Өнр-өсклң Очировихн

Эн җилин эклцәр кесн то-дигәр, мана таңһчд тәвн хойр миңһн һар олн үртә өрк-бүл бәәдгнь илдкгдв. Җил төгсчәнә, олн үртә өрк-бүлмүдин то улм өсәд йовна, гиҗ темдглх кергтә. Күн болһна җирһлд өрк-бүл онц орман эзлнә. Мел өрк-бүләс цугнь эклдг. Хамгин үнтәнь эк-эцк, аав-ээҗ, өөрхн элгн-садн болдг. «Садта күн – салата модн» гиҗ келдг юмн.
Мана таңһчд билгтә, тоомсрта, нерән дуудулҗ йовдг бүлмүд олн бәәнә. Тедн дунд Ик Буурл селәнд бәәдг Очировихнә өнр-өсклң өрк-бүл мөн. Җаңһр Батнасанович болн Ольга Борисовна дөрвн күүкән болн нег көвүһән өвкнрин авг-бәрцәр өскчәнә. Герин эзн «Газпром» бүрдәцин Ик Буурла района әңгд залачар көдлнә. Ольга Борисовна болхла Таганрог балһснд ик сурһуль төгсәһәд, кесг җилдән А.Пюрбеевин нертә Ик Буурла дунд сурһульд технологин болн зурлһна багшар көдлҗәнә. Хөрн һурвта Элистина ууһн үрнь Санкт-Петербург балһсна эмчин ик сурһульд сурчана, арвн нәәмтә Чингиз бас тенд политехникин колледжин оютн болна. Евгения, Саглр болн отхн Любовь дунд сурһульд сурчадг болна.
Эндр Очировихн тавн үрнәннь күцәмҗәр бахмҗ кеҗ бәәнә. Ниитә өрк-бүлд өсчәдг күүкд эк-эцкиннь авг-бәрциг дасч, байрин цуг өдрмүдиг хамдан темдглнә. Олн үртә өрк-бүлин өдрнь яһҗ эклнә гихлә, Ольга Борисовна эрт босад, өрүни хотан белднә. Дарунь үрдән серүләд, шимтә хотар тооһад, сурһульдан болн көдлмштән хамдан һарч йовна. Очра Ольга дунд сурһульд арвтнрт технологин болн зурлһна кичәлмүдиг өгсн деерән, терүнәс нань Ик Буурл селәнә немр сурһулин төвд ордг бичкдүдиг зурдг болн олн зүсн кегдлмүд кедг дасхна. Евгения болн Саглр «Юнармия» болн «Патриот» җисәнд орна. Отхн Любовь волейбол наадхдан, ду дуулхдан дурта, одахн «КТК-Р – билгтә бичкдүдт» нертә марһанд орлцҗ, лауреатын нер зүүснь бахмҗта болв.
Ямр чигн өрк-бүл мет Очировихн эврә авг-бәрцтә мөн. Ончта болн һарсн өдрмүдт нерәдсн байрт хамдан цуглрад, инәдтә-шуугатаһар давулна. Ольга Борисовнан келсәр, нәр болһнд эн «Иван да Марья» нертә әмтәхн торт болһна. Күүкднь экән дахад, шимтә хот кедг, герин үүл бәрдг бас дасв. Тер мет Очра Ольга һартан өөтә бер болсн төләдән Шин җилин байр угтҗ, һаза-дотакан сәәхрүлдг авъяста. Эрк биш әмд һацур хулдҗ авад, герин тал дунд углҗ тәвәд, эврә һарарн кесн кегдлмүдәр кеерүлнә. Хашаһан бас герлтә ут суңһугар буһ кеһәд сәәхрүлнә. Өөгүрнь давҗ һарсн улст эн байр-бахмҗ үүдәнә.
Тодлхас, хойр җил хооран Ольга Борисовна немр сурһулин төвин сурһульч Бембетә Бадмла хамдан Санкт-Петербург балһснд эрмдгтә бичкдүдин дунд давулгдсн «Өмәрән кесн ишкдл» нертә нарт-делкән марһанд орлцад, негдгч орм эзлсмн. Тиигхд Бадм багшиннь һардврт үкрә ясар тоһрун шовуг кеһәд ончрла. Терүнәс нань төвд билгтә олн күүкд сурна, тедн багшин һардврт олн зүсн соньн, сәәхн кегдлмүд кедг дасна.
Өдрин туршарт көдлмштән болн сурһульдан бәәсн Очировихн зуг асхарнь харһна. Гиҗгтә күүкднь эк-эцкнь ирхин өмн герән ахулад, халун хот кеһәд белдчкнә.
Өдгә цагт олн үртә өрк-бүлмүдиг дөңнҗәдг шаңһа дем йилһгдҗәнә. Эн дөңгиг Очировихн цугинь олзлҗана. «Сар болһн мөңгнә дем авчанавидн, эннь йир сән йовдл, ноха сард болхла сурһульчнрт өгдг мөңгәр күүкдтән хувц-хунр болн канцелярск эд-тавр хулдҗ аввидн», – гиҗ Ольга келв.
Эн җил Әрәсән Президентин зәрлгәр өрк-бүлин җил гиҗ зарлгдв. Тегәд олн үртә болхасн әәхмн биш, үрдин хоорндк хәрлцәг үзхлә, төрскнч седклтә иргнмүдиг өскчәнәвидн гиҗ эк-эцкин зүркн байрар дүүрнә. Тавн үрән өскәд, чик хаалһднь орулад, эднә хөв-кишгинь үзхәр зүткҗәнәвидн, гиҗ Очировихн келнә.
КАРСАНА Евгения