг-үүлдврмүд давуллһна туск төр бас босхгдв. К.Марксин нертә СПК-н һардач Александр Игнатенко белдсн һазрин 28 әңг хургт орлцачнрт үзүлв. Тенд үүдсн кесг сурврмудт П.П.Лукьяненкон нертә буудян төрәр үүлддг келн-улсин төвин номтнр ирлцңгү хәрү өгв. Келхд, К.Марксин нертә СПК эн төвлә кесг җилдән нөкцлтҗ көдлҗәнә.
Тер өдрин маңһдуртнь ирлцңгү хург Целинн районд болв. Керг-үүлдврин йовудт селәнә эдл-ахун номтнр, мергҗлтнр болн кесг бүрдәцсин элчнр цаһан буудян намрин тәрәнә бәәдлиг шинҗлҗ хәләв. Хам-хоша бәәдг регионмудас ирсн элчнр дамшлтарн хувалцҗ, хальмг агрономчнрин көдлмшлә ил таньлдв. Хургиг ашлад, нертә агрономчнр хальмг арһлачнрт ирлцңгү сүв-селвгән өгв.

КАРСАНА Евгения

Видео