Олн үрнь эк-эцкин бахмҗ болдг

18-06-2024, 13:04 | Общество, Таңһчин зәңгс, Зіњг, Күн болн җирһл

Хөрн һар җил хооран өрк-бүлән өндәлһсн Виктор болн Екатерина Хулхачёвихн эндр зурһан үртә эк-эцк болад, эдндән чик сурһмҗ өгч, олна хормад багтҗ йовдг улс мөн. Эдн бәәсәрн байн, суусарн өнр болҗ, күүкдиннь күцәмҗнь бахмҗ үүдәҗ, нег һазра улс дунд тоомсрта, күндтә улс болҗ тоолгдна. Одахн эдн «Җилин сән гисн өрк-бүл» гидг Әрәсән марһана региональн девсңд орлцад, олн үртә өрк-бүлмүд дунд диилвр бәрв.

Ууһн Заяна күүкнь Шарту балһснд сурһуль сурч йовна, тегәд марһанд орлцҗ чадсн уга. Виктория, икр Аюр болн Аюш, Айлана болн отхн Аделина эк-эцктәһән хамдан марһанд орлцад, билг-эрдмән үзүлҗ, жюрин гешүдин седклинь авлв. Екатерина Валерьевна һартан эвтә, бийнь олн зүсн хувц уйна, кегдлмүд өлгнә, тегәд эн марһанд орлцхин төлә «Чунга-чанга» гидг мультфильмин дүрмүдин костюм уйҗ белдв. Авальнь Виктор Анатольевич бас һартан өөтә, бәрсән кедг залу, тегәд эн керм кеһәд, бас марһанд үзмҗтә кевәр орлцхин төлә шунв. Эдн ке-сәәхн хувц өмсәд, бииләд, эднә өрк-бүл ниитә болн билгтә болҗахиг медүлв.
Олн үртә экин келсәр, эн бийнь Лаганя района Красинское селәнд өсәд-боссмн. Сурһуль сурч йовсн цагтан эн олна бәәдл-җирһлд шунмһаһар орлцҗ, билг-эрдмин марһаст күцәмҗ бәрдг билә. Ээҗнь Екатерина Урусовна Сангаджиева һартан өөтә билә, тегәд ач күүкндән үүл бәрдгиг бичкнәснь авн дасхсмн. Дәкәд багш Валентина Николаевна Очкаева күүкдт һуйрин зүүтә кегдлмүд, шимтә олн зүсн хот-хол болһдгиг, үүл бәрдгиг дасхдг бәәсмн. Тегәд Екатерина багшиннь болн ээҗиннь нилчәр һартан эвтә болҗ өсв. Өрк-бүлән өндәлһәд, күүкдтә болсн цагт бичкдүдтән олн зүсн хувц уйҗ, сенр хот-хол болһҗ, кен-негинь тооһад һарһдг бәәсмн.
- Бидн авальтаһан олн үртә өрк-бүлмүдт өссн төләд өркән өндәлһсн цагт бас олн үртә болхар шиидвидн. Бичкдүд өсәд-босад, нег-негән хәләх, җирһлин хаалһдан түшг болх гиҗ авальм келнә. Би күүкдтән үүл бәрҗ, герин көдлмш кедгиг заанав, авальм болхла, көвүдт залу күүнә авц дасхна. Ууһн Заяна күүкн сурһулян йилһән сәәнәр төгсәснә хөөн юристин эрдм шүүҗ авв. Вика эн җил дунд сурһулян төгсәв, эн цаһан мөңгн медаляр ачлгдхмн. Икр Аюш Аюр хойр шулун-шудрмг көвүд болна, эн җил эдн 1-ч класс төгсәв, джиу-джитсу секцд болн бииһин кружокд орна. Айлана «Алтн түлкүр» бичкдүдин садт орна, отхн Аделина җил күрв, күүкд хамдан наадхдан дурта. Мана өнр-өсклң өрк-бүл ниитә, бичкдүд өлзәтә сән үрд болҗ өсчәнә, эк-эцкд терүнәс даву юмн керг уга. Мана зурһан үрн мана хөв-кишг болҗана, – гиҗ Екатерина Валерьевна келнә.
Герин эзн Ик Буурла района Магна бичкн селәнд өссмн. Ода эн Троицкое селәнә усна сурвлҗна багд көдлнә. Өрк-бүлән теҗәхин төлә эдн цөөкн мал бәрнә. Виктор Анатольевич ахтаһан хамдан нег хошт мал асрҗ, хаврин цагт төл авлһна, хөөннь хөд кирһлһнә кемд нег-негндән нөкд болна. Екатерина Валерьевна болхла, эрүл-менд харлһна көдләч, эн П.Жемчуевин нертә таңһчин эмнлһнд көдлн бәәҗ Хальмг ик сурһуль төгсәв. Ода олн үртә эк цаг-зуур көдлҗәхш.
- Олн үртә эк-эцк болна гидг ик дааврта болн чинртә керг, тегәд бидн авальтаһан күүкдтән чик сурһмҗ өгч, хамдан төрмүдән хаһлхар шуннавидн. Чик авг-бәрцин тускар күүндәд, өвкнриннь авъяс зааҗ өгнәвидн. Күүкд сән үрд болҗ өсәд, тааста эрдм шүүҗ авад, сән улс болҗ өстхә гиҗ дотран зальврнавидн. Күн болһнд өрк-бүлнь түшг болҗ, җирһлин хаалһд учрсн байр-зовлңгиг дааһад һархд урмд өгдг. Авальтаһан күүкдиннь кишг үзҗ, буурл үстә эмгн өвгн хойр болҗ хамдан көгшрхин тускар ухалнавидн, – гиҗ олн үртә эк келнә.
«Җилин сән гисн өрк-бүл» гидг Әрәсән марһана региональн девсңд диилвр бәрсн төләднь Хулхачёвихнә өрк-бүлд 50 миңһн арслңга мөрә өгв. Икр Аюш Аюр көвүд Заяна эгчнь сурч йовх Шарту балһснд одхин тускар кесгәс нааран сурад бәәһә, тегәд эдн шүүҗ авсн мөрәһәр өрк-бүләрн тиигәрән йовад амрхар зуралҗана.

ДООҖАН Наталья
ЗУРГТ: өнр-өсклң Хулхачёвихн

Видео