Тавн үрнь тавн хурһн мет ниитә

27-11-2020, 15:01 | Таңһчин зәңгс » Эндрк ґдрин тґрір

Хөр һар җилин туршарт бидн намрин сүл амрлһна өдрлә экин Өдр темдглнәвидн. Эн хамгин сәәхн болн күн болһнд өөрхн байр болдгнь маһд уга. Күн болһн эн сән өдрлә эңкр экиннь, хәәртә ээҗиннь ач хәрүлҗ, ханлтан өргҗ, бүлән үгән нерәдҗ йөрәхәр адһна.
Ик Буурл селәнд бәәдг өнр-өсклң Лиджиевихнә өрк-бүлд эн өдр өрүн эртәс авн шуугата-байрта болна. Тавн үртә баахн экиг, герин эзн күүкд күүг эн өдр күүкднь болн эңкр авальнь йөрәнә, бүлән үгән нерәднә. Күүкднь экдән эврән кесн кегдлмүд белглҗ, ду-бииһән һарһҗ билг-эрдмәрн байрлулна. Ууһн Нарн гитар цокна, Александр болн Өлзәтә ду дуулна, икр Нәдвд болн Бамба тогляд, ахнран дахад биилнә. Экнь эн өдр сенр болн шимтә хот-хол белдәд, һуйрин зүүтә кегдлмүд болһад, цуһар ширәһән эргәд сууна. Көдлмш дала болад хая өрк-бүлтәһән амрлһна өдрән давулдг герин эзн Баатр гертнь цевр-цер болдгнь, күүкднь сурһулян сәәнәр сурчахднь, билг-эрдмин болн спортын халхар күцәмҗ бәрдгнь авалиннь ач-тус болҗахиг меднә.
- Бидн Городовиковск балһснд Башантинск аграрн колледжд сурчаһад өрк-бүлән өндәлһсн биләвидн. Тенд мана хойр көвүн һарв. Сурһулян төгсәснә хөөн бидн нааран нүүҗ ирвидн. Энд күүкн болн икр көвүд һарад, олн үртә өрк-бүл болвидн. Бидн хадм эк-эцктәһән бәәнәвидн. Эн җил мана аав гемин уршгар сәәһән хәәв, ээҗмдн маднд түшг болҗ ачнран арднь орҗ хәләҗәнә. Келхд, би икр көвүд җилтә болхла көдлмшт һарлав, тегәд эдн ээҗин килмҗтә хәләврт өсчәнә. Хадм экм цаһан седклтә, нанд ямр нег төрәр сүв-селвгән өгч, һарлдсн күүкнлә әдл тоолна. Тегәд экин сән Өдрин өмн өргнд Боян Мясяевнад зүркни ханлтан өргҗәнәв, ут наста болтха, ачнртан нүдн-амн болҗ йовтха,- гиҗ Люба бернь келнә.
Лиджиевихн эврә эдл-аху бәрнә, тегәд малыг асрад сәәнәр хәләх кергтә болна. Эднә бичкдүд эк-эцкдән болн аав-ээҗдән нөкд болҗ, хаша-хаац ясдг, мал асрдг дассмн. Баатр Николаевич ода Маныч селәнд полицин участкин көдләч болна, эн зөв-йос харлһна халхар арв һар җилдән үүлдҗәнә. Любовь Александровна района миграционн пунктд инспекторар көдлнә. Эк-эцкнь көдлмштән бәәсн цагт көвүднь малдан хот-хол өгәд, герин көдлмш кеһәд, эвдрсн ямр нег тоотыг ясад нөкд болна. Өлзәт икр дүүнрән хәләҗ, теднән уһаһад, хотынь өгәд, ээҗдән дөң болна. Дәкәд эднә күүкд спортар соньмсна, билг-эрдмин халхар үүлднә. Нарн Саша хойр греко-римск бөк бәрлдәнә секцд орлцдг билә, ода эдн волейболар болн баскетболар соньмсна. Өлзәт района «Торһа» ансамбльд орна, эн шаваш дуулна.
Сул цаг учрхла Любовь Александровна күүкдтән хувц-хунр өлгхдән, хамдан дегтр умшхдан дурта. Энүнә келсәр, экнь Надежда Васильевна Михайленко дөрвн үрндән үүл бәрдг, герин көдлмш кедг дасхсмн, цаган тустаһар давулх кергтә гисн сурһмҗ өгсмн. Ода Люба бер эврәннь тавн үрндән бас чик сурһмҗ өгч, чик авг-бәрцәрн эднд үлгүр болхар зүткнә. Баатр болн Любовь Лиджиевихн Ик Буурла сурһулин бәәдл-җирһлд шунмһаһар орлцна, күүкдтәһән кесг марһасин дииләчнр болна. Күн болһн хамгин түрүнд өрк-бүләсн сурһмҗ эк-эцкәсн үлгүр авдгиг сәәнәр меднә. Экин өдр угтҗ Хальмг Таңһчин Толһач Хаска Батун зәрлгәс иштә Баатр болн Любовь Лиджиевихн «Күүкдтән чик сурһмҗ өгсн төләдән» гидг темдгәр ачлгдснь эднд ик байр-бахмҗ үүдәв.

ДАВАН Наталья