Бат ясвр сән йовудтаһар күцәгдҗәнә

Ода сурһульмудт ОБЗР болн «Технология» кичәлмүд орулгдҗана, урднь чигн сурһульчнр ирлцңгү медрл авчасмн, болв ода эн кичәлмүдт орн-нутгин болн таңһчин һардвр улм ик оньган өгчәнә. Яһад гихлә тиим кичәлмүдт арвтнриг Төрскән харслһнд белднә, күч-көлснә сурһмҗ өгнә. Түүнә тускар Әрәсән гегән-герлин Министерствин селвлцәнд тодрха күүндвр болв, түүнә йовудт цуг регионмудын, тер тоод Хальмг Таңһчин залврин, сурһуль-эрдмин министерствин һардачнр болн дааврта көдләчнр орлцв.

Тер мет сурһульмудт болн садмудт бат ясврин көдлмш, «Земск багш» көтлвр яһҗ күцәгдҗәхин, кадрмудын төр яһҗ хаһлгдҗахин, ноха сард болх багшнрин хург яһҗ белдгдҗәхин тускар селвлцәнд өргн күүндвр болв. Эн җил таңһчин олна сурһуль-эрдмин 88 бүрдәцин ирлцңгү кичәлмүдин шишлң хорасиг зөвтә кергсләр тетклһн зуралгдҗана гиҗ келх кергтә.
Цааранднь заахла, «Баһчуд болн бичкдүд» гидг келн-улсин төсвин йовудт таңһчин 10 сурһульд бат ясвр кегдҗәнә. Энүнә тускар маднд Хар Һазра района Адг селәнә дунд сурһулин һардач Манҗин Мария келҗ өгв.
«Мана сурһулин гер 1977 җилд тосхгдла, тер цагас нааран бат ясвр кегдәд уга билә. Ноха сарин 10 күртл цуг ясвр төгсх зөвтә. Тосхлтын йовудыг цугтан бүрткҗәнә, эк-эцкнр, багшнр, района толһач, урднь мана эдл-ахуг һардҗ йовсн Болдра Валерий дару-дарунь ирҗ хәләнә, - гиҗ Мария Халгаевна цәәлһвр өгв.
Ода Адг селәнә сурһулин герт көдлмшин ик зунь күцәгдчкв, эн өдрмүдт сурһулин һазак бәәдлнь шинрүлгдҗәнә, классмудын хораст линолеум делгҗәнә. Тиим кевәр сурһулин гер йостаһар шинрүлгдх.
Тер мет Яшкуль селәнә сурһуль-интернатд бас бат ясвр күцәгдҗәнә, ноха сарин дундурар эдлврт орулгдх, энд цугнь цаг-болзгтнь күцәгдҗәнә гиҗ интернатын һардач Нарна Ноһан келв. Ода эрсмүд шалдлһна, ораһинь, дулана, усна сурвлҗиг шинрүллһнә көдлмш күцәгдҗәнә, бүклдән сурһулин гер шин кергсләр теткгдхмн.
Бас тиим көдлмшиг Элстин 5-ч болн 24-ч тойгта садмудт күцәҗәнә. Сурһуль-эрдмин болн номин министерств, таңһчин прокуратур энүнә йовудыг бүрткҗәнә, тегәд цаг-болзгтнь болн сән чинртәһәр кегдхнь маһд уга. Тенд тосхлтын өдгә цага материалмуд олзлгдҗана, тегәд кесг арвад җилдән ясвр кегдәд уга сурһульмудын болн садмудын шинрүлгдсн гермүдиг һаха сарин 1-д нааран ирх бичкдүд болн авртнр нам таньшго гиҗ лавтаһар келҗ болхмн. Тиим кевәр күүкд болн бичкдүд сурһулин шин җиләс авн сән таалд сурч, гүн медрл авхмн.

ҖААХАН Бадм