Бельцгә Эрднь нерән мөңкрүлв

Әрәсән цергчнр Донбасст дәврлһән түргдүлҗ Курск мүҗиг чигн сулдхлһна кергән цааранднь давулҗана. Тиим кевәр мана цергин зөргтә дәәчнр Курск мүҗиг бүклднь өшәтнрәс цеврлһнә ик чинртә кергиг түргәр бүтәхәр зүткчәнә.

Тер тоод Октябрьск района РЭС-т Ик Царң селәнд көдлҗәсн инженер Бельцгә Эрднь зөргтә үүлдврән күцәҗ мана цергин дәврлһиг шунмһадулҗала.
Цергә шишлң керг-үүлдвр эклҗәсн саамла 2022 җилин һаха сарин 22-т Эрднь Валерьевич цергт мордв. Түүнә хөөн лу сарин 10 күртл сурһулин әңгд шин таалд дәәлдлһнә эв-довиг дасчала. Цааранднь сержант Бельцгә Эрднь десантын-дәврлһнә батальона ханьд церглв, 2023 җилин хөн сарин 20-д Артемовск балһсна захд болҗасн догшн дәәлдәнд өшәтнрин дәврлһиг зогсаҗасн кемд зөргтә йовдлан үзүлҗ әмнәсн хаһцла.
Түүнә цергә әңгин һардвр хальмг баатриг ачллһна туск бәрмт цаас бичв. 2024 җилин мөрн сарин 28-д батлсн Әрәсән Президентин зәрлгәр Бельцгә Эрднь Залу-зөргин орденәр ачлгдла. Цергә даалһвран әмән әрвллго, залу-зөргтәһәр күцәснднь өөдән ачлврар әәмшг угаһар үүлдҗәсн хальмг дәәч ачлгдла.
«Хальмг күн эврә өрк-бүлән, һазран харсх зөвтә, тер даалһвран би ода күцәҗәнәв, удл уга амрлһнд ирхлә таднла харһҗ цаган сәәнәр давулхвидн. Би таднан санҗанав, сәәнәр суртн, мамаһан соңстн», – гиҗ цөөкн бичгүдтән Эрднь хойр көвүндән болн күүкндән бичҗәсмн. Бичкн көвүнь Ринчин удл уга тавта болхмн. Айта күүкн ода 12-та.
Эләд көвүн 14-тә Яраңк ода Әрәсән мөшклһнә комитетин Аһш балһсна кадетмүдин корпуст сурһульч болна. Хулһн сарин 20-д Сталинградын дәәлдән болсн Мамайин толһа деер кадетмүд андһаран өгв. Эн байрин сәәхн өдрлә Яраңкад эцкиннь ачлвриг «Дәәч» гидг төвин һардач Җаңһан Чимид бәрүлҗ өгв.
Һурвн үрнь эцкиннь нер чееҗдән хадһлҗ, түүнәс үлгүр авна. Эрднь Валерьевич һучн долатадан Төрскән харслһна туурмҗта кергән күцәһәд әмнәсн хаһцла. 1986 җилин ноха сарин 17-д Октябрьск района Мирный селәнд һарсмн. Бәәрн сурһульд одла, терүг 2003 җилд төгсәлә. Эврә классин күүкдт үлгүр болад, олна кергүдт шунмһаһар орлцҗала, сәәнәр сурчала. Сурһулян чиләснә хөөн Аһшин мүҗин Камышин балһснд бәәршлҗәсн әңгд церглҗәлә, хөөннь бооца батлад, бас нег җилдән цергә эв-дован гүүдүлв.
Цааранднь 2011 җиләс авн 2014 җил күртл Элстин автохаалһин техникумд сурчала, инженер-электрикин эрдм дасчала. Эн эрдмәрн Октябрьск района РЭС-т көдлҗәлә. Үүрмүднь энүг күндлҗәлә, йилһән сән көдләч болҗ тоолгдҗала.
Ода эцкиннь туурмҗта баатрин, Төрскән харсачин нериг көвүнь Яраңк дуудулҗана.
«Яраңк кадетмүдин сурһульд түргәр иҗлдв, ода йирин сурһульд сурхар седҗәхш, сән сурһульч болҗ энд тоолгдна. Рязань балһснд болсн тууҗин төсвин марһанд Яраңкаг нег үүрләнь йовулв. Мөшкәчин эрдмиг цааранднь дасхар бәәнә», – гиҗ көвүнәннь тускар экнь Полина Петровна келнә.
Кадетин корпус йирин сурһульла әдл, энд 11-ч класс күртл сурна, дәкәд вузд орҗ болҗана.
Тиим кевәр Яраңк эврә хаалһан йилһәд авчксн бәәнә, билгтә көвүнд бидн күцәмҗ дурдҗанавидн. Яраңк сурчасн Элстин олн салврта гимназьд хальмг баатр Бельцгә Эрднин туск санлыг тевчнә.
Тер мет мана таңһчин талдан чигн сурһульмудт СВО-д Төрскнә сулдхврин болн үлмә уга бәәлһнә төлә әмән өгсн баатрмудын санлыг тевчнә. Элстин 12-ч тойгта сурһульд СВО-н баатрмудын нерднь болн зургуднь Санлын эрст мөңкрүлгдсн бәәнә.
Городовиковск балһсна 3-ч тойгта сурһульд энүнә төгсәһәч, СВО-д әмнәсн хаһцсн Максим Медведевин санлд нерәдҗ волейболын турнир болв. Энүнд балһсна 1-ч болн 3-ч сурһульмудын багмуд орлцв. Әңгин болн цергә машинә командирнь Максим бәәсмн. Һурвн җил хооран 2022 җилин лу сарин 24-д зөргтә дәәч әмнәсн хаһцла. Гвардин 247-ч тойгта Сарпуль балһсна Кавказин хазгудын десантын-штурмин полкин гвардин сержант Максим бәәсмн.
Төрскнә сулдхврин төлә әмән өгсн Хальмг Таңһчин цуг баатрмудын туск санл мана тууҗд, олн-әмтнә зүркнд мөңкртхә.
ТҮРВӘН Һуна