Орн-нутгин хамцлтыг батрулҗ

Крым Әрәсән ханьд хәрү орсна өдриг Хальмг Таңһчин сурһульчнр талдан регионмудла болн Крымла телетагт кеһәд өргмҗтәһәр темдглв.

Моһа сарин 18-д Крым Әрәсән ханьд хәрү орсна өдриг мана орн-нутгт өргнәр темдглнә. Хальмг Таңһчин сурһульмудын һардачнрин селвгчнрин нилчәр иньгллтин телетагт тер ончта өдрин урд бүрдәгдв.
Эн керг-үүлдврт мана таңһчас нань Әрәсән кесг регионмудын күүкд орлцв. Түрүн телетагт Яшалтан района Ульяновск сурһулин болн Крым Республикин Ливадийин санаторн сурһуль-интернатын бичкдүдиг болн арвтнриг негдүлв. Ульяновск сурһулин 2-ч «Б» классин «Орлята России» җисәнд орлцдг активистнр һардачин селвгч Анна Старшовала хамдан Крымин сурһульчнриг йөрәһәд, хамдан эврә җисәнә частриг дуулв. Крымин тууҗин болн сойлын, «Артек» лагерин туск медрләрн хувалцҗ эдн улм өөрхнәр хоорндан таньлдҗ иньгллтән батрулв.
Элстин С.Радонежскийин нертә Орс келн-улсин гимназьд хазгудын классмудын сурһульчнр болн багшнр, һардачнрин сурһмҗин салврин селвгчнр кесн залһана йовудт Севастополин, Печора балһсна (Коми Республик), Верхний Мамон селәнә (Воронежск мүҗ), Бурятин, Фокино балһсна (Приморск край) болн нань чигн регионмудын сурһульчнр орлцҗ Крымин тууҗин, эврә келн-улсин авъясин тускар күүндвр кеҗ, хазгуд Әрәсән тууҗд ямаран нилчән күргснә тускар тоолвран келв. Теднә сурһульмудт төрскнч ямаран төсвс күцәгдҗәхин тускар Севастополин сурһульмудын селвгчнр келҗ өгв.
Һурвдгч залһана күүндврт Әрәсән кесг регионмудын 40 сурһуль, тер тоод мана таңһчин Октябрьск района арвтнр орлцв. Тиим кевәр энд Феодосийин, Ростов-на-Дону балһсдын, Новосибирск, Челябинск, Курск, Костромской мүҗсин, Бурятин, Красноярск болн Краснодарск краймудын, Ростовин болн Белгородын, Волгоградын мүҗсин, Карелий Республикин болн кесг нань чигн региона сурһульчнр хамдан цуглрад эн ончта өдриг, Крым Әрәсән ханьд хәрү орсна тууҗин ик чинртә йовдлыг темдглв.
- Эн харһлт цуг орлцачнрт ик урмд өгв, йоста үр-иньгин таалд давв, – гиҗ Ик Царң сурһулин һардачин сурһмҗин салврин селвгч Бадман Елена тоолвран келв. – Бидн цугтан, альд бәәвв чигн, нег ик өрк-бүлин хүвнь болҗанавидн, Әрәсән болн Крымин, цуг регионмудын тууҗ мадниг негдүлҗәнә. Эн тагтар ул кеһәд, бидн мана иньгллтән батрулад бәәхүвидн, – гиҗ Елена Тюмяевна телетагтын һол учр-утхинь заав.
Тер мет Городовиковск балһсна олн салврта гимназьд телетагтар кесн наадн болв. Энүнд ах-дү болҗах ЛНР-ин, Севастополин болн Городовиковскин сурһульмуд орлцв. «Селвгчнрин олн зүсн хургудт орлцад би Севастополин 26-ч тойгта школын һардачин селвгч Сергей Шакировола таньлдлав. Сергей Витальевич Крымин сойлыг болн тууҗиг йилһән сәәнәр меднә, тер медрләрн эврә бүрдәцин, мана гимназин болн ЛНР-ин Антрацитовск района Нижненагольчикск сурһулин арвтнрт келҗ өгв. Мана гимназин сурһульчнрас кесгнь «Артек» лагерьт одла, Крымин йиртмҗ болн бичкдүдин төвд амрлһн теднд ик гидгәр таасгдла, түүнә тускар чигн эдн тодлврарн хувалцла», – гиҗ селвгч Наталья Шевцова келҗ өгв. Наталья Владмировнан седвәрәр эн тагт болн ухан-медрлән сөрлһнә наадн бүрдәгдлә.
Энүнд орлцачнриг Городовиковск балһсна гимназин һардач Виктория Лайпанова йөрәҗ, Крымин, Әрәсән талдан регионмудын тууҗ болн сойлыг шинҗллһн ик чинр зүүнә гиҗ заав. Крымин тоха арлын тууҗин домгудын тускар сурһульчнр нег-негндән келҗ өгв.
Тиим залһан регионмудын сурһульчнрин хамцуллһнд, теднә ухан-серлин болн оюни делгрлтд туслна гиҗ селвгчнр тоолвран келв. Өдгә цагин кесг технологий регионмуд хорндк залһлдаг батрулҗ, төрскндән дурлһиг, итклтә боллһиг сурһмлҗ мана орн-нутгин герлтә иргчин бат ул тәвҗәнә. Ода нарт-делкән бәәдл түргәр сольгдад йовна, түүнә ашт цуг орн-нутгудын делгрлтин төлә сән таал үүдәгдх гиҗ сангдна. Цуг делкән төлә ик чинртә тиим кергиг бәәдл-җирһлд тохрахин төлә Әрәсә ик тәвцән орулҗана, мана орн-нутгин регионмудын хамцлт батрад йовхла тер дааврта кергиг улм йовудтаһар болн сән аштаһар күцәҗ болхмн.

ТҮРВӘН Һуна