Зөргтә командир бәәсмн

06-05-2025, 13:00 | Таңһчин зәңгс » Эдн Төрскән харсла

1941 җилин мөчн сарин сәәхн уняртсн өрүн билә. Генткн!.. Чилгр теңгрт оһтрһу күрҗңнәд, һал цәклсн мет дән эклснь соңсгдв.
Төрскн һазр-усан аврлт уга хортнас харссн олн келн-әмтнә дунд Хальмгин хәәртә үрд, тедн дунд багшнр бас ик тәвцән орулсн болдг.
1941-1945-ч җилмүдин Төрскән харсгч Алдр дәәнә түрүн өдрмүдт кесг миңһәд багш Улан цергин зергләнд орсмн. Теднә негнь, мини эцк Анҗуран Яман бәәсмн. Эцкм 1910 җилд Көтчнрә нутга Талтахна әңгин Цаһан Нур селәнд һарсмн. 1925 җилд Баһ Дөрвдә күцц биш дунд сурһуль төгсәһәд, Әәдрхнә багшнрин техникумд, хөөннь Шарту балһсна Шенявскин нертә багшнрин ик сурһульд сурв. Тегәд 1933 җиләс авн дән эклтл багшлсмн.
Дән эклхлә, Анҗуран Яман Улан цергин зергләнд орад Ростовск йовһн цергә сурһульд сурсн болдг. 1941 җилин хулһн сарин дундурар курсантнрас батальон тогтад, Ростов балһсиг харсх, тер мет окоп малтх, штабин бәәриг хашалх, кесг даалһвр эднд өггдсмн.
1942 җилин туула сард шин батальониг Анҗуран Яман һардв. Эднә батальон төмр хаалһиг манх зөвтә билә. Үвлин туршарт Курск, Орел, Москва балһсд талк төмр хаалһиг харсмн.
1942 җилин хөн сарин эклцәр Анҗуран Яман Деед зергин командирмүдин шишлң сурһульд йовулгдсмн. Тер сурһулян төгсәснә хөөн 48-ч Әәрмин зергләнд орҗасн 81-ч онц лыжар йовдг батальонд тусв.
Хальмг теегт өсч-боссн күн иим кергслиг олзлҗ чадлго бәәв. Арһ уга, шулун гидгәр дасч авх кергтә болв. Эн йовдлын тускар эцкм иигҗ келдмн: «Эмәлтә мөрән модн мөрнд сольлав».
Анҗуран Ямана һардврт бәәсн батальонд ик зунь баһчуд бәәсмн. Дәәнә хаалһнь: Ростов, Воронеж, Сталинград, Курск, Армавир болн нань чигн балһсар давсмн.
Курск бүслврт ик шав авсмн. Кесг дәкҗ госпитальд орад,эдгәд, хәрү дивизьдән ирдг бәәсмн. Эн ик дәәнә һалд эцкм зүн нүдән геесмн.
Анҗуран Яман Төрскән харсгч Алдр дәәнә I болн II девсңгүдин орденмүдәр, «Германиг диилсн төлә», Алдр Диилврин 20, 30, 50, 70-ч җилмүдин өөнд нерәдсн медальмүдәр ачлгдсн билә.

БАДМИН Римма

Видео