Тәрлһнә кем эклв

21-01-2021, 15:24 | Общество, Зіњг

Туула сарин 18-әс авн Әрәсәд коронавирусин тәрлһ тәвүлх өргн кем эклв. Әрәсән Правительствин ахлач Михаил Мишустинә келсәр, эн тәрлһиг кен болв чигн эврә дурарн авч чадҗана. Эн төләд Әрәсән регион болһнд тәрлһнә кесг һазр секчәнә.

Хальмг Танһчд район болһнд болн Элст балһсна поликлиникд шишлң кабинетмүд экләд көдлҗәнә. Элстин болн Целинн района улс: 8-961-395-31-50 утсар җиңнүләд тәрлһ авхан медүлҗ чадҗана. Райодын улс бәәрн поликлиникст тәрлһ авч чадхмн. Таңһчин эрүл-менд харлһна министерствин зәңглсәр, Хальмгур Гамалейин нертә ном шинҗллһнә Төвин «Гам-ковид-вак» («Спутник V») болн “Вектор” номин Төвин «ЭпиВакКорона» гидг нертә 1000 вакцин ирсн бәәнә. Шидр тәрлһиг таңһчин эрүл-менд харлһна министр Кикенә Юрий авсмн. Министрин келсәр, хамгин түрүнд эн гемәс хөрлһнә халхд көдлҗ йовх эрүл-менд харлһна көдләчнр намрин сармудт тәрлһ авсмн. Ода деерән Хальмгт 500 шаху күн тәрлһ авсн бәәнә. Тәрлһ авсн цуг улс гем уга, сән бәәнә. Шин ирсн тәрлһиг әмтнд өңгәр болн сән дурар кехмн. Тегәд Хальмгт эн тәрлһиг 60% улст тәвхәр зуралҗана. Хамгин түрүнд эмнлһст, сурһульмудт, бичкдүдин садмут, цагдад (полицд) көдлҗ йовх болн медәтә улс авхмн.
Хальмг Таңһчин эрүл-менд харлһна министерствин өцклдүрк зәңглсәр, пандемий эклсн цагасн авн Хальмгт 16668 күн эн гемәр гемтв. Теднәснь 13902 күн эмнлһ авсна хөөн эдгв. Сүл хонгт кесн шинҗллтсин ашт 87 күүнд эн хальдврта гем илдкгдв. Өцклдүр кесн то-дигәр, таңһчин эмнлһсин улд үүлдҗәдг госпитальмудт 813 күн эмнлһ авчахнь медгдв. 1-ч госпитальд – 71 күн, 3-ч – 320, 4-ч – 64, КГУ-н ул деер бәәх госпитальд – 69, Деед Яшкульд – 94 күн эмнлһ авчана. Район болһнд гемтсн улсин тонь бас баһрҗахш: Яшкулин районд ода 40, Көтчнрә – 36, Хар Һазра – 22, Городовиковск – 24, Приютна – 21, Үстин – 15, Лаганя райодт 17 күн эмнлһнд бәәнә. Теднәс 24 күн күндәр гемтҗәнә, 12 күн ИВЛ-аппаратар ки авчана. Һундл төрхд, эн гемәс көлтә дәкәд хойр күн насан барв, тиигәд пандемий эклснәс авн 231 күн сәәһән хәәв. 4258 күн гемтә улсла хәрлцсн төләдән гертән бәәнә, эднә бәәдлиг эмчнр бүрткнә.
Тәрлһнә кем эклсн болв чигн олн-әмтн цуглрдг һазрт чирәдән хааһул өмсәд, һаран эд-бод кеһәд бәәх кергтә. Саглуллһна некврмүд эрк биш күцәхмн. Эс тиигхлә бәәдл ясршго.

Мана зәңгч

Видео