Олн давхрта гермүдт әрк-чаһр хулдҗ болшго

02-09-2024, 12:32 | Политика, Таңһчин зәңгс, Зіњг

Шидр Хальмг Таңһчин Улсин Хуралын (Парламентин) X (дарани биш) сессь болв. Сессин көдлмшт ЮФО-д Әрәсән Президентин зөвтә элчллтин Хальмг Таңһчар үүлддг ах федеральн инспектор Александр Беляев, таңһчин Улсин Хуралд Хальмг Таңһчин Толһачин элч Манҗин Араш, Хальмг Таңһчин залврин Ахлач Босхмҗин Гилән, зөв-йосна, зарһин болн бүртклһнә бүрдәцсин элчнр орлцв. Хальмг Таңһчин Улсин Хуралын (Парламентин) Ахлач Артем Михайлов сүүриг һардҗ давулв. Депутатнр ут тоодан зурһан төр хәләв.

«Хальмг Таңһчд әрк-чаһрин эдл-уушиг лавкст хулдлһна туст хаслһна немр диг-дара батллһна туск» гидг таңһчин закана 3-ч статьяд сольвр оруллһна тускар депутатнр күүндв. Эн төрәр таңһчин Улсин Хуралын Ахлач Артем Михайлов зәңгллһ кеһәд, депутатнр Аюша Гилән, Бадмин Вячеслав, Җаңһан Чимид, Дорҗин Артур, Кокан Михаил, Мацга Татьяна, Пүрбән Олег, Хачира Борис, Цекрә Зулта, Никитина Айс эн закана төсвин седвәр татсиг заав. Эн заканд сольвр орулхас урд таңһчин экономикин министерствлә, арһлачнрла, дотр-дундын кергүдин бүрдәцслә өргн күүндвр тогтагдҗ, «төгрг ширән» сүүр давулҗ, әмтнә ухан-тоолвр медҗ авгдсн билә. Суңһачнрла болдг харһлтст әмтн әрк-чаһр хулддг лавксин то өдр ирвәс өсәд йовхнь, нег үлү олн давхрта гермүдт тедн секгдснь нәрн төр болҗахиг зааҗ, дорас өсч йовх баһ үйд чик авг-бәрц батрулхин төлә тогтсн бәәдл харшлт күргҗәхиг темдглнә. Сүл цагт әрк-чаһр ууһад, аля-азд йовдл һарһсн, согтуһар көлг залад, зеткртә йовдл учрасн улсин то бас икдҗәнә, гиҗ Артем Васильевич келв. Депутатнр эн закана төсвиг нег дууһар дөңнв. Ирх җилин моһа сарин 1-әс авн эн закан экләд үүлдхмн, тегәд олн давхрта гермүдт бәәдг лавкст әрк-чаһр хулдгдшго болв.
Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Марина таңһчин экономикин төлә мергҗлтнриг белдлһнә, селәнә эдл-ахун, эрүл-менд харлһна, сурһуль-эрдмин болн нань чигн халхин бүрдәцст кадрмудын төр нәрн болҗахин тускар илдкл кев. Энүнә келсәр, сүл кесн то-дигәр мана таңһчд 1637 көдлмшч орм сул бәәнә, эрүл-менд харлһна бүрдәцст 499 мергҗлт керглгдҗәнә, сурһуль-эрдмин халхд 381 күн, шаңһа залврин бүрдәцст 148 мергҗлт керглгдҗәнә. Б.Б.Городовиковин нертә Хальмг ик сурһулин улд эмнлһнә дацң секгдснә ашт 2028 җилд таңһчин эмнлһст түрүн эмчнр күч-көлснә хаалһан эклхмн. Таңһчин бүрдәцст мергҗлтнриг көдлмшт орулҗ авлһна төлә немр тогтаврмуд, закад батлгдна, урмдулгч демин мөңг өглһнә, жилищн-коммунальн туслмҗин һару даңцалһна болн нань чигн керг-үүлдврмүд күцәгднә. Болв тер бийнь кесгнь цаг-зуур көдләд, дамшлт хоршасна хөөн талдан регионмудт көдлмш хәәҗ олна. Тогтсн бәәдлиг ясрулхин төлә селәдин, райодын болн таңһчин бүрдәцст ямр эрдмтә мергҗлтнр кергтә болҗахиг шинҗлх кергтә, гиҗ депутатнр шиидв.
Сессин йовудт депутатнр олн зүсн төр хәләҗ, сүв-селвг орулв, кесн көдлмшин тускар ахрар зәңглв.
Хальмг Таңһчин Улсин Хуралын Ахлач Артем Михайлов сүүрин ашиг диглв. Әрк-чаһриг олн-әмтн бәәдг гермүдт хулдшгон туск закана төсв белдхин төлә аһу ик көдлмш давулгдв, талдан регионмудын дамшлт олзлгдв, гиҗ Артем Васильевич келв.

ДООҖАН Наталья

Видео