Бичкдүдин тускар ухалад

27-10-2020, 16:14 | Таңһчин зәңгс » Эндрк ґдрин тґрір

Одахн Элст балһсна медлд ордг Геологический гидг поселкд бәәрн әмтнә седвәрәр бичкдүд нааддг тавлңд сән таал тогтагдв. Эдн эргндк һазриг хог-богас ахулад, энд олн зүсн урһмл суулһв.
Эн поселкд бәәдг улс олн җилдән бичкдүдин төлә нааддг талвң тосххиг балһсна һардвриг сурҗ, бәәрн күүкд-көвүдт цаган сергмҗтәһәр болн тустаһар давулдг орм уга гиҗ зовҗала. Олн җилдән эдниг үүмүлҗәсн төр эн җил хаһлгдв. «Стройконструкция» гидг ООО социальн даавран медүлҗ бичкдүдин төлә нааддг талвң тосхв. Терүнә тосхлт цуг некврлә ирлцәтәһәр күцәгдхиг Элст балһсна һардвр, ЭГС-ин депутатнр Анҗра Софья болн Каманҗан Александр бүрткв. Эн объект ке-сәәхн болн бичкдүдт әәмшг уга болв, күүкд-көвүд энд ирҗ амрхдан дурта.
Поселкин әмтн шин объектиг әрүнәр олзлҗ, эн удан цагтан олзлгдҗ бүрн-бүтн бәәхиг хәләнә. Эн дулан намрин өдрмүдт суулһсн модд болн цецгәс хавртан цецгәрҗ, зуни халун кемд сүүдр өгч бичкдүдин талвңгиг кеерүлв. Тиигәд бәәрн улс арһ-чидлән негдүлҗ, сән кергин седвәр татҗ, бәәсн һазртан эзн кевәр бәәх кергтәг эврә үлгүрәрн үзүлв.
Дәкәд нег үзмҗтә кергиг Үстин района Үст селәнд бәәдг Увшин Санҗ күцәв. Энд өсәд-боссн баахн залу күн хотл балһснд урднь бәәдг билә, болв одахн эн төрскн бичкн селәндән нүүҗ ирв. Энд эн крестьянск-фермерск эдл-аху бүрдәҗ, мал асрлһна халхар үүлдҗәнә. Нидн селәнә тал дунд бичкдүдин төлә нааддг талвң тосхгдсн билә. Эн җил болхла терүнә өөр воркаут углҗ тәвгдв. Үст селәнә муниципальн бүрдәцин толһач Дьякован Иринан келсәр, бичкдүдин талвңд сән таал тогталһнд баахн фермер демән күргв.
Үст селәнә муниципальн бүрдәц нидн спортивн кергсл хулдҗ авсн билә. Терүг СМО-н медлд ордг Белоозерн гидг селәнд углҗ тәвхәр шиидсмн. Тегәд эн җил бәәрн малчнр болн «Үст» селәнә эдл-ахун дөңгәр терүг бичкдүдин талвңд углҗ тәвв. Келхд, селәнә бәәрн улс терүг бийснь арһ-чидләрн тәвв, волейбол наддг гөлм хулдҗ авв. Крестьянск-фермерск эдл-ахун толһач Һәрән Владимир цемент хулдҗ авлһнд мөңг йилһв, Бадм-Һәрән Сергей болн «Үст» селәнә эдл-ахун һардвр кергслиг авч ирхд дөң-тусан күргв.
– Мана нег һазра улс буйнч седклтә, бичкн селәндән эңкр болҗахнь ик бахмҗ үүдәнә. Селәнд болдг олн зүсн керг-үүлдвр иим цаһан седклтә улсин дөң угаһар давулгдхш. Бәәрн арһлачнр, фермермүд болн селәнә эдл-ахун һардвр ямр нег төр хаһллһнд демән күргҗ, арһ-чидләрн орлцна. Эднә керг өмәрән йовҗ, олзта-туста болтха. Мана бичкн селән делгрҗ, җил ирвәс сәәхрҗ өргҗәд йовтха. Дорас өсч йовх бичкдүд хөвтә-кишгтә, эрүл-менд болн чаңһ-чиирг өсхин төлә эднд сән таал тогтаснд орлцсн улст күцәмҗ дурдҗанавидн, – гиҗ селәнә муниципальн бүрдәцин толһач Дьякован Ирина келв.
Седвәртә, өсәд-боссн һазртан эңкр, буйнч седклтә улсин ач-тусар эднә бичкн селәдт бичкдүдин төлә сән кец-таал тогтагдснь олнд үлгүр-үзмҗ болх зөвтә гиҗ сангдна. Эднә кергин тускар соңссн-медсн бичкдүд бас төрскн һазртан өлзәтә үрд болҗ өсхнь маһд уга.

ДАВАН Наталья
ЭГС-ин барин цергллтин цоксн зург


Бичкдүдин тускар ухалад