Төрскнч седклтә баһчудыг сурһмҗлхин төлә

Санкт-Петербургас хол биш бәәдг Кингисепп балһснд дунд сурһульд физикин багшар көдлҗәсн цагтан Дольган Ханаев хөвән олад, Елена күүкнлә өрк-бүлән өндәлһв. Хөөннь баахн өрк-бүл Приморск крайин Чугуевск района Ленино селәнүр нүүһәд, бәәрн сурһульд багшлдг болв. 2022 җилд цергә шишлң керг-үүлдвр эклхлә, Еленан эцкнь эврә сән дурар терүнд орлцх шиидвр авв. Өөрхн элгн-саднь болн үүрмүднь бас бооца батлад, СВО-д орлцҗадгиг медәд, Дольган бас эврә сән дурар Приморск крайин цергә комиссариатд ирв. Багшар көдлҗәдг төләдән эн гертән үлдҗ чадх билә, зуг өвкнриннь залу-зөрмг авъясар эн Төрскнәннь харсачнрин зергләнд орх зөвтә гиҗ тоолв.
- Эк-эцкдән эврәннь шиидврин тускар келсн угав. Зуг авальдан удл уга цергә шишлң керг-үүлдврт орлцхар йовҗахин тускар келсн биләв. Цергә даалһвр күцәх һазртан күрчкәд, би эк-эцк хойртан җиңнүлҗ зәңгәрн хувалцлав. Приморск крайин цергчнрлә хамдан тиигәрән одсн төләдән талдан хальмгудла харһсн угав, болв бидн цуһар хоорндан ниитә бәәҗ, нег-негән дөңнҗ, ахнр-дүүнр кевтә бәәввидн. Нег дәкҗ хортн мадниг HIMARS ракетәр дәврәд, би барун һаран күндәр шав талав. Нанла хамдан церглҗәсн Александр нанд түрүн дөң күргәд, цусн зогслго асхрад бәәхлә, бий деерән һарһҗ авад, дарунь көлг олад, района эмнлһнд күргв. Дала цус гееһәд, би уха-сегәһән гееһәд, күнд биләв. Невчкн оратсн болхла, әәмшг учрх билә гиҗ эмчнр үүрмүдтм келсн бәәҗ. Нанд месллһ кеһәд, хөөннь госпитальд күргв. Күнд шав авсна тускар би эк-эцкдән зуг хойр өдр давад зәңглләв. Әмд үлдсндм байрлад, эк-эцкм намаг дөңнв. Җил хооран мана өрк-бүлд көвүн һарв, тегәд бидн мини әм аврсн Александрин нер өгх шиидвр аввидн.
Эн талдан ветеранмудла хамдан таңһчин сурһульчнрла болн оютнрла дару-дарунь харһҗ, төрскнч сурһмҗин тускар күүнднә. Тиигәд, одахн Баатрмудын Өдрлә эн Элст балһсна 17-ч тойгта сурһульд болсн харһлтд орлцв. «Төрскән харсачнр» гидг шаңһа саңгин таңһчд үүлддг әңгин дөңгәр эн көдлмшәр теткгдв, эмнлһнә туст бас энүнд дөң күргнә. Ода Дольган Юрьевич Баһ Дөрвдә района баһчудын төвин һардачин үүл дааҗана. Төвин улд цергә шишлң керг-үүлдврт орлцачнрт дулан хувц, хот-хол, эм болн нань чигн кегдл цуглулна. Олна бәәдл-җирһлд орлцҗ, дорас өсч йовх баһ үйд төрскнч сурһмҗ өглһнд, цергчнриг дөңнлһнә керг күцәлһнд тәвцән орулҗадг төләднь СВО-н ветеран Дольган Ханаевд шидр Баатрмудын Өдрт нерәдгдсн байрин хургт Хальмг Таңһчин залврин Ханлтын бичг бәрүлҗ өгв.
- Дорас өсч йовдг баһ үйд төрскнч сурһмҗ өглһн ик чинртә болн дааврта керг болна. Тенд дәәлдҗ йовсн залу улс бичкдүдәс ирсн бичгүдиг умшҗ, бүлән үгәрнь урмд авч, уралан зөрнә. Нанла хамдан йовсн нег цергч бичкн көвүнә зургиг зүркнәннь өөр хадһлҗ, тернь бу-селмәс харсна гиҗ келдмн. Тиим йовдлмудын тускар келҗ өгхлә, күүкд-көвүд цергчнрт дөңгән күргҗ, буйнч седклин кергт орлцхар шунна. Эврәннь җирһлин тускар ухаллго үүриннь әм аврхар зөрмг йовдл һарһсн цергчнрин туск тодлврмуд бас бичкдүдин зүрк авлна. Маднд болхла бичкдүдлә болсн харһлтс бас ик чидл өгнә. Бидн эднә сәәхн иргчин төлә цергә даалһвран үнн кевәр күцәҗәнәвидн, – гиҗ Дольган Юрьевич темдглнә.

ДООҖАН Наталья