«Медрл» селәдт үүлдврән делгрүлх

Урҗ өдр Элстд «Медрл» гидг Әрәсән олна-шаңһа гегәрлтин бүрдәцин Хальмг Таңһчд үүлддг әңгин шинҗллһнә хүүвин сүүр болв. Региональн әңг мана таңһчд 2023 җилин намрар бүрдәгдсн билә. Шинҗллһнә хүүвин гешүд 2024 җилд кеҗ-күцәгдсн көдлмшин аш диглгдҗ, эн җилин зура батлв. Сүүрин көдлмшт Әрәсән Өмн үзгин округд «Медрл» ниицәнә делгрллтин заллтын һардач Александр Шматько шуд залһлдана эв-арһар орлцв. Сүүриг Хальмг Таңһчин Толһач Хаска Бату нүр үгәр секв. Келхд, Бату Сергеевич Хальмг Таңһчин әңгин шинҗллһнә хүүвин ахлач болна.

- Мана таңһчд олна ниицәнә әңг 2023 җилин үкр сард бүрдәгдәд, эндр күцәмҗтәһәр үүлдҗ, олн-әмтнд гегәрлтин болн төрскнч сурһмҗин халхар аһу ик көдлмш күцәҗәнә. Эндр таңһчин әңгд 100 шаху лектор үүлдҗәнә, эдн нидн 400 лекц умшв, терүг 12 миңһн һар күн соңсв. Олна ниицәнә керг-үүлдврмүдт сурһульчнр, оютнр, күцәгч йосна бүрдәцсин көдләчнр, зөв-йос харлһна цергллтсин элчнр орлцв. Лектормуд дунд нертә номтнр, олна үүлдәчнр, тоомсрта болн күндтә улс бәәнә. Керг-үүлдврмүдт тууҗин, сойлын, чик авг-бәрцин, өрк-бүлин чинрин болн нань чигн чинртә төрмүд босхгдна. Ода ниицәнә әңг хотл балһснд күцәмҗтәһәр үүлдҗәнә, болв ода таңһчин райодт бас көдлмшән делгрүлх кергтә. Эн җил бидн Алдр Диилврин 80 җилин ончта өөн темдглҗәнәвидн, Әрәсән Президентин зәрлгәс иштә мана орн-нутгт Төрскән харсачин җил зарлгдв. Эндр мана таңһчд Төрскән харсгч Алдр дәәнд орлцсн тавн ветеран бәәнә, бидн эднд өдр болһн гилтә килмҗән тусхах зөвтәвидн. Төрскнч сурһмҗин керг-үүлдврмүдт һол оньг өггдҗәнә, цергә шишлң керг-үүлдврт орлцачнр эн кергт шунмһаһар орлцх зөвтә. Бичкдүдин төлә бәрлдән болсн һазрт, бумблвсар экскурсь бүрдәҗ, дәәнә ветеранмудла харһлтс давулхла, дәәнә туск фильмс үзүлхлә сән болхмн. Эн җил бидн Хальмг автономин 105 җилин өөн темдглхвидн, хотл Элст балһсн бүрдәд 160 җил болхмн, Әрәсән Президент Владимир Путинә даалһврар мана таңһчд намртан бурхн-шаҗна нарт-делкән хург давулгдхмн. Идеологин көдлмшт ик оньг тусхаҗ, тууҗиг үнн кевәр хадһлҗ, дорас өсч йовх баһ үйд чик болн гүн медрл өгх кергтә. Медрл мадниг улм арһта, чидлтә болхд туслна. Медрл Әрәсәг алдр орн-нутг болхд һоллгч ул болна, – гиҗ Бату Сергеевич келв.
Александр Шматько Хальмг Таңһчд үүлддг әңгин үүлдвриг өөдәнәр үнләд, күцәмҗтәһәр терүг бүрдәҗ давулхд тусан күргҗәдг төләднь таңһчин Толһач Хаска Батуд, таңһчин Толһачин һардврин ахлач Кирилл Поповд, КалмГУ-н һардач Салан Бадмд, КРО-н әңгин һардач Манҗин Элеонорад онц ханлт өргв. Хальмгин әңг Әрәсән Өмн үзгт Ростовск мүҗин болн Краснодарск крайин әңгүдлә дөрлдҗ, сән гисн әңгүдин тоод орҗана, гиҗ Александр Александрович темдглв. Намртан болх бурхн-шаҗна хургт «Медрл» Әрәсән ниицән бас эрк биш орлцх гиҗ Александр Шматько келв. Хальмг Таңһчин залврин Ахлач Босхмҗин Гиләнә келсәр, КРО-н шинҗллһнә хүүвин гешүд арһ-чидлән хамцулҗ, ниитә болн шунҗ көдлҗәдг учрар ашнь күцәмҗтә болв гив. Сүл цагт таңһчд күцәгдҗәдг келн-улсин төсвс, тосхгдҗадг шин эмнлһс, сойлын гермүд, ясгдҗадг сурһульмуд, хаалһс, арһлачнриг дөңнллһнә керг-үүлдврмүд «Медрл» ниицәнә төсвс күцәмҗтәһәр күцәхд, баһчудт болн бичкдүдт сән таал тогтахд туслна, гиҗ Гилән Герасимовна келв.
Давсн җилд ямаран көдлмш күцәгдснә тускар «Медрл» ниицәнә КРО-н әңгин һардач Манҗин Элеонора тодрхаһар келҗ өгәд, «Медрл Баатрмуд», «Медрл ном», «Медрл спорт», «Медрл лектормуд» болн нань чигн төсвсин медлд ямаран керг-үүлдврмүд болсна, кедү күн орлцсна тускар келв. Олна ниицәнә лектормуд дунд номтнр, багшнр, олна үүлдәчнр, дааврта һардачнр, нертә спортсменмүд болн СВО-н ветеранмуд орлцна. «Медрл лектормуд» гидг төсвин медлд Хальмг ик сурһульд сурчадг һазадын орн-нутгудас ирсн оютнрт нарт-делкән үүлдврин заллтын һардач Ансельм Хундайи Әрәсән күцәмҗин тускар французск келәр келҗ өгснь өвәрц керг-үүлдвр болв. «Медрл спорт» гидг төсвд сурһульч, гимнастк Анҗукан Дарина күүкд-көвүдт эврәннь күцәмҗин тускар келҗ өгснь бас соньн болсиг эн заав. Таңһчд үүлддг әңг Элстин лицейла, Элстин классическ гимназьла, Элстин багшин колледжла болн Социальн техническ шаңһа ик сурһулин әңглә, Хальмг ик сурһулин профсоюзн бүрдәцлә, Әрәсән цергә-тууҗлгч ниицәнлә нөкцлтин бооца батлҗ хамцу үүлдҗәнә. Таңһчин райодт ода үүлдврән делгрүлх кергтә гисн таңһчин Толһачин даалһвриг күцәһәд, эн туст көдлмшән шунмһадулхвидн, гиҗ Манҗин Элеонора темдглв.
Сүүрин чилгчәр «Медрл» ниицәнә таңһчд үүлддг әңгин лектормуд Довгопола Дмитрий, Аман Даглара болн Александра-Октябрина Рвачева Хальмг Таңһчин Толһачин Ханлтын бичгәр ачлгдв. Тер мет олна ниицәнә үүлдврт шунмһаһар орлцҗ, делгрлтд тәвцән орулҗадг төләдән зәрм лектормуд «Медрл» гидг Әрәсән ниицәнә Ханлтын бичгәр ачлгдснь цааранднь күцәмҗтәһәр көдлхд урмдта болв.

ДООҖАН Наталья