Шидр Екатеринбург балһснд RCC Boxing Promotions боксар нарт-делкән марһан болв. Терүнд нер һарсн мана спортсмен Натра Чиңһс диилвр бәрәд Eurasian Boxing Parliament чемпиона бүс гертән авч ирв.

Урҗ өдр цуг орн-нутгт, нег үлү мана таңһчд, Крым Республик Әрәсән ханьд орсна арвн негдгч җилин өөнд нерәдсн керг-үүлдврмүд давулгдв. Элст балһсна Диилврин паркд «Мана Крымск хавр» нертә ирлцңгү митинг-концерт болв. Балһсна йосна, баһчудын болн олна бүрдәцсин элчнр, цергә шишлң керг-үүлдврин ветеранмуд, бәәрн улс терүнд орлцв.

Сарпан района Садовое селәнд насни дигт күрәд уга көвүнд насарн ах көвүд, күчән үзүләд наад бәрснә ашт тер әмндән күрснә туск һашута йовдл учрв. Эн йовдл олн-әмтиг үүмүлв. Әрәсән мөшклһнә комитетин Хальмг Таңһчар үүлддг мөшклһнә заллт учрсн йовдлын ашар цааҗин керг бүтәв, ода мөшклһнә керг-үүлдвр күцәгдҗәнә. Әрәсән мөшклһнә комитетин Ахлач Александр Бастрыкин эн йовдлыг эврән бүрткҗәнә.

Давсн җилд мана орн-нутгт Әрәсән Президент Владимир Путина зәрлгәс иштә «Баатрмудын цаг» гидг шишлң көтлвр эклсмн. Цергә шишлң керг-үүлдврт орлцад, залу-зөрмгән үзүләд, Төрскндән итклтә болҗахиг медүлсн улс терүнд орлцад, немр сурһуль сурад, мергҗлтән өөдлүләд шаңһа болн муниципальн бүрдәцст көдлдг болв. Орн-нутгин толһачин даалһврар регион болһнд ирлцңгү көтлвр бас күцәгдх зөвтә болсмн. Тегәд Хальмг Таңһчин Толһач Хаска Батун шиидврәр мана таңһчд «Баатрмуд 08» гидг региональн төсв зарлгдв.

Буйнч седклин концерт моһа сарин 22-т Элстд болхмн. Цергә шишлң керг-үүлдврт орлцҗадг цергчнрт дөң болхин төлә таңһчин цуг әмтн, тер дотр сойлын көдләчнр, билг-эрдмин үүлдәчнр арһ-чидлән хамцулҗана. Эн концертин тускар «Калмыкия» таңһчин зәңгллһнә агентствд болсн брифингд келгдв.

Шидр П.Жемчуевин нертә таңһчин эмнлһнә эрүл-менд харлһна көдләчнриг «Фронтд дөң күргсн төлә» II девсңгин медаляр ачлв. Байрин керг-үүлдврт Әрәсән Өмн үзгт РФ-н Президентин күцц зөвтә элчин дарук Владимир Гурба, Хальмг Таңһчин Улсин Хуралын (Парламентин) Ахлач Артем Михайлов, таңһчд үүлддг ах федеральн инспектор Александр Беляев, Хальмг Таңһчин Толһачин һардврин ахлач Кирилл Попов, «Дәәч» гидг цергә-спортивн белдврин болн төрскнч сурһмҗин төвин һардач Җаңһан Чимид орлцв.

Моһа сарин эклцәр Элстд Хальмг ик сурһулин һардач Салан Бадм болн дацңгудын һардачнр Китд орн-нутгин Сяньтао балһсна эрдмин-техникин күрәлңгин болн сурһуль-эрдмин бүрдәцсин салврар селвг өгдг нарт-делкән Ухань балһсна «Фэнъя» компаня элчнрлә онлайн күүндвр кев. Хальмг вузд китд оютнриг «Багшин сурһуль-эрдм» гидг салврар дасхлһна туск төр харһлтын йовудт хәләгдв.

Ачта багш, таңһчин түрүн күүкн-нисәч Сохра Булһна 103 җилин өөнд нерәдсн төрскнч дууна наадм Улан Эрг селәнә сурһульд болв.

Җил болһн тогтсн авъясар хам-хоша бәәдг Әәдрхнә мүҗд Цаһан Сарин байр темдглнә. Бемб өдрлә Әәдрхнә мүҗин филармоньд ирлцңгү керг-үүлдвр болв. Әәдрхнә мүҗин сойлын министерств, улсин сойлын номин-методическ мүҗин төв болн «Хальмг» нертә хальмг сойлын Әәдрхнә мүҗин ниицән энүг бүрдәсн болдг.

Шидр «Калмыкия» РИА-н барин төвд Элст балһсна һардврин орлцлһтаһар чинртә күүндвр болв. Терүнд балһсна уульнцст күцәгдҗәдг ясврин болн талдан көдлмшин тускар келгдв.